અમદાવાદ / SVP પાછળ AMCનો 750 કરોડનો ખર્ચો પણ પીઓપીના ગાબડાં પડે છે

એસવીપી હોસ્પિટલના બી-ર વોર્ડમાં ર ઓગસ્ટે પીઓપીની છત તૂટી પડ્યાની ઘટનાને હોસ્પિટલના સત્તાધીશોએ સામાન્ય ગણાવી હતી. એસવીપી હોસ્પિટલના સીઇઓ રમ્ય ભટ્ટે માત્ર એક ટાઇલ્સ નમી ગઇ હોવાનો દાવો કર્યો હતો. જોકે વિપક્ષ કોંગ્રેસે જાન્યુઆરીમાં લોકાર્પણ થયેલી એસવીપી હોસ્પિટલમાં ઉતાવળે કામ કરાવતા મોટું કૌભાંડ થયું હોઇ તેની રાજ્ય સરકારના તકેદારી આયોગ દ્વારા તપાસ કરાવવાની માગણી કરાઇ હતી. 

હવે એસવીપી હોસ્પિટલની પાછળ આવેલી બે માળની યુટિલિટી હોસ્પિટલના પહેલા માળે એક ડોકટરની ઓફિસની પીઓપી છતના પોપડા ગઇ કાલે બપોરે એકથી બે વચ્ચે અચાનક ખરી પડતાં વહીવટી અધિકારીઓમાં દોડધામ મચી ગઇ હતી. આ યુટિલિટી ઓફિસ બિલ્ડિંગમાં વહીવટી અધિકારીઓ, સીસીટીવી કંટ્રોલ રૂમ, સિક્યોરિટી, ફાયર કંટ્રોલ, વોટર ઓપરેશન જેવા એસવીપી હોસ્પિટલના સંચાલન કરતા વિભાગોની ઓફિસ છે. 

જાણકાર સૂત્રો કહે છે, યુટિલિટી બિલ્ડિંગના પહેલા માળે પ્રવેશ કરતાં વહીવટી અધિકારીઓની ઓફિસ આવેલ છે. આ ઓફિસોની સંલગ્ન એક ડોકટરની ઓફિસ છે જ્યાં ગઇકાલે બપોરે અચાનક પીઓપીની છત ખરી પડતાં ખળભળાટ મચી ગયો હતો. જોકે આ મામલે એસવીપી હોસ્પિટલના સીઇઓ રમ્ય ભટ્ટ સહિતના એક પણ વહીવટી અધિકારીનો સંપર્ક થઇ શકતો નથી.