ઉમેદવારો નારાજ / ગુજરાત યુનિવર્સિટીએ એકાએક CCCની પરીક્ષા લેવાનું માંડી વાળતા અરજદારો મૂંઝવણમાં, અનેક ફોર્મ પેન્ડિંગ

• ગુજરાતમાં સરકારી કર્મચારીઓ માટે CCC ફરજિયાત
• ગુજરાત યુનિ. CCCની પરીક્ષા લેવાનું કરી દીધું બંધ
• હજારો અરજદારો ભારે મૂઝવણ અને મુશ્કેલીમાં મુકાયા

Gujarat Education News: ગુજરાત સરકાર દ્વારા રાજ્યના તમામ વિભાગમાં ફરજ બજાવતા સરકારી કર્મચારીઓ કોમ્પ્યુટરથી જાણકાર બને એ માટે CCC ફરજિયાત કરાયું છે. ત્યારે ગુજરાત યુનિવર્સિટી દ્વારા છેલ્લા કેટલાક સમયથી અચાનક જ CCCની પરીક્ષા લેવાનું માંડી વાળતા રાજ્યના હજારો અરજદારો મુશ્કેલીમાં મુકાયા છે. તો આ પરીક્ષા ક્યારે યોજાશે તે અંગે પણ કોઈ સત્તાવાર સ્પષ્ટતા ન કરાતા ઉમેદવારો ભારે મૂંઝવણમાં મુકાયા છે. 

સરકારે 8 યુનિવર્સિટીઓમાં ફાળવ્યું હતું પરીક્ષા સેન્ટર
રાજ્ય સરકાર દ્વારા સરકારી કર્મચારીઓ માટે CCC ફરજિયાત કરાયું છે. જેથી સ્પાર્ધાત્મક પરીક્ષાની તૈયારીઓ કરતા ઉમેદવારો સીસીસી માટે અરજી કરતા હોય છે. આ માટે સરકાર દ્વારા સૌરાષ્ટ્ર યુનિવર્સિટી, ગુજરાત ટેક્નોલોજીકલ યુનિવર્સિટી, ગુજરાત યુનિવર્સિટી, એમ.એસ યુનિવર્સિટી, દક્ષિણ ગુજરાત યુનિવર્સિટી, HNGU સહિત રાજ્યની કુલ 8 યુનિવર્સિટીઓમાં પરીક્ષા સેન્ટર ફાળવવામાં આવ્યા હતા.

ગુજરાત યુનિવર્સિટીમાં યોજાતી સૌથી વધુ વખત પરીક્ષા
જેમાં ગુજરાત યુનિવર્સિટીમાં મહિનામાં બે-ત્રણ વખત પરીક્ષા યોજાતી હોવાથી મોટી સંખ્યામાં ઉમેદવારો આ યુનિવર્સિટીમાં રજિસ્ટ્રેશન કરાવતા હતા. પરંતુ યુનિવર્સિટી દ્વારા અચાનક જ છેલ્લા કેટલાક સમયથી સીસીસીની પરીક્ષા લેવાનું બંધ કરી દેવામાં આવ્યું છે. તો એવું પણ સામે આવ્યું છે આ પરીક્ષા માટે હમણા સુધી રજિસ્ટ્રેશન ચાલું હતું. જેથી હજારોની સંખ્યામાં ઉમેદવારોએ રજિસ્ટ્રેશન કરાવ્યું છે.

ઉમેદવારોમાં ભારે નારાજગી
ત્યારે યુનિવર્સિટી દ્વારા છેલ્લા કેટલાક સમયથી અચાનક જ સીસીસીની પરીક્ષા લેવાનું બંધ કરાતા અરજાદરો મૂંઝવણમાં મુકાયા છે. જે ઉમેદવારોએ રજિસ્ટ્રેશન કરાવ્યું છે તેઓની પરીક્ષા ક્યારે લેવાશે તેને લઈને પણ કોઈ સત્તાવાર સ્પષ્ટતા ન કરવામાં આવતા ઉમેદવારોમાં ભારે નારાજગી જોવા મળી રહી છે.