- ભોપાલમાં ભાજપ કાર્યકરોને પીએમ મોદીનું સંબોધન
- મુસ્લિમ સમાજ વિશે ઘણી મોટી વાતો કરી
- યુનિફોર્મ સિવિલ કોડ લાવવાના આપ્યાં સંકેત
PM મોદીએ મંગળવારે મુસ્લિમ સમાજ વિશે ઘણી મોટી વાતો કહી હતી. ત્રણ તલાકનો ઉલ્લેખ કરતા વડાપ્રધાન મોદીએ એક સમાન નાગરિક સંહિતા (UCC) લાવવાના સંકેત આપ્યા હતા. તેમણે કહ્યું કે મુસ્લિમોને ઉશ્કેરીને તેમને બર્બાદ કરાઈ રહ્યાં છે.
ત્રણ તલાકથી ખાલી દીકરી સાથે જ નહીં આખા પરિવારનું નુકશાન થાય છે
મધ્ય પ્રદેશની રાજધાની ભોપાલમાં ભાજપના 10 લાખથી વધુ કાર્યકર્તાઓની સભાને સંબોધિત કરતાં વડાપ્રધાન નરેન્દ્ર મોદીએ કહ્યું કે જે લોકો ત્રણ તલાકની તરફેણમાં વાત કરે છે, તેની હિમાયત કરનારા, તે વોટબેંકના ભૂખ્યા લોકો મુસ્લિમ દીકરીઓ સાથે મોટો અન્યાય કરી રહ્યા છે." કેટલાક લોકોને લાગે છે કે આ ટ્રિપલ તલાક માત્ર મહિલાઓની જ વાત કરી રહ્યું છે. ટ્રિપલ તલાકથી માત્ર દીકરીઓને જ નુકસાન નથી થતું જો દીકરીને ખૂબ જ માન-સન્માન સાથે સાસરે મોકલવામાં આવે અને 8-10 વર્ષ પછી કોઈ ત્રણ તલાક કહીને તેને હટાવી દે તો પછી જે માતા-પિતાની દીકરી પાછી તેના ઘરે આવે છે તેનું શું થશે? એ ભાઈનું શું થશે, એ ભાઈ-બાપ બધા એ દીકરીની ચિંતામાં ઉદાસ થઈ જાય છે. એટલે ત્રણ તલાકથી દીકરીઓ સાથે અન્યાય થાય છે, એવું નથી. આખો પરિવાર ભાંગી પડ્યો છે.
મુસ્લિમ દીકરીઓને લઈને પીએમ મોદી શું બોલ્યાં
પીએમ મોદીએ પાકિસ્તાન સહિત ઘણા ઈસ્લામિક દેશોના નામ લીધા અને કહ્યું કે ત્યાં ત્રણ તલાકને ખતમ કરી દેવામાં આવ્યા છે. જો તેને ઇસ્લામ સાથે સંબંધ હોય તો તેઓ શા માટે તેનો અંત લાવે? મોદીએ કહ્યું કે પરમ દિવસે હું ઈજિપ્તમાં હતો. 90 ટકા સુન્ની મુસ્લિમ છે. ત્યાં 90 વર્ષ પહેલા ત્રણ તલાકને ખતમ કરી દેવામાં આવ્યો હતો. જો ટ્રિપલ તલાક ઈસ્લામનો અનિવાર્ય ભાગ છે તો પાકિસ્તાનમાં કેમ નહીં, ઈન્ડોનેશિયા, કતાર, જોર્ડન, સીરિયા, બાંગ્લાદેશમાં આ બધા મુસ્લિમ દેશ છે, ત્યાં કેમ પ્રતિબંધ લગાવવામાં આવ્યો? હું માનું છું કે મુસ્લિમ દીકરીઓ પર ત્રણ તલાકની જાળ લટકાવીને કેટલાક લોકો હંમેશા ઇચ્છે છે કે તેઓ તેમના પર અત્યાચાર ગુજારવા માટે મુક્ત હાથે કામ કરે. આ લોકો ત્રણ તલાકનું પણ સમર્થન કરે છે. હું જાણું છું કે એટલે જ મારી મુસ્લિમ બહેનો અને દીકરીઓ, હું જ્યાં પણ જાઉં છું, તેઓ ભાજપ સાથે ઉભા રહે છે. તેઓ મોદીની સાથે ઉભા છે.
પીએમ મોદીએ કરી યુનિફોર્મ સિવિલ કોડની તરફેણ
પીએમ મોદીએ યુનિફોર્મ સિવિલ કોડની તરફેણ કરતા કહ્યું કે, એક પરિવારના બે સભ્યો માટે અલગ અલગ નિયમો કેવી રીતે હોઈ શકે. "ભારતના મુસ્લિમ ભાઈઓ અને બહેનોએ સમજવું પડશે કે કયા રાજકીય પક્ષો તેમને ઉશ્કેરી રહ્યા છે, આજકાલ આપણે જોઈ રહ્યા છીએ કે યુનિફોર્મ સિવિલ કોડના નામે આવા લોકોને ઉશ્કેરવામાં આવી રહ્યા છે. જો ઘરમાં પરિવારના એક સભ્ય માટે એક કાયદો હોય, પરિવારના બીજા સભ્ય માટે બીજો કાયદો હોય, તો શું તે ઘર ચલાવી શકશે? તો પછી દેશ આવી બેવડી સિસ્ટમથી કેવી રીતે ચાલી શકશે? આપણે એ યાદ રાખવાનું છે કે ભારતનું બંધારણ પણ નાગરિકોના સમાન અધિકારોની વાત કરે છે. સુપ્રીમ કોર્ટ આપણને કોમન સિવિલ કોડ લાવવાનું કહે છે.
