ચાલાકી / ચીનની એક પણ ચાલબાજી નહીં ચાલે, રક્ષામંત્રી રાજનાથ સિંહે PMOને સોંપ્યો સિક્રેટ રિપોર્ટ, કેબિનેટને પણ જાણ કરશે

• ચીનની અવળચંડાઈનો ક્યારે આવશે અંત
• ચીન દ્વારા શ્રીલંકાના ડોંડરા ખાડીમાં રડાર સિસ્ટમ ઉભી કરવા વિચારણા
• રાજનાથ સિંહે 12 પાનાનો અહેવાલ વડાપ્રધાન નરેન્દ્ર મોદીને મોકલ્યો 

ચીનની અવળચંડાઈને પગલે ભારત અને ચીન વચ્ચેના તણાવનો અંત જ આવતો નથી! ત્યારે ભારતની ગતિવિધિઓ પર નજર રાખવા માટે ચીન નિતનવા પેતરા રચતુ હોય છે આવી સ્થિતિ વચ્ચે ચીનની રડાર સિસ્ટમનો મામલો ગાજી રહ્યો છે. જેમાં ચીન શ્રીલંકામાં ડોંડરા ખાડીમાં રડાર સિસ્ટમ  ઉભી કરવા કાર્ય કરી રહ્યું છે. જેને લઈને ભારત સરકાર પણ સતર્ક થઈ ગઈ છે. જેને લઈને રક્ષા મંત્રી રાજનાથ સિંહે નૌકાદળની ગુપ્તચર માહિતી સાથે સંબંધિત 12 પાનાનો અહેવાલ વડાપ્રધાન નરેન્દ્ર મોદીને મોકલી દીધો છે. 

જગ્યા 99 વર્ષની લીઝ પર લેવા શ્રીલંકાની સરકાર સાથે વાતચીત

રિપોર્ટમાં એવો ઉલ્લેખ કરાયો છે કે ચીન ભારતની જાસૂસી કરવા માટે ખાડીમાં રડાર બેઝ બનાવવા પર વિચારી રહ્યું છે. જે 45 એકરમાં બનાવી શકે છે. એટલું જ નહીં આ વિસ્તારને 99 વર્ષની લીઝ પર લેવા માટે શ્રીલંકાની સરકાર સાથે વાતચીત કરી રહ્યું હોવાનું પણ જાણવા મળી રહ્યું છે. આ અંગે રાજનાથ સિંહ દ્વારા સુરક્ષા અંગેની કેબિનેટ સમિતિને માહિતી આપવામાં આવશે.

12 એપ્રિલે સુરક્ષા મંત્રી કેબિનેટ સમિતિને માહિતી રજૂ કરશે

એવી પણ વિગત બહાર આવી રહી છે કે રક્ષામંત્રી રાજનાથ સિંહ આ મામલે 12 એપ્રિલે સુરક્ષા પરની કેબિનેટ સમિતિને માહિતી રજૂ કરશે. રાષ્ટ્રીય સુરક્ષા સલાહકાર અજીત ડોભાલ દ્વારા પીએમઓને મોકલવામાં આવેલા 12 પાનાના રિપોર્ટમાં નૌસેનાએ ચીનના આવા પગલા બાદ ઉભા થતા જોખમો અંગે પણ ચર્ચા વિચારણા કરી હતી. ચીન જો આ રડાર સિસ્ટમ લગાવી લેશે તો હિંદ મહાસાગર પરની ભારતની તમામ સૈન્ય ગતિવિધિઓ જોઈ જાણી લેશે. ચીનની આ કાર્યવાહીને લઈને ભારત તો ઠીક પણ અમેરિકાને પણ ખતરો પડશે. ચીન અમેરિકા દ્વારા ડિયોગો ગાર્સિયા પર કરવામાં આવેલી સૈન્ય ગતિવિધિઓ પર પણ નજર રાખી શકે છે. વધુમાં ચીન રડારની મદદથી આંદામાન અને નિકોબારમાં આવાગમન કરતા નૌકાદળના જહાજોને પણ ટ્રેક કરી શકશે.