મ્યુકરમાઇકોસિસ / શું કોરોનાની સાથે સાથે બ્લેક ફંગસથી પણ બચાવે છે વેક્સિન? જાણો શું કહે છે ડોક્ટર્સ

• ગુજરાતમાં મ્યુકરમાઇકોસિસ રોગથી થયું પહેલું મોત   
• આંખોના રોગના નિષ્ણાત ડૉક્ટર રાજવર્ધન આઝાદનું નિવેદન 
• ભારતમાં આ રોગનું પ્રમાણ ઘણું ઓછું

ગુજરાતમાં મ્યુકરમાઇકોસિસ રોગથી થયું પહેલું મોત
કોરોનાની સાથે સાથે હવે ખતરનાક બીમારી મ્યુકરમાઇકોસિસ પણ હવે દેશમાં લોકોને પોતાનો ભાગ બનાવી રહી છે. ગુજરાતમાં પણ એક વ્યક્તિનું મોત આ બીમારીનાં કારણે થઈ ચૂક્યું છે અને રાજકોટ તથા અમદાવાદની હોસ્પિટલમાં બીજા ઘણા દર્દીઓ આ બીમારીની સારવાર લઈ રહ્યા છે. પણ બિહારના ડોક્ટરોએ આ બીમારી પર એક સારા સમાચાર આપ્યા છે. બિહારના પટનામાં એઇમ્સમાં ચાર દર્દીને મ્યુકરમાઇકોસિસ થયો હતો. આ કેસોમાં દર્દીને કોરોનાથી કઈ રીતે બચાવવો તે પણ તેમના માટે મુસીબત હતી. પણ કોરોનાની વેક્સિન મ્યુકરમાઇકોસિસ સામે રક્ષણ આપે છે તે વાતમહદ અંશે સાબિત થઈ છે. 

આંખોના રોગના નિષ્ણાત ડૉક્ટર રાજવર્ધન આઝાદનું નિવેદન 
વિશ્વ સ્વાસ્થ્ય સંગઠન ડેવલપમેન્ટ ગ્રુપનાં એક્સપર્ટ અને આંખોના રોગના નિષ્ણાત ડૉક્ટર રાજવર્ધન આઝાદનું કહેવું છે કે વેક્સિન કોરોના સામે એકદમ ઢાલની જેમ કામ કરે છે, સાથે સાથે મ્યુકરમાઇકોસિસ સામે પણ રક્ષણ આપે છે. ટૂંકમાં કોરોના માટેની બધી વેક્સિન રોગપ્રતિકારક શક્તિ વધારવામાં મદદ કરે છે. વધુમાં તેમણે એક દાવો પણ કર્યો હતો કે ભારતમાં મ્યુકરમાઇકોસિસનાં કેસ ઘણા ઓછા પ્રમાણમાં જોવા મળી રહ્યા છે. કોરોના જ શરીરમાં આ રોગને પ્રવેશ કરવા દે છે. જેમ જેમ રોગપ્રતિકારક શક્તિ ઘટે છે તેમ તેમ તે મ્યુકરમાઇકોસિસને સ્થાન આપે છે. 

ભારતમાં આ રોગનું પ્રમાણ ઘણું ઓછું
ડૉકટર આઝાદે કહ્યું કે કોરોનાની સારવાર દરમ્યાન જો તમે લાંબા સમય સુધી ICU કે વેન્ટિલેટર પર રહો છો અને તમારી ઇમ્યુનિટી ઘણી ઓછી છે તો તમારે, પરિવારે અને ડોકટરોએ તેવા દર્દીનું ધ્યાન ખાસ રાખવું જોઈએ, અને તે દર્દીના શરીરમાં થતાં ફેરફારો પર નજર પણ રાખવી જોઈએ. સાથે જ બીજા ડૉક્ટર વિનાયક સિંહનાં જણાવ્યા મુજબ કોરોનાનાં ઈલાજ દરમ્યાન સ્ટેરોઇડનો ઉપયોગ થાય છે. જેથી લોહીમાં શુગર લેવલ વધી જાય છે અને ઇમ્યુનિટી ઓછી થઈ જાય છે.