શાસ્ત્ર / ભગવાનને ભોગ ધરાવેલો પ્રસાદ ખરીદી કે વેચી ન શકાય

ભગવાનના પ્રસાદને ગ્રહણ કરવા અથવા વિતરણ કરવામાં કોઇ જાતિ બાધ હોતો નથી. પ્રભુ પ્રસાદ ક્યારેય વાસી કે અશુધ્ધ હોતો નથી. કોઇના અડવાથી તે અપવિત્ર થતો નથી. ભગવાનનો પ્રસાદ દરેક પરિસ્થિતિમાં ગંગાજળ સમાન શુધ્ધ માનવામાં આવ્યો છે.
 

વર્તમાન સમયમાં આપણા આરાધ્ય સ્થળ પણ વ્યાપારિક ગતિવિધિઓનુ કેન્દ્ર બની રહ્યા છે. આજે ઘણા તીર્થસ્થાનો અને આરાધ્યસ્થળો પર શાસ્ત્ર વિરુધ્ધની ઘટનાઓ બને છે. અહીં પ્રભુને ચડાવાયેલો ભોગ કે પ્રસાદ પૈસા લઇને વેચાય અને ખરીદાય છે. પ્રસાદ ખરીદીને લોકો પોતાને ધન્ય સમજે છે. શાસ્ત્રોમાં ભગવાનને ભોગ ચડાવાયેલો પ્રસાદ ખરીદવો અને વેચવો નિષેધ માનવામાં આવે છે.

સ્કંદ પુરાણ અનુસાર જે વ્યક્તિ ભગવાનને અર્પિત ભોગ અને જે ભોગ દરમિયાન પ્રસાદના રુપમાં પરિવર્તિત થઇ ચુક્યો છે તેને ખરીદે કે વેચે છે બંને નરકના અધિકારી બને છે. ભગવાનને ધરાવવામાં આવતો પ્રસાદ ભગવાનને ધરાવવા માટે તો ખરીદવામાં આવે છે, પરંતુ ત્યારબાદ તેને વેચી ન શકાય અને ખરીદી ન શકાય. આમ તો જાતે બનાવેલો ભોગ જ ભગવાનને અર્પણ કરવો જોઇએ. શ્રધ્ધાળુઓએ પણ આવુ કાર્ય કરવાથી બચવુ જોઇએ.