કાર્યવાહી / અમદાવાદીને જાનમાં 400 લોકોને લઈ જવાનું પડ્યું મોંઘુ, તંત્રએ લાલઘૂમ થઇને ફટકાર્યો આટલા હજારનો દંડ

• વલસાડના પારડીમાં જાનૈયાઓને ફટકાર્યો દંડ
• સાંઢપોર ગામે જાનૈયાઓને દંડ ફટકારાયો
• સુરતમાં પણ સામાજિક અંતર નહીં જાળવતા રૂ.5 હજારનો દંડ ફટકાર્યો

પ્રાપ્ત થતી જાણકારી પ્રમાણે, રાજ્ય સરકાર દ્વારા જાહેર કરવામાં આવેલી કોરોનાની ગાઇડલાઇનનો ભંગ કરીને અમદાવાદથી 400 લોકો સાથેની જાન વરરાજા સાથે વલસાડમાં પારડીના સાંઢપોર ખાતે ગઇકાલે પહોંચી હતી. આ અંગે તંત્રને જાણ થતાં કોવિડ સ્પેશિયલ સ્ક્વોર્ડ તાત્કાલિક અસરથી લગ્ન સમારંભમાં આવી પહોંચી હતી અને કોરોનાની ગાઇડલાઇનના ભંગ અંગેની કાર્યવાહી હાથ ધરી હતી.

વલસાડમાં 3 હજારનો દંડ 

ઉલ્લેખનીય છે કે, સરકાર દ્વારા જાહેર કરવામાં આવેલી ગાઇડલાઈનનો ભંગ કરીને વલસાડ પહોંચેલી જાનને જાહેરનામા ભંગ બદલ રૂપિયા 3 હજારોનો દંડ ફટકારવામાં આવ્યો હતો. ત્રણ અલગ અલગ રિસિપ્ટ આપવામાં આવી છે. 

સુરતમાં 5 હજારનો દંડ ફટકારવામાં આવ્યો 

તો આ તરફ સુરતમાં પણ આવી જ એક ઘટના પ્રકાશમાં આવી હતી, સુરત ખાતે આવેલા મોટા વરાછામાં લગ્ન પ્રસંગોમાં સોશિયલ ડિસ્ટન્સિંગના લીરેલીરા ઉડવાની ઘટના બની હતી. જો કે, આ અંગેની જાણ થતાં જ મહાનગરપાલિકાની એક વિશેષ ટીમ તાત્કાલિક અસરથી લગ્ન પ્રસંગમાં પહોંચી હતીને 5 રૂપિયાનો દંડ ફટાકાર્યો હતો. 

ગઇકાલે રાજ્યમાં સૌથી વધુ 1540 કેસ નોંધાયા છે 

રાજ્ય સરકારના આરોગ્ય વિભાગ દ્વારા જાહેર કરવામાં આવેલ કોરોનાના આંકડા પ્રમાણે છેલ્લા 24 કલાક દરમિયાન રાજ્યમાં 1540 કેસ નોંધાયા છે. નોંધનીય છે કે, કોરોના વાયરસના નવા કેસની સામે આજે 1283 દર્દીઓ સાજા થતા કુલ સાજા થયેલા દર્દીઓનો આંકડો 2,01,949 પર પહોંચ્યો છે. આજે 14 દર્દીઓના કોરોનાને કારણે મોત થતાં કુલ મૃત્યુઆંક 3906 પર પહોંચ્યો છે. 

રાજ્યમાં હાલમાં 14287 એક્ટિવ કેસ

ઉલ્લેખનીય છે કે, રાજ્યમાં હાલમાં 14287 એક્ટિવ કેસ છે. રાજ્યમાં રિકવરી રેટ  99.99 ટકા થયો છે. તો ગુજરાતમાં કોરોના વાયરસના ટેસ્ટ વધારવા માટે સતત પ્રયાસ કરવામાં આવી રહ્યો છે ત્યારે રાજ્યમાં આજે કુલ 91,469 નવા ટેસ્ટ કરવામાં આવ્યા છે. જેને લઇને કુલ ટેસ્ટનો આંકડો 7,480,789 પર પહોંચ્યો છે. તો ચિંતાજનક વાત એ પણ છે કે, રાજ્યમાં છેલ્લા 5 દિવસ દરમિયાન 1500થી વધુ કેસ નોંધાયા હતા.