નેશનલ / ધનતેરસે હિમાચલના ચંબા અને તેલંગાણાના નારાયણપેટમાં વહેલી સવારે ધરતી ધ્રૂજી, ભૂકંપના આંચકા અનુભવાયા!

શુક્રવારે સવારે દેશના બે અલગ-અલગ રાજ્યોમાં ભૂકંપના આંચકા અનુભવાયા હતા. ચંબા (હિમાચલ પ્રદેશ) અને નારાયણપેટ (તેલંગણા)માં આવેલા આ ભૂકંપને કારણે કોઈ જાનહાનિ કે સંપત્તિને નુકસાન થયાના અહેવાલ નથી.

નેશનલ સેન્ટર ફોર સિસ્મોલોજી (NCS) અનુસાર, બંને સ્થળોએ આવેલા ભૂકંપની તીવ્રતા રિક્ટર સ્કેલ પર અનુક્રમે 3.2 અને 2.5 નોંધાઈ હતી. સદભાગ્યે, તીવ્રતા ઓછી હોવાને કારણે, હાલમાં કોઈ મોટા નુકસાનના અહેવાલ નથી.

નેશનલ સેન્ટર ફોર સિસ્મોલોજી અનુસાર, તેલંગાણાના નારાયણપેટમાં સવારે 6:16:46 વાગ્યે ભૂકંપ આવ્યો હતો. તેની તીવ્રતા 2.5 હતી અને તેનું કેન્દ્રબિંદુ જમીનની સપાટીથી પાંચ કિલોમીટરની ઊંડાઈએ નોંધાયું હતું. આ ભૂકંપનું કેન્દ્ર 16.452 ડિગ્રી ઉત્તર અક્ષાંશ અને 77.414 ડિગ્રી પૂર્વ રેખાંશ પર હતું.

દરમિયાન, હિમાચલ પ્રદેશના ચંબામાં સવારે 6:59:46 વાગ્યે ભૂકંપના આંચકા અનુભવાયા હતા. તેની તીવ્રતા 3.2 નોંધાઈ હતી. ભૂકંપનું કેન્દ્રબિંદુ જમીનની સપાટીથી 15 કિલોમીટર નીચે હતું. તેના ભૌગોલિક નિર્દેશાંક 32.719 ડિગ્રી ઉત્તર અક્ષાંશ અને 76.123 ડિગ્રી પૂર્વ રેખાંશ પર નોંધાયા હતા. હાલમાં, આ બે ભૂકંપને કારણે જાનહાનિ કે સંપત્તિને નુકસાન થયાના કોઈ અહેવાલ નથી.

કેવી રીતે આવે છે ભૂકંપ?

જોકે બહારથી પૃથ્વી એક નક્કર ગોળા જેવી દેખાઈ શકે છે, પરંતુ વાસ્તવમાં તે અનેક સ્તરોની બનેલી છે. પૃથ્વીની આંતરિક સંરચના મુખ્યત્વે ચાર ભાગોમાં વહેંચાયેલી છે: સૌથી અંદરનું સ્તર 'ઇનર કોર' છે, ત્યારબાદ 'આઉટર કોર' આવે છે, પછી 'મેન્ટલ' છે અને સૌથી ઉપર 'ક્રસ્ટ' આવેલું છે. ક્રસ્ટ એ પૃથ્વીનું સૌથી બહારનું નક્કર સ્તર છે, અને તેની નીચે મેન્ટલ આવેલું છે. પૃથ્વીના કઠણ બાહ્ય સ્તરને 'લિથોસ્ફિયર' કહેવામાં આવે છે, જેમાં ભૂપૃષ્ઠ અને મેન્ટલનો ઉપરનો ભાગ સામેલ છે. તે અનેક નાની-મોટી પ્લેટોમાં વિભાજિત થયેલું છે, જેને 'ટેક્ટોનિક પ્લેટ્સ' તરીકે ઓળખવામાં આવે છે.

આ પણ વાંચોઃ હવામાં ઝેર કે મોતનો ધીમો સંદેશ? પ્રદૂષણના કારણે ક્યાંક 8 તો ક્યાંક 4 વર્ષ ઘટી રહ્યું છે લોકોનું આયુષ્ય

આ ટેક્ટોનિક પ્લેટો સતત ખૂબ જ ધીમી ગતિએ ખસી રહી છે. જ્યારે બે પ્લેટો એકબીજા સાથે અથડાય છે, એકબીજાની ઉપર સરકે છે અથવા એકબીજાથી દૂર જાય છે, ત્યારે પૃથ્વીની સપાટી પર હલચલ થાય છે. જ્યારે આ પ્લેટો વચ્ચે જમા થયેલું દબાણ અચાનક ઊર્જા સ્વરૂપે મુક્ત થાય છે, ત્યારે પૃથ્વી ધ્રૂજવા લાગે છે. આ હલચલને જ 'ભૂકંપ' કહેવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ