ઈલેક્શન 2022 / ગુજરાત AAP સાથે કોંગ્રેસના ગઠબંધન પર મોટી સ્પષ્ટતા, ભરતસિંહ સોલંકીના નિવેદન બાદ કોંગ્રેસની ચોખવટ

• રાજકીય પક્ષો રણનીતિ ઘડવામાં વ્યસ્ત
• કેજરીવાલે ગુજરાતીમાં માગ્યો જનતાનો સાથ
• આલોક શર્માએ કરી સ્પષ્ટતા

ચૂંટણીની તારીખ જાહેર થયા બાદ તમામ પક્ષો સક્રિય થઈ ગયા છે. બધા વચ્ચે ગુજરાતમાં આમ આદમી પાર્ટી પણ સક્રિય થઈ ગઈ છે. આપના કાર્યકરો ગુજરાતનો ખૂણે ખૂણો ખૂંદી રહ્યા છે. ત્યારે હવે અરવિંદ કેજરીવાલે એક વીડિયો દ્વારા ગુજરાતની જનતા પાસે એક તકની માગણી કરી છે અને એ પણ આપણી ગુજરાતી ભાષામાં. 

ભરતસિંહ સોલંકી આ શું બોલ્યા?
ભાજપે આજથી પ્રભારીઓની 3 દિવસ સુધી ચાલનારી મહત્વની બેઠક પણ શરૂ કરી દીધી છે અને આગેવાનો પીએમની ગુજરાતમાં સભાનો કાર્યક્રમ ઘડવાની તૈયારી કરવામાં વ્યસ્ત બની ગયો છે. તો કોંગ્રેસે પણ પ્રચારની રણનીતિ ઘડી કાઢી છે અને સમગ્ર દેશના કોંગ્રેસના નેતાઓ આગામી દિવસોમાં ગુજરાતમાં પ્રચાર માટે લાવવાનો તખતો તૈયાર કરી રહી છે. વધુમાં આમ આદમી પાર્ટીના સંયોજક અરવિંદ કેજરીવાલ ગુજરાતમાં પગદંડો જમાવવા હવે ગુજરાતી ભાષામાં મતદારોને રિઝાવી રહ્યા છે. ત્યારે કદાચ કોંગ્રેસ પણ આમ આદમી પાર્ટીથી થોડી રિઝાઈ હોઈ તેવું ચિત્ર ઊભું થયું છે. ગઈકાલે રાધનપુરમાં કોંગ્રેસની પરિવર્તન સંકલ્પ યાત્રા હતી, તેમાં જેમાં પૂર્વ ગુજરાત કોંગ્રેસ પ્રદેશ પ્રમુખ ભરતસિંહ સોંલકીએ આમ આદમી પાર્ટી સાથે ગઠબંધનની તૈયારી દર્શાવી છે. 
 

આલોક શર્માએ કરી સ્પષ્ટતા
જો કે, વિધાનસભા ચૂંટણી ટાણે ભરતસિંહનો આ પ્રસ્તાવ ભલે બીજા કોઈ પક્ષને ગમ્યો હોય કે ન ગમ્યો હોય પરંતુ  પોતાના જ પક્ષને ભરતસિંહની આ વાત વ્યાજબી લાગી નથી. આજે કોંગ્રેસના રાષ્ટ્રીય પ્રવક્તા આલોક શર્માએ સ્પષ્ટતા કરી કે, કોંગ્રેસ AAP સાથે કોઈ પણ પ્રકારનું ગઠબંધન કરશે નહીં.  આમ, જ્યારે હવે ચૂંટણી જાહેર થઈ ગઈ છે ત્યારે તમામ પક્ષો પોતાનું સ્થાન મજબૂત સમજી રહ્યા  છે. દરેક પક્ષો એવા વહેમમાં રાચી રહ્યા છે કે, જનતા તેમને જ આશીર્વાદ આપશે.પરંતું ગુજરાતની જનતાના મનમાં શું છે તે તો ચૂંટણી પરિણામ બાદ જ ખબર પડશે.