નિવદેન / BJP ગમે ત્યારે મંત્રી-ધારાસભ્ય બદલે તોય...: ગેનીબેન ઠાકોર જગદીશ ઠાકોરની સામે જ આ શું બોલ્યા?

• કોંગ્રેસના ધારાસભ્ય ગેનીબેન ઠાકોરે ભાજપની સ્ટ્રેટેજીની કરી પ્રશંસા
• કાંકરેજના ચાંગા ગામે ઋણ સ્વીકાર કાર્યક્રમમાં કરી પ્રશંસા
• જગદીશ ઠાકોર સહિત કોંગ્રેસ આગેવાનોની ઉપસ્થિતિમાં કરી પ્રશંસા

2022માં યોજાયેલી વિધાનસભાની ચૂંટણીમાં ભાજપની ભવ્યજીત થઈ. 156 બેઠક જીતીને ભાજપે ઐતિહાસિક રેકોર્ડ બનાવી દીધો. આ રેકોર્ડ બ્રેક જીતની તમામ જગ્યાએ ચર્ચા થઈ. ભાજપે કરેલા માઈક્રોમેનેજમેન્ટ અને ભાજપના કાર્યકરો અને નેતાઓએ કરેલી મહેનતથી ભાજપની આટલી ભવ્ય જીત થઈ તેવુ જાણકારો માને છે. .જ્યારે બીજી બાજુ કોંગ્રેસને માંડ 17 બેઠક મળી. મોટો મોટા ચેહરા હારી ગયા. હાર બાદ કોંગ્રેસના નેતાઓએ મનોમંથન કર્યુ અને હવે આ હારની હારમાળને કેવી રીતે રોકવી તેના પર કામ શરૂ કર્યું. ત્યારે કોંગ્રેસના વાવના ધારાસભ્ય ગેનીબેન ઠાકોરનો એક વીડિયો વાયરલ થયો છે. કાંકરેજના ચાંગા ગામે ઋણ સ્વિકાર કાર્યક્રમ રાખવામાં આવ્યો હતો. આ કાર્યક્રમમાં કોંગ્રેસના પ્રદેશ અધ્યક્ષ જગદીશ ઠાકોર સહિતના આગેવાનો ઉપસ્થિત હતા ત્યારે આ કાર્યક્રમમાં ગેનીબેન ઠાકોરે આશ્ચર્યજનક નિવેદન આપ્યુ હતુ. કોંગ્રેસના ધારાસભ્ય ભાજપની પશંસા કરતા નજર ચડ્યાં છે. 

કોંગ્રેસ ધારાસભ્ય ગેનીબેન ઠાકોરે ભાજપની પ્રશંસા કરી
કોંગ્રેસ ધારાસભ્ય ગેનીબેન ઠાકોરે કાંકરેજના ચાંગા ગામે ઋણ સ્વીકાર કાર્યક્રમમાં ભાજપની પ્રશંસા કરી છે તેમણે ગુજરાત કોંગ્રેસ પ્રદેશ પ્રમુખ જગદીશ ઠાકોરની અધ્યક્ષતામાં યોજાયેલા કાર્યક્રમમાં પ્રશંસા કરતા અનેક તર્કવિતર્ક પણ શરૂ થયાં છે. તેમણે જણાવ્યું કે, ભાજપ સ્ટ્રેટેજીથી આખી સરકાર બદલી નાખે તો પણ કોઈ બોલતું નથી,  ભાજપ કોઈની ટિકિટ કાપે તો પણ વિવાદ થતો નથી તેમણે કહ્યું કે, આપણે કોંગ્રેસમાં કાંઈ વધ્યું જ નથી.

'5 વર્ષ લોહી પીવાના માત્ર 2 હજાર મત આપ્યા'
કોંગ્રેસ ધારાસભ્ય ગેનીબેન ઠાકોરે જણાવ્યું કે, વિધાનસભા ચૂંટણીમાં મને 1.2 લાખ મત મળ્યા છે, આ મતમાંથી 5 વર્ષ લોહી પીવાના માત્ર 2 હજાર મત મળ્યા છે. તેમણે ઉમેર્યું કે, 2 હજાર મત માટે ટિકિટ, કોન્ટ્રાક્ટ, રૂપિયા, ગાડી અને એ કે ત્યાં હાજર થવું પડે છે તેમણે કહ્યું કે, 1 લાખ મત વાળા કાંઈ બોલતા જ નથી.

ગેનીબેને આડકતરી રીતે તો કોંગ્રેસના નેતાઓને સાચુ કહી દીધુ છે. ભાજપે પોતાની કેડરબેઝ છાપને બરકરાર રાખી છે. અને તેના પ્રતાપે જ ઐતિહાસિક જીત મેળવી છે. જ્યારે કોંગ્રેસ પોતાની સમસ્યાઓ દૂર ન કરી અને તેનું પરિણામ ચૂંટણીમાં જોઈ લીધુ. હવે તો કોંગ્રેસના નેતા અને ધારાસભ્ય પણ ભાજપની સ્ટ્રેટજીના વખાણ કરી રહ્યા છે ત્યારે કોંગ્રેસ હવે પોતાની રણનીતિમાં કેવા ફેરફાર કરે છે અને પોતાના સંગઠનને કેવી રીતે મજબૂત કરે છે તે જોવાનું રહ્યું.