Lok Sabha Election 2024 : લોકસભા ચૂંટણીને લઈ ત્રીજા તબક્કાનું મતદાન આવતીકાલે યોજાનાર છે. આ પહેલા ઉત્તર પ્રદેશથી એક મોટા સમાચાર સામે આવ્યા છે. વાત જાણે એમ છે કે, અખિલેશ યાદવે સમાજવાદી પાર્ટીમાં મોટો ફેરફાર કર્યો છે. અખિલેશે નરેશ ઉત્તમ પટેલના સ્થાને શ્યામ લાલ પાલને યુપીના નવા પ્રદેશ અધ્યક્ષ તરીકે નિયુક્ત કર્યા છે. શ્યામ લાલ પાલની વાત કરીએ તો તેઓ સમાજવાદી પાર્ટીના પ્રદેશ મહાસચિવ પણ રહી ચૂક્યા છે. જે બાદ નરેશ ઉત્તમ પટેલે તેમનો રાજ્ય કારોબારીમાં સમાવેશ કર્યો હતો. ગયા વર્ષે જ સપાએ તેમને પ્રદેશ ઉપાધ્યક્ષની જવાબદારી સોંપી હતી.
નરેશ ઉત્તમ પટેલ યુપીની ફતેહપુર લોકસભા સીટથી ચૂંટણી લડી રહ્યા છે. તેઓ સપા પ્રમુખના પણ નજીકના માનવામાં આવે છે. એવું કહેવામાં આવી રહ્યું છે કે, તેમનું સંપૂર્ણ ધ્યાન ચૂંટણી પ્રચાર પર હોવું જોઈએ આને ધ્યાનમાં રાખીને અખિલેશે તેમની પાસેથી જવાબદારી લઈને શ્યામ લાલ પાલને સોંપી દીધી છે.
યુપીની 10 સીટો પર 7 મેના રોજ મતદાન
લોકસભા ચૂંટણીના ત્રીજા તબક્કાના મતદાનની વાત કરીએ તો યુપીમાં 10 સીટો પર 7 મેના રોજ મતદાન થશે. તેમાં સંભલ, હાથરસ, આગ્રા, ફતેહપુર સિકરી, ફિરોઝાબાદ, મૈનપુરી, એટાહ, બદાઉન, આમલા અને બરેલીનો સમાવેશ થાય છે. આ તબક્કામાં 1.88 કરોડ મતદારો 100 ઉમેદવારોના ભાવિનો નિર્ણય કરશે. આ ચૂંટણીમાં કેન્દ્રીય મંત્રી એસપી સિંહ બઘેલ, યુપીના પર્યટન મંત્રી જયવીર સિંહ, મહેસૂલ રાજ્ય મંત્રી અનુપ પ્રધાન બાલ્મિકી અને મુલાયમ સિંહ યાદવના પરિવારના ઘણા સભ્યોના ભાવિનો નિર્ણય થશે.
વધુ વાંચો : 'ઘરે જાઓ, તો જોજો, નોટોના પહાડ મળી રહ્યાં છે', ઝારખંડના દરોડા પર PM મોદીનું મોટું નિવેદન
મહત્વનું છે કે, અખિલેશ યાદવની પત્ની ડિમ્પલ યાદવ મૈનપુરીથી ચૂંટણી લડી રહી છે. સપાના રાષ્ટ્રીય મુખ્ય મહાસચિવ રામ ગોપાલ યાદવના પુત્ર અક્ષય યાદવ ફરીથી ફિરોઝાબાદ બેઠક પરથી જીતવા માટે પ્રયાસ કરી રહ્યા છે જે તેમણે 2014માં જીતી હતી. બીજી તરફ બદાઉન લોકસભા બેઠક પરથી ચૂંટણી લડી રહેલા આદિત્ય યાદવ સપાના ગઢમાં જીત મેળવવાનો પ્રયાસ કરશે. જે સીટ પર ધર્મેન્દ્ર યાદવે 2014માં જીત મેળવી હતી. ઉત્તર પ્રદેશના પૂર્વ મુખ્યમંત્રી અને ભાજપના દિગ્ગજ નેતા કલ્યાણ સિંહના પુત્ર રાજવીર સિંહ એટાહ બેઠક પરથી હેટ્રિક બનાવવાની આશા રાખી રહ્યા છે.
