ક્રાઈમ / છોટાઉદેપુરમાં પિતાએ ગળું દબાવીને 8 વર્ષના પુત્રની હત્યા કરી, લાશ ખાડામાં નાખી, પછી આપઘાતનો પ્રયાસ

છોટાઉદેપુરના પાવીજેતપુરમાં એક પિતાએ પોતાના જ આઠ વર્ષના માસૂમ પુત્રની હત્યા કર્યા બાદ પોતે પણ આપઘાતનો પ્રયાસ કર્યો હોવાની ઘટના સામે આવતાં સમગ્ર પંથકમાં અરેરાટી ફેલાઈ છે.

ગળું દબાવી લાશ પાણી ભરેલા ખાડામાં ફેંકી

જેતપુર પાવી તાલુકા ના, સુસ્કાલ ગામ નજીક ઓરસંગ નદીના કિનારે પિતા જયેશભાઈ નાયકા પોતાના આઠ વર્ષના પુત્રને લઈ ગયા હતા. જ્યાં તેમણે કથિત રીતે પુત્રનું ગળું દબાવી હત્યા કર્યા બાદ નદીના કિનારે પાણી ભરેલા ખાડામાં ફેંકી દીધો હતો. આ ઘટનામાં માસૂમ બાળકનું કરુણ મોત નીપજ્યું હતું.

ગળા પર બ્લેડ મારી આપઘાતનો પ્રયાસ

પુત્રની હત્યા બાદ પિતા જયેશભાઈ નાયકાએ પોતાના ગળા પર બ્લેડ મારી આપઘાતનો પ્રયાસ કર્યો હતો. લોહીલુહાણ હાલતમાં મળી આવેલા પિતાને તાત્કાલિક સારવાર માટે હોસ્પિટલ ખસેડવામાં આવ્યા હતા. ત્યારબાદ વધુ સારવાર માટે વડોદરાની સયાજી હોસ્પિટલમાં ખસેડાયા હતા. તેમની હાલત નાજુક હોવાનું જાણવા મળ્યું છે.

એલ. પી રાણા

પાવી જેતપુર, પી. આઈ

પિતાએ તેના 8 વર્ષના પુત્રની હત્યા કરી કારણ એવું છે કે પાંચ વર્ષ પહેલા આરોપીના પત્ની સાથે છૂટાછેડા થયા હતા અને તે ટેન્શનમાં રહેતો હતો. તે મેન્ટલી ડિસ્ટર્બ રહેતો હતો તેથી તેણે આવું પગલું ભર્યું હોઈ શકે. આરોપીએ પુત્રની હત્યા બાદ પોતે પણ બ્લેડ મારીને આપઘાતનો પ્રયાસ કર્યો હોવાથી હાલ વડોદરામાં તેની સારવાર ચાલી રહી છે.

પત્ની ત્રણ વર્ષ અગાઉ ઘર છોડીને જતી રહી

જયેશભાઈની પત્ની ત્રણ વર્ષ અગાઉ ઘર છોડીને જતી રહી હતી. આ પારિવારિક પરિસ્થિતિને કારણે તેઓ માનસિક તણાવમાં હોવાની વાત સામે આવી છે. જોકે, ઘટનાના ચોક્કસ કારણો અંગે પોલીસ તપાસ બાદ જ વધુ વિગતો સ્પષ્ટ થશે. બીજી તરફ, અશોકભાઈ વિઠ્ઠલભાઈ નાયકાની ફરિયાદના આધારે પાવીજેતપુર પોલીસે હત્યાનો ગુનો નોંધી વધુ તપાસ હાથ ધરી છે. પિતા અને પુત્ર સાથે સંકળાયેલી આ કરુણ ઘટનાને પગલે સુસ્કાલ ગામ સહિત સમગ્ર પંથકમાં શોક અને અરેરાટીનો માહોલ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ