દુ:ખદ / J&Kના સાંબામાં કાર ખીણમાં ખાબકી, વાહનચાલકની એક ભૂલના કારણે 5નાં કરૂણ મોત તો એક ઘાયલ

• જમ્મુ-કાશ્મીરના સાંબા જિલ્લામાં સર્જાયો ગમખ્વાર અકસ્માત
• કાર ચાલકે સ્ટિયરિંગ પરથી કાબુુ ગુમાવતા ગાડી સીધી ખાઇમાં ખાબકી
• ગંભીર અકસ્માતમાં 5નાં મોત તો એક વ્યક્તિ ઘાયલ

આ ઘટના વિશે માહિતી આપતા સાંબા જિલ્લાના પોલીસ સ્ટેશનના પ્રભારીએ જણાવ્યું કે, આજે વહેલી સવારે માનસર વિસ્તાર પાસે થયેલા ગંભીર અકસ્માતમાં કુલ પાંચ લોકોના મોત થયા છે અને એક વ્યક્તિ ઘાયલ થઇ છે. આ અકસ્માતમાં ઘાયલ થયેલી વ્યક્તિને નજીકની હોસ્પિટલમાં દાખલ કરવામાં આવ્યો છે. એસએચઓએ જણાવ્યું કે, ઇનોવા કાર માનસર રૂટ પર થઇને શ્રીનગર જઇ રહી હતી.

J&K | A total of five people died and one was injured in an accident near the Mansar area of Samba district early in the morning, the station house officer (SHO) of Samba said

— ANI (@ANI) March 5, 2022

તેઓએ જણાવ્યું કે, જમોડ વિસ્તારમાં એક વળાંક પર ઈનોવા કારના ડ્રાઈવરે અચાનક કાબુ ગુમાવી દીધો અને કાર ઊંડી ખીણમાં ખાબકી ગઈ. આ કારમાં 6 લોકો સવાર હતાં. આ સાથે રસ્તા પરથી પસાર થતા લોકો અને સ્થાનિક લોકોએ કોઈ પણ રીતે ખાઇમાં પડેલી કારમાંથી તમામ લોકોને બહાર કાઢી મુખ્ય માર્ગ પર લાવી દીધા હતાં અને તુરંત પોલીસને પણ જાણ કરી દીધી હતી. અધિકારીઓએ જણાવ્યું કે, મૃતકોના મૃતદેહોને પોસ્ટમોર્ટમ માટે મોકલી દેવામાં આવ્યાં છે અને ઘાયલને હાલમાં સારવાર અર્થે હોસ્પિટલમાં ખસેડવામાં આવેલ છે.

પોલીસ તુરંત પહોંચી હતી ઘટનાસ્થળે

આ ઘટનાની જાણ થતા જ પોલીસ તાત્કાલિક ઘટનાસ્થળે પહોંચી ગઈ હતી અને પોલીસે રાહત કાર્ય શરૂ કર્યું હતું. પોલીસ તમામને હોસ્પિટલ લઈ ગઈ પરંતુ ડોક્ટરોએ 6માંથી 5ને મૃત જાહેર કરી દીધા હતાં. સત્તાવાર સૂત્રોના જણાવ્યા અનુસાર, માનસરમાં એક ઈનોવા કારને ગંભીર અકસ્માત નડ્યો હતો, જેમાં અનંતનાગના ગ્રામ બ્રહ રાનીપોરાના રહેવાસી પરિવારના ચાર સભ્યોનું ડ્રાઈવર સહિત ઘટનાસ્થળે જ મોત નિપજ્યું હતું.

હાલમાં આ સમગ્ર ઘટનાની તપાસ શરૂ

મૃતકોની ઓળખ ગુલઝાર અહમદ ભટ (71), તેઓની પત્ની જૈના બેગમ (65), તેમના પુત્ર ઇકબાલ અહમદ ભટ (25) અને પુત્રી મસરત જાન (21) તરીકે થઇ છે. વાહનચાલકની ઓળખ અનંતનાગના રહેવાસી સાકિબ તરીકે થઇ છે. જો કે, એક પોલીસ અધિકારી કહી રહ્યાં છે કે, તમામની ઓળખ કરી લેવામાં આવી છે. તેઓએ જણાવ્યું કે, હાલમાં આ મામલો દાખલ કરી લેવામાં આવ્યો છે અને આગળની તપાસ પણ શરૂ કરી દેવાઇ છે.