ક્રાઇમ / ગુજરાત આવી રહેલો 300 કિલો ચાંદીનો જથ્થો જપ્ત, રતનપુર બોર્ડર પર લક્ઝરી કારમાં ચાલતા સ્મગલિંગ રેકેટનો પર્દાફાશ

• ગુજરાત આવી રહેલો  300 કિલો ચાંદીનો જથ્થો જપ્ત
• રાજસ્થાનના ડૂંગરપુરમાં 300 કિલો ચાંદી અને 24 લાખ રોકડ જપ્ત
• લાખોની રોકડ અને ચાંદી સાથે 2 તસ્કરો ઝડપાયા 
• રતનપુર બોર્ડર પર લક્ઝરી કારમાં ચાંદીની સ્મગલિંગ રેકેટનો પર્દાફાશ

રતનપુર બોર્ડર પર લક્ઝરી કારમાં ચાંદીની સ્મગલિગના રેકેટનો પર્દાફાશ થયો છે. પોલીસે રાજસ્થાનના ડૂંગરપુરમાંથી પાક્કી બાતમીના આધારે એક શંકાસ્પદ કારને અટકાવી તેની તલાશી લેતા ગુજરાત આવી રહેલ કારમાંથી  300 કિલો ચાંદીનો જથ્થો મળી આવ્યો હતો. આ મામલો ગુજરાત બોર્ડર પર બિછીવાડા પોલીસ સ્ટેશન વિસ્તારના રતનપુરનો છે. જેને લઈને પોલીસ પણ ચોંકી ઉઠી હતી. હાલ રાજસ્થાનના ડૂંગરપુરમા પોલીસે 300 કિલો ચાંદી અને 24 લાખ રોકડ જપ્ત કરી કાર્યવાહી આગળ ધપાવી છે. જ્યારે પોલીસે લાખોની રોકડ અને ચાંદીના જથ્થા સાથે 2 તસ્કરોને દબોચી લીધા છે.

2.50 કરોડની ચાંદી અને રોકડ અંગે IT અને GSTM વિભાગને કરાઇ જાણ
આ કેસ અંગે એસપી કુંદન કવરિયાએ માહિતી આપતા કહ્યું હતું કે લક્ઝરી કારમાં ગેરકાયદે ચાંદીની દાણચોરીની જાણ થતાની સાથે જ બિછીવાડા પોલીસ સ્ટેશનનો સ્ટાફ રતનપુર બોર્ડર પર દોડી ગયો હતો. જ્યા નાકાબંધી કરાઈ હતી. આ વેળાએ એક લક્ઝરી કારને અટકાવી તલાશી લેતા પોલીસને કારમાંથી કંઈ મળ્યું ન હતું. પરંતુ કાર ચાલક અને અન્ય એક આરોપી ગભરાઈ ગયા હતા. 

ચાંદી અને રોકડ ગુજરાતમાં કોને આપવાની હતી તેને લઇને તપાસ 
જેથી પોલીસની શંકા ઘેરી બની જેમાં પોલીસે વધુ તપાસ હાથ ધરતા કારની સીટ નીચે ગુપ્ત કેબિનમાંથી સંતાડેલ પેકેટ મળ્યા હતા. પોલીસે જ્યારે પેકેટ ખોલ્યું ત્યારે તેમાં ચાંદીની સાથે મોટી રોકડ રકમ મળી આવી હતી.આ ચોરખાનામાંથી 300 કિલો ચાંદી જપ્ત કરી છે, વધુમાં રોકડ રકમ પણ મળી આવી હતી. જપ્ત થયેલ ચાંદીની બજાર કિંમત 2 કરોડ 50 લાખ રૂપિયા છે. એટલું જ નહીં પોલીસને રોકડ ગણવા માટે મશીન મંગાવ્યું હતું. અંદાજે 24, 19, 640 રૂપિયાની રોકડ જપ્ત કરવામાં આવી છે. હાલ ચાંદી અને રોકડ કોના કહેવા પર અને ક્યાં લઈ જવાય હતી. તે દિશામાં તપાસ કરવામાં આવી રહી છે. હાલ આરોપી અનીશ પ્રભુદાસ સચૌરા (જામનગર ગુજરાત) અને રમેશ દેવરાજ (રાજકોટ ગુજરાત)ની ધરપકડ કરી જપ્ત કરાયેલી ચાંદી અને રોકડ વિશે જીએસટી અને આવકવેરા વિભાગને પણ જાણ કરાઈ હોવાનું જાણવા મળી રહ્યું છે.