IPL ઝગડાનો ખુલાસો / 'કોહલી જ ખોટો હતો', નવીન હકનું ઉપરાણું લેતા ગંભીરે ખોલ્યું મોં, ધોની વિશે પણ કરી મોટી વાત

• કોહલી સાથેના મેદાન પરના ઝગડા પર ગૌતમ ગંભીરે મોં ખોલ્યું 
• ગૌતમ ગંભીરે તેના સાથી ખેલાડી નવીન ઉલ હકની વાત ગણાવી
• આડકતરી રીતે વિરાટ કોહલીનો વાંક કાઢ્યો 

IPLમાં લખનઉના અફઘાન બોલર નવીન ઉલ હક અને બેંગ્લુરુના ખેલાડી વિરાટ કોહલી વચ્ચે મેદાનમાં ચડસાચડસી થઈ હતી, આ વાતને લઈને લખનઉની ટીમનો મેન્ટર ગૌતમ ગંભીર પણ કોહલી વચ્ચે પણ માથાકૂટ થઈ હતી, હવે ગૌતમ ગંભીરે ખુલાસો કર્યો છે. મેદાનમાં થયેલા ઝગડા વિશે વાત કરતાં ગૌતમ ગંભીરે કહ્યું કે મારા મત પ્રમાણે નવીન-ઉલ-હક સાચો હતો. નવીનની વાત સાચી હતી તેથી મેં તેને સપોર્ટ કર્યો. વાત માત્ર નવીન-ઉલ-હકની નથી, જે પણ સાચું હશે તેને હું ટેકો આપીશ અને હું મરીશ ત્યાં સુધી કરીશ. 

નવીન ઉલ હકને કારણે કોહલી સાથે ઝગડાનું કારણ આપ્યું 
ગંભીરે વધુમાં કહ્યું કે, આવા ઝગડાઓને મેદાન પર જ ખતમ કરી નાખે છે. તેણે કહ્યું કે મેં ઘણી વખત ક્રિકેટના મેદાન પર ઝઘડા કર્યા છે, પરંતુ તે દિવસે જે બન્યું તે પહેલાં ક્યારેય બન્યું નથી. જોકે મેં હંમેશા એ સુનિશ્ચિત કરવાનો પ્રયાસ કર્યો છે કે, આ લડાઇઓ માત્ર મેદાન પૂરતી મર્યાદિત રહે. આ ચર્ચા બે લોકો વચ્ચે હતી અને તે ક્રિકેટના મેદાન સુધી જ મર્યાદિત હોવી જોઈએ, આવા ઝગડા મેદાનની બહાર ન જવા જોઈએ. ઘણા લોકોએ ઘણી બધી વાતો કહી. ઘણા ઇન્ટરવ્યુની પણ માંગ કરવામાં આવી હતી જેથી તેમની ટીઆરપી આવી શકે. મને પણ ચોખવટ કરવાનું કહેવામાં આવ્યું પરંતુ હવે મને જરુરી લાગ્યું એટલે ખુલાસો કર્યો. 

કોહલી અને ધોની સાથે છે સારા સંબંધો
ગંભીરે વિરાટ કોહલી અને મહેન્દ્ર સિંહ ધોની સાથેના સંબંધો વિશે પણ વાત કરી હતી. ગંભીરે કહ્યું કે મેદાન પર, અમે બધા જીતવાના ઈરાદા સાથે જ મેદાન પર ઉતરીએ છીએ અને ઘણી વાર આવું થઈ જતું હોય છે જોકે તેનો અર્થ એવો નથી કે અમે બહાર પણ દુશ્મની રાખીએ છીએ. મેદાનમાં બનેલું મેદાનમાં જ ભૂલી જવાનું હોય છે તેને બહાર લાવવાની જરુર નથી. ગંભીરે કહ્યું કે મારે કોહલી અને ધોની બન્ને સાથે સારા સંબંધો છે અને અમે ખૂબ જ સહજ છીએ, અમારી વચ્ચે કોઈ ઝગડો નથી. 

નવીન ઉલ હક અને ગૌતમ ગંભીર એક જ ટીમના સભ્યો  
ઉલ્લેખનીય છે કે અફઘાની બોલર નવીન ઉલ હક અને ગૌતમ ગંભીર એક જ ટીમના સભ્ય છે. નવીન લખનઉની ટીમનો બોલર છે તો ગંભીર મેન્ટર છે. 
નવીન-ઉલ-હક અને વિરાટ કોહલી વચ્ચે થયેલી તકરાર બાદ ગંભીર કોહલી સાથે પણ અથડાયો હતો. મેદાન પર બંને વચ્ચે થયેલી તકરાર બાદ તેમને બન્નેને દંડ પણ કરાયો હતો. 

આઈપીએલમાં શું થયું હતું 
લખનઉ સુપર જાયન્ટ્સના (Lucknow Super Giants) ફાસ્ટ બોલર નવીન-ઉલ-હક (Naveen-ul-Haq) અને રોયલ ચેલેન્જર્સ બેંગ્લોરના (Royal Challengers Bangalore) સ્ટાર ક્રિકેટર વિરાટ કોહલી વચ્ચે મેચ બાદ ઝગડો થયો હતો. નવીનનું ઉપરાણું લઈને ગૌતમ ગંભીર કોહલી સાથે ભીડાયો હતો અને મેદાનમાં તેની સાથે ચડસાચડસી કરી હતી.