પ્લેન ટ્રેજેડી / VIDEO : અમદાવાદમાં તૂટી પડ્યાં બાદ સળગતાં વિમાનમાંથી બહાર આવીને રમેશ વિશ્વાસ કુમારે કર્યું હેરાનીભર્યું

12 જુને અમદાવાદમાં એર ઈન્ડિયાનું પ્લેન ક્રેશ થયું હતું તેમાં કૂલ 275 પ્રવાસીઓના મોત થયાં છે. એકમાત્ર રમેશ વિશ્વાસ કુમાર નામનો એક યુવાન બચ્યો છે જેનો હવે બીજો એક વીડિયો વાયરલ થયો છે. તૂટી પડ્યાં બાદ સળગતાં વિમાનમાંથી બહાર આવીને રમેશ વિશ્વાસ કુમારે એક હેરાનીભર્યું કામ કર્યું હતું.

હાથમાં મોબાઈલ લઈને સળગતાં વિમાનમાંથી બહાર આવ્યો

અમદાવાદ વિમાન દુર્ઘટનામાં બચી ગયેલા એકમાત્ર વ્યક્તિ રમેશ વિશ્વાસ કુમારનો વધુ એક નવો વીડિયો સામે આવ્યો છે જેમાં તે વિમાન દુર્ઘટના પછી તરત જ અકસ્માત સ્થળ પરથી બહાર નીકળતો જોવા મળે છે. ભયાનક અકસ્માત પછી, રમેશ વિશ્વાસ હાથમાં મોબાઇલ ફોન લઈને ક્રેશ સ્થળ પરથી બહાર નીકળ્યો હતો. 17 સેકન્ડના આ વીડિયોમાં તે બહાર આવતો જોવા મળે છે.

આગમાં ડાબો હાથ બળી ગયો

દૂરદર્શનને આપેલા ઇન્ટરવ્યુમાં, વિશ્વાસ કુમારે અકસ્માતની વિગતો આપી અને કહ્યું કે તેમની સીટ 11-A હતી. સીટ વિમાનના તે ભાગમાં હતી જે ઇમારતના ગ્રાઉન્ડ ફ્લોર સાથે અથડાઈ હતી. ભારતીય મૂળના બ્રિટિશ નાગરિક વિશ્વાસે પછી પોતાનો સીટ બેલ્ટ ખોલ્યો અને વિમાનમાંથી બહાર આવ્યા. તેમણે કહ્યું કે આગને કારણે તેમનો ડાબો હાથ બળી ગયો હતો.

મુસાફરો અને કેબિન ક્રૂ સળગતા જોવા મળ્યા

આ ભયાનક અનુભવ શેર કરતાં તેમણે કહ્યું કે તેમણે ફક્ત મુસાફરો અને ક્રૂ સભ્યોના મૃતદેહો જોયા. આ જોઈને તેઓ ખૂબ જ ડરી ગયા. વિશ્વાસે કહ્યું, 'જે બાજુ હું બેઠો હતો તે હોસ્ટેલ બાજુ નહોતી, તે હોસ્ટેલનો ગ્રાઉન્ડ ફ્લોર હતો. મને બીજા વિશે ખબર નથી, પણ જે બાજુ હું બેઠો હતો તે ગ્રાઉન્ડ ફ્લોર પર હતી. ત્યાં થોડી જગ્યા હતી. મારો દરવાજો તૂટતાની સાથે જ મેં જોયું કે થોડી જગ્યા હતી અને પછી મેં બહાર નીકળવાનો પ્રયાસ કર્યો અને હું બહાર નીકળી ગયો.

વધુ વાંચો : અમદાવાદમાં પ્લેન ક્રેશ બાદ કાટમાળ સામે જોતાં 108ના ડ્રાઈવરને દેખાયું અત્યંત બિહામણું, જોઈને છળી મર્યો

બીજા લોકો કેમ બહાર ન નીકળી શક્યા

વિશ્વાસે કહ્યું, 'બીજી બાજુ ઈમારતની દિવાલ હતી અને વિમાન તે બાજુ સંપૂર્ણપણે તૂટી પડ્યું હતું. કદાચ એટલા માટે જ કોઈ તે બાજુથી બહાર નીકળી શક્યું નહીં. ફક્ત હું જ્યાં હતો ત્યાં જગ્યા હતી. મને ખબર નથી કે હું કેવી રીતે બચી ગયો. જ્યારે આગ લાગી ત્યારે મારો ડાબો હાથ પણ બળી ગયો. પછી મને હોસ્પિટલમાં દાખલ કરવામાં આવ્યો. અહીંના લોકો મારી સાથે સારી રીતે વ્યવહાર કરી રહ્યા છે. અહીંના લોકો ખૂબ સારા છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ