ટેકનોલોજી / દિલ્હી હાઈકોર્ટને વ્હોટ્સએપે કહ્યું '..તો અમે છોડી દઇશું ભારત', મામલો બીચક્યો, શું કારણ

દિલ્હી હાઈકોર્ટમાં WhatsApp એ એન્ક્રિપ્શન હટાવવાનો ઇન્કાર કરી દીધો છે. સાથે જ એવું પણ કહેવામાં આવ્યું છે કે જો આવું કરવા પર મજબૂર કરવામાં આવશે, તો કંપની ભારતમાં તેની કામગીરી બંધ કરી દેશે. વાસ્તવમાં, મેટાની કંપનીએ IT નિયમ, 2021ને પડકાર્યો છે. ખાસ વાત એ છે કે ઈન્સ્ટન્ટ મેસેજિંગ એપ WhatsAppના ભારતમાં 40 કરોડથી પણ વધુ યુઝર્સ છે.

કંપનીનું કહેવું છે કે યુઝરની પ્રાઈવસીની એન્ડ-ટુ-એન્ડ એન્ક્રિપ્શન દ્વારા સુરક્ષા કરવામાં આવે છે. આના દ્વારા એ સુનિશ્ચિત કરવામાં આવે છે કે મેસેજ મોકલનાર અને તેને મેળવનાર જ અંદરનો કન્ટેન્ટ જાણી શકે. કંપની તરફથી કોર્ટમાં હાજર રહેલા તેજસ કારિયાએ ડિવિઝન બેંચબે કહ્યું, 'એક પ્લેટફોર્મ તરીકે અમે કહી રહ્યા છીએ કે જો અમને એન્ક્રિપ્શન તોડવાનું કહેવામાં આવશે તો વોટ્સએપ જતું રહેશે.'

અહેવાલ મુજબ, કારિયાનું કહેવું છે કે લોકો પ્રાઈવસી ફીચર્સને કારણે જ વોટ્સએપનો ઉપયોગ કરે છે. કંપની IT રૂલ્સ 2021 ને પડકારી રહી છે, જેમાં મેસેજને ટ્રેસ કરવા અને મેસેજ મોકલનારની ઓળખ કરવાની વાત કરવામાં આવી છે. કંપનીનો તર્ક છે કે આ કાયદાથી એનક્રિપ્શન નબળું થઈ જશે અને ભારતીય બંધારણ હેઠળ યુઝર્સની ગોપનીયતાની સુરક્ષાનું ઉલ્લંઘન થશે.

ખાસ વાત એ છે કે ગયા વર્ષે આયોજિત મેટાનાં એક કાર્યક્રમમાં કંપનીના સીઈઓ માર્ક ઝકરબર્ગે કહ્યું હતું કે, 'ભારત એક એવો દેશ છે જે સૌથી આગળ છે. લોકો અને વ્યવસાયો મેસેજિંગને કેવી રીતે અપનાવે છે તેમાં તમે વિશ્વનું નેતૃત્વ કરી રહ્યાં છો.' વોટ્સએપનું કહેવું છે કે નિયમો કન્ટેન્ટના એન્ક્રિપ્શન અને યુઝર્સની ગોપનીયતાને નબળી પાડે છે.

વધુ વાંચો: CJI ડીવાય ચંદ્રચુડે સુપ્રીમ કોર્ટનો WhatsApp નંબર જાહેર કર્યો, આસાનીથી થશે હવે આ બધા કામ

રિપોર્ટ અનુસાર, કારિયાએ કહ્યું, 'દુનિયામાં ક્યાંય પણ આવો કોઈ નિયમ નથી. બ્રાઝિલમાં પણ નહીં. અમારે એક આખી ચેઈન રાખવી પડશે અને અમને ખબર નથી કે કયા મેસેજને ડિક્રિપ્ટ કરવાનું કહેવામાં આવશે. આનો અર્થ એ છે કે લાખો મેસેજ વર્ષો સુધી સ્ટોર કરીને રાખવા પડશે.'

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો