મહામારીમાં લૂંટ / દર્દીનું મોત 11મા દિવસે, સંજીવની હોસ્પિટલે બિલ પકડાવ્યું 16 દિવસનું, VTVએ અહેવાલ રજૂ કરતા ભૂલ સ્વીકારી

• કોરોના કાળમાં હોસ્પિટલો માનવતા મુકી નેવે
• અમદાવાદની સંજીવની હોસ્પિટલને લઇ મોટો ખુલાસો
• ભરત રબારીનું 11મા દિવસે મોત અને બિલ 16 દિવસનું

અમદાવાદની સંજીવની હોસ્પિટલે નિયમ-કાયદા કાનૂનને નેવે મુક્યા છે. કોરોનાથી મોત પામેલા દર્દીના સગા પાસેથી ખોટા પૈસા વસૂલી રહી હોવાનો સંજીવની હોસ્પિટલના તંત્ર પર આક્ષેપ લાગ્યો છે. સંજીવનીમાં દાખલ દર્દીનું 11માં દિવસે મોત નિપજ્યું છે. અને આમ છતાં હોસ્પિટલે 16 દિવસનું બીલ બનાવીને પરિવારને આપ્યું હતું. કોરોના મહામારીમાં બેફામ બની રહેલી હોસ્પિટલ VTV NEWS પર ખુલ્લી પડી ગઈ છે. VTVની ટીમે ઈન્વેસ્ટીગેશન કરીને હોસ્પિટલની લૂંટને છતી કરી દીધી છે. 

અમદાવાદની સંજીવની હોસ્પિટલમાં સારવાર દરમિયાન એક દર્દીનું મોત નિપજ્યું છે. અને હોસ્પિટલમાં દાખલ થયાના 11મા દિવસે દર્દીનું મોત થયું છતા 16 દિવસ વેન્ટીલેટર પર રાખ્યાનો બીલમાં ઉલ્લેખ કર્યો છે. તમામ શરમ કોરાણે મુકીને સંજીવની હોસ્પિટલ અવાસ્તવિક બીલ બનાવી લૂંટે છે. અમદાવાદના રબારી પરિવાર સાથે સંજીવની હોસ્પિટલની લૂંટ છતી થઈ છે. દર્દીના સગાની નિરક્ષરતાનો લાભ લઈને સંજીવની હોસ્પિટલે મનફાવે તેવું બીલ ફટકાર્યું છે. 

કેટલો છે હોસ્પિટલનો એક દિવસનો ચાર્જ

અમદાવાદની સંજીવની હોસ્પિટલમાં 1 દિવસના વેન્ટીલેટરનો ચાર્જ 19,600 વસૂલી રહી છે. અમદાવાદ મહાનગરપાલિકાએ વેન્ટીલેટર પર દર્દી પાસેથી 17500 વસૂલવાનો નિયમ કર્યો છે. જમા કરાવેલા નાણાંનો હિસાબ લેવા ગયા તો હોસ્પિટલે બાકી બીલ બતાવ્યું હતું. માત્ર 11 દિવસ હોસ્પિટલમાં રહ્યાં અને બિલ 4 લાખ 50 હજારનું આવ્યું હતું. દર્દીનું કોરોનાથી મોત થયા પછી હોસ્પિટલની લૂંટ વિશે પરિવારે પોલીસ સ્ટેશનમાં અરજી કરી છે. બાકી નાણાં માટે દર્દીના પરિવારને હોસ્પિટલ દબાણ કરતી હોવાની વાત પોલીસ પાસે પહોંચી છે.