અરેરાટી / પાકિસ્તાનમાં ભર બજારે એક હિન્દુ યુવતીની ઘાતકી હત્યા, અપહરણની કોશિશમાં નિષ્ફળતા મળતા ગોળી મારી દેવાઇ

• પાકિસ્તાનમાં હિન્દુ છોકરીની સરેઆમ કરી દેવાઇ હત્યા
• અપહરણકર્તાઓનો વિરોધ કરતા 18 વર્ષની હિન્દુ છોકરીને ગોળી મારી દેવાઇ
• 6 વર્ષમાં ધર્મ પરિવર્તનની 156 ઘટનાઓ નોંધાઈ

પાકિસ્તાનમાં હુમલાખોરોએ એક હિન્દુ છોકરીનું અપહરણ કરવાના પ્રયાસમાં નિષ્ફળ ગયા બાદ રસ્તાની વચ્ચે ગોળી મારીને હત્યા કરી દીધી છે. 18 વર્ષની પૂજા ઓડે સુક્કરનાં રોહીમાં અપહરણકર્તાઓનો વિરોધ કર્યો હતો ત્યાર બાદ તેને રસ્તાની વચ્ચે ગોળી મારી દેવાઇ હતી.

પીપલ્સ કમિશન ફોર માઈનોરિટીઝ રાઈટ્સ અને સેન્ટર ફોર સોશિયલ જસ્ટિસના જણાવ્યાં અનુસાર, પૂજાનું પહેલા રસ્તા પરથી અપહરણ કરવાનો પ્રયાસ કરવામાં આવ્યો અને જ્યારે તેણે વિરોધ કર્યો ત્યારે હુમલાખોરોએ તેને જાહેર રસ્તા વચ્ચે જ ગોળી મારી દીધી. દર વર્ષે લઘુમતી સમુદાયોની મહિલાઓનું સિંધમાં અપહરણ કરવામાં આવે છે અને ધાર્મિક ઉગ્રવાદીઓ દ્વારા બળજબરીથી તેઓનું ધર્માંતરણ કરવામાં આવે છે.

બળજબરીથી લગ્ન અને ધર્માંતરણનો સામનો

પાકિસ્તાનના લઘુમતી સમુદાયો ઘણાં લાંબા સમયથી બળજબરીથી લગ્ન અને ધર્મ પરિવર્તનનો સામનો કરી રહ્યાં છે. પાકિસ્તાનના સિંધ પ્રાંતમાં ધર્મ પરિવર્તન અને બળજબરીથી લગ્ન કરવાના અનેક કિસ્સાઓ સામે આવ્યાં છે. ત્યારે એક વાર ફરી આવો જ એક કિસ્સો સામે આવ્યો છે કે જેમાં 18 વર્ષની છોકરીને ખુલ્લેઆમ ગોળી મારી દેવામાં આવી.

6 વર્ષમાં ધર્મ પરિવર્તનની 156 ઘટનાઓ નોંધાઈ

વર્ષ 2019 માં, સિંધ સરકારે હિન્દુ લઘુમતીઓના બળજબરીથી ધર્માંતરણ અને લગ્નને રોકવા માટે એક કાયદો ઘડવાનો પ્રયાસ પણ કર્યો હતો પરંતુ જોરદાર વિરોધ અને પ્રદર્શનોના કારણે કાયદો ન ઘડી શકાયો. પરિણામે આજે પણ ધર્મ બદલો કે મરો એવી પીડાદાયક પ્રક્રિયા ચાલુ છે. તમને જણાવી દઈએ કે, 2013 થી 2019 સુધીમાં ધર્મ પરિવર્તનની 156 ઘટનાઓ નોંધાઈ છે.