વિવાદ / કહેવાતા ભણેલા-ગણેલા ડૉક્ટરની આવી હરકતો! UN મહેતા હોસ્પિટલમાં ડૉક્ટર અને મહિલા નર્સો થઈ પરેશાન, મામલો ગૃહવિભાગમાં

• UN મહેતા હોસ્પિટલ ફરી વિવાદમાં
• હોસ્પિટલના સિનિયર તબીબ સામે આરોપ
• અભદ્ર ભાષાનો ઉપયોગ કરતો હોવાનો આરોપ

અમદાવાદમાં યુ.એન.મહેતા હોસ્પિટલ ફરી વિવાદમાં આવી છે. હોસ્પિટલના સિનિયર તબીબ સામે ગંભીર આક્ષેપો લાગતા ખળભળાટ મચી ગયો છે. હોસ્પિટલના નર્સિંગ સ્ટાફ સાથે સિનિયર તબીબ અભદ્ર ભાષાનો ઉપયોગ કરતો હોવાનો આરોપ લાગ્યો છે. આ મામલે મહિલાઓએ હોસ્પિટલમાં સેક્સ્યુઅલ હેરેસમેન્ટ કમિટીને ફરિયાદ કરવાનો પ્રયાસ કર્યો હતો. પરંતુ કમિટીએ ફરિયાદ લેવાની ના પાડતા મહિલાએ પોલીસ કમિશનર અને ગૃહ વિભાગમાં પત્ર લખ્યો છે.  

મહિલાએ નામ લખ્યા વગર કરી લેખિત રજૂઆત
મહિલા સ્ટાફે પત્રમાં સેક્સ્યુઅલ હેરેસમેન્ટનો આરોપ લગાવ્યો છે.  જોકે, નોકરી જવાના ડરે એક મહિલાએ નામ લખ્યા વગર ગૃહ રાજ્યમંત્રી, પોલીસ કમિશનર સહિત ઉચ્ચ કક્ષાએ લેખિત રજૂઆત કરી છે. 

મહિલાએ પત્રમાં લખ્યું છે કે, ડો ચિરાગ દોશી 2013થી હોસ્પિટલમાં કામ કરે છે પણ તેમનું મહિલા કર્મચારીઓ સાથેનું વર્તન ખૂબ જ તોછડાઈ ભર્યુ અને શરમજનક છે. તેઓ છોકરીઓ સાથે ગંદી અને અભદ્ર ભાષામાં વાતો કરે છે. અમુક નર્સિંગ સ્ટાફ સાથે અડપલા કરે છે. આ બાબત બધાને ખબર છે, પરંતુ તો હવે ડિરેક્ટર હોવાથી કોઈ કંઈ બોલી શકતું નથી. 

ખાનગી રાહે તપાસ કરો તો વાસ્તવિકતા બહાર આવશે
પત્રમાં વધુમાં લખવામાં આવ્યુ છે કે, અમારે ત્યાં સેક્સ્યુઅલ હેરસમેન્ટ કમિટી પણ છે, ત્યાં અમુક છોકરીઓ ફરિયાદ કરવા ગઈ તો તેઓએ ફરિયાદ લેવાની ના પાડી દીધી. અમુક નર્સિંગ સ્ટાફ તેમના આ વર્તનથી કંટાળીને રાજીનામું આપવા  ગયા પણ તે પણ નામંજૂર કરવામાં આવ્યં છે. આ સમગ્ર ઘટના સીસીટીવીમાં પણ આપ જોઈ શકો છો અને જો ખાનગી રાહે તપાસ કરો તો વાસ્તવિકતા બહાર આવશે. આથી આપને નમ્ર અપીલ છે કે આ સંદર્ભે મારા જેવી અનેક મહિલા કર્મચારીઓને મદદ કરી ન્યાય અપાવશો.  મહત્વપૂર્ણ છે કે હાલ તો સમગ્ર મામલે વિવાદ થતા હોસ્પિટલ તંત્રએ તમામ આક્ષેપો ફગાવ્યા છે. જોકે આ મહિલા કોણ છે અને તેણે લગાવેલા આરોપો ખૂબ ગંભીર છે, ત્યારે સિનિયર તબીબ સામે થયેલા આક્ષેપમાં આગળ શું કામગીરી થશે તે જોવું રહ્યું.

સળગતા સવાલો
- UN મહેતા હોસ્પિટલના સિનિયર તબીબ સામે આરોપ?
- સિનિયર તબીબ કેમ અભદ્ર ભાષાનો કરે છે ઉપયોગ?
- નર્સિંગ સ્ટાફ સાથે સિનિયર તબીબે કેમ કર્યું અભદ્ર વર્તન?
- તબીબ દ્વારા અભદ્ર ભાષા અને અભદ્ર વર્તન ક્યાં સુધી?
- શું સિનિયર તબીબને ડૉક્ટરની અસ્મિતાની નથી ખબર?
- શું સિનિયર તબીબ મહિલા સ્ટાફ સાથે આવું કરે છે?
- શું હવે હોસ્પિટલોમાં પણ મહિલાઓ સુરક્ષિત નથી?
- ભગવાન ગણાતા તબીબ કેમ બની રહ્યા છે ભક્ષક?
- મહિલા સ્ટાફ એવા તબીબથી પોતાની આબરું બચાવે કે દર્દીઓનો જીવ?
- કેમ તંત્ર દ્વારા એવા તબીબો પર કાર્યવાહી નથી કરાતી?
- કેમ એવા તબીબોની ભરતી કરવામાં આવે છે?