સરાહનીય કામગીરી / એવું શું થયું કે 2 જ કલાકમાં અમદાવાદની રિજનલ ઓફિસે આ ભાઇનો પાસપોર્ટ તૈયાર કરી નાખ્યો, જાણો કારણ

• ગુલબાઈ ટેકરા ખાતેની રિજનલ પાસપોર્ટ ઓફિસની સરાહનીય કામગીરી
• અમેરિકામાં મૃત્યુ પામેલા યુવકના પિતાને માત્ર 2 કલાકમાં પાસપોર્ટ બનાવી આપ્યો
• રિજનલ પાસપોર્ટ ઓફિસે માનવતાનું ઉત્તમ ઉદાહરણ પૂરું પાડ્યું 

અમદાવાદના ગુલબાઈ ટેકરાની રિજનલ પાસપોર્ટ ઓફિસની કામગીરીના લોકો વખાણ કરી રહ્યા છે.  પાસપોર્ટ ઓફિસે અમેરિકામાં કાર અકસ્માતમાં મૃત્યુ પામેલા યુવકના પિતાને પુત્રની અંત્યેષ્ટિ માટે જવા માત્ર 2 કલાકમાં પાસપોર્ટ બનાવી આપી માનવતાનું ઉત્તમ ઉદાહરણ પૂરું પાડ્યું છે.

એકના એક દીકરાના અવસાનથી પરિવારમાં શોક
મળતી માહિતી અનુસાર, અમદાવાદના થલતેજ વિસ્તારમાં રહેતા જતીનકુમાર પટેલનો એકનો એક પુત્ર શ્રેય પટેલ (ઉં.વ 23) અમેરિકામાં અભ્યાસ માટે ગયો હતો. અમેરિકામાં શ્રેય ક્રિસમસ વેકેશનમાં મિત્રો સાથે ફરવા ગયો હતો. આ દરમિયાન બરફના તોફાનને કારણે રોડ અકસ્માત થતાં તેનું મૃત્યુ નીપજ્યું હતું. એકના એક દિકરાના અવસાનના સમાચારથી અમદાવાદના પટેલ પરિવાર પર શોકનું મોજું ફરી વળ્યું હતું. 

રિજનલ પાસપોર્ટ ઓફિસરને કરી હતી રજૂઆત
દીકરાનું અવસાન થતાં પિતા પાસે પુત્રનું મોઢું છેલ્લીવાર જોવા અમેરિકા જવા માટે પાસપોર્ટ નહતો. તેથી જતીનકુમાર અને તેમના સગાં સોમવારે ગુલબાઈ ટેકરા ખાતેની રિજનલ પાસપોર્ટ ઓફિસે પહોંચ્યા હતા અને રિજનલ પાસપોર્ટ ઓફિસર (આરપીઓ) રેન મિશ્રાને મળ્યા હતા. તેઓએ અમેરિકા જવા તાત્કાલિક પાસપોર્ટની જરૂર હોવાની RPOને રજૂઆત કરી હતી.

2 કલાકમાં બનાવી આપ્યો પાસપોર્ટ
જે બાદ તેઓએ વિદેશના સરકારી દસ્તાવેજ, પોલીસ રિપોર્ટ અથવા હોસ્પિટલનો રિપોર્ટ ધ્યાને લીધો હતો. જતીનકુમારે રજૂઆત કરતાની સાથે માનવતા દાખવીને પાસપોર્ટ ઓફિસના કર્મચારીઓ અન્ય કામ બાજુએ મૂકી તત્કાલ નવો પાસપોર્ટ બનાવવામાં લાગી ગયા હતા. આમ માત્ર બે કલાકમાં પાસપોર્ટ તૈયાર કરી આપી માનવતાનું ઉત્તમ ઉદાહરણ પૂરું પાડ્યું હતું.