મોટા સમાચાર / 15 માર્ચનાં રોજ યોજાઇ શકે છે યોગી મંત્રીમંડળની શપથવિધિ, PM મોદી-અમિત શાહ પણ રહેશે ઉપસ્થિત

• 15 માર્ચનાં રોજ યોજાઇ શકે છે યોગી મંત્રીમંડળની શપથવિધિ
• PM મોદી-અમિત શાહ પણ રહેશે ઉપસ્થિત
• અધિકારીઓ સાથે યોગીએ યોજી હતી મોટી બેઠક

આ શપથ ગ્રહણ સમારોહ ભવ્યાતિભવ્ય બનવાની આશા સેવાઇ રહી છે. તેમજ આ શપથ ગ્રહણ સમારોહમાં વડાપ્રધાન નરેન્દ્ર મોદી અને ગૃહમંત્રી અમિત શાહ હાજરી આપશે. એ સિવાય અન્ય કેન્દ્રીય મંત્રીઓ અને ભાજપના દિગ્ગજ નેતાઓ પણ યોગી આદિત્યનાથના શપથ ગ્રહણ સમારોહમાં હાજરી આપી શકે છે.

તમને જણાવી દઈએ કે, વિધાનસભા ચૂંટણીના પરિણામો આવ્યાં બાદથી જ યોગી આદિત્યનાથ ફરીથી મુખ્યમંત્રી પદના શપથ લેશે તેવી ચર્ચા ચાલી રહી હતી. શપથ ગ્રહણ સમારોહની તારીખોને લઈને અટકળો પણ ચાલી રહી હતી.

પરિણામો આવતાની સાથે જ યોગી કેબિનેટના શપથ ગ્રહણને લઈને ચર્ચાઓ શરૂ થઈ ગઈ હતી

ઉત્તર પ્રદેશ વિધાનસભા ચૂંટણી 2022 નું પરિણામ આવતાની સાથે જ યોગી કેબિનેટના શપથ ગ્રહણને લઈને ચર્ચાઓ શરૂ થઈ ગઈ હતી. દરેકની જીભ પર એક જ વાત ચાલતી હતી કે યોગી આદિત્યનાથ અન્ય કેબિનેટ સાથીદારો સાથે હોળી પહેલાં અથવા તો હોળી બાદ શપથ ગ્રહણ કરશે. જો કે, હવે એવું કહેવામાં આવી રહ્યું છે કે યોગી આદિત્યનાથ 15 માર્ચે કેબિનેટની સાથે શપથ લઈ શકે છે.

વડાપ્રધાન નરેન્દ્ર મોદી અને અમિત શાહ ઉપરાંત પાર્ટીના અન્ય દિગ્ગજ નેતાઓ પણ આ શપથ ગ્રહણ સમારોહમાં હાજરી આપી શકે છે. ભાજપ શાસિત રાજ્યોના મુખ્યમંત્રીઓ પણ તેનો ભાગ બની શકે છે. ચૂંટણી પંચ દ્વારા જાહેર કરવામાં આવેલા આંકડા મુજબ ભાજપે એકલા હાથે જ 255 બેઠકો જીતી છે. 403 સભ્યોની ઉત્તર પ્રદેશ વિધાનસભામાં સામાન્ય બહુમતિ માટે 202 બેઠકો જરૂરી છે જેને ભાજપે સરળતાથી હાંસલ કરી હતી.

ઉચ્ચ કમાન્ડ કરી રહ્યું છે વિચારણા

પાર્ટી હાઈકમાન્ડ યોગી કેબિનેટને હોળી પહેલાં શપથ ગ્રહણ કરાવવા અંગે વિચારણા કરી રહી છે. મહત્વનું છે કે, હોળી તારીખ 17 અને 18મી માર્ચે છે. ત્યાર બાદ 19 માર્ચનાં રોજ MLC ચૂંટણી માટે નામાંકન ભરવાની છેલ્લી તારીખ છે. આવી સ્થિતિમાં શપથ ગ્રહણ કાર્યક્રમ હોળી પહેલાં યોજાઇ શકે છે. અત્યાર સુધીની વાતચીતમાં હાલ તો 15 માર્ચની તારીખ પર સહમતિ બની છે. જો તેમાં કોઈ મોટો ફેરફાર નહીં થાય તો યોગી કેબિનેટનો શપથ ગ્રહણનો કાર્યક્રમ 15 માર્ચનાં રોજ યોજાઇ શકે છે.

અધિકારીઓ સાથે યોગીએ યોજી હતી મોટી બેઠક

યોગી આદિત્યનાથે મુખ્યમંત્રી આવાસ પર ઉચ્ચ અધિકારીઓ સાથે બેઠક યોજી હતી. જેમાં કહેવામાં આવી રહ્યું છે કે, આ બેઠકમાં શપથ ગ્રહણ સહિત અન્ય મહત્વપૂર્ણ કાર્યક્રમો પર ચર્ચા કરવામાં આવી હતી. જેમાં રાજભવનના અધિકારીઓ પણ હાજર રહ્યાં હતાં. તેમની સિવાય મુખ્ય સચિવ, ACS હોમ સહિત અન્ય અધિકારીઓ પણ મુખ્ય પ્રધાનના નિવાસસ્થાને હાજર હતાં.