જવાબદાર કોણ ? / VIDEO: દરવાજો-બારી...જ્યાં ફાવ્યું ત્યાં લટકી ગયા: સુરતની બસમાં મુંબઈની લોકલ ટ્રેન કરતાં પણ ખરાબ હાલત

• સુરત સિટી બસામાં જોખમી મુસાફરી
• પિયુષ પોઇન્ટ પાસે બસનો વીડિયો આવ્યો સામે
• બસના  દરવાજા પર લટકી જીવના જોખમે મુસાફરી 

શહેરમાં લોકોને ટ્રાન્સપોર્ટેશમાં અગવડતા ન પડે તે માટે તંત્ર દ્વારા ખાસ તકેદારી રાખવામાં આવે છે. સમયસર રૂટ પર બસો દોડાવવામાં આવે છે પરંતુ ઘણીવાર ક્યાંક જનતાની  ભૂલ તો ક્યાંક બસ ચાલકોની બેદરકારીને કારણે મોટી દુર્ઘટના બનતા વાર નથી લાગતી. ત્યારે સુરતમાં એક આવો જ વીડિયો સામે આવ્યો છે જે સ્હેજ પણ ખતરાથી ખાલી નથી..

સુરત સિટીબસમાં જીવના જોખમે મુસાફરી

સુરત સિટી બસમાં લોકો જીવના જોખમે મુસાફરી કરતા હોવાનો વીડિયો સામે આવ્યો છે.  સુરતના પિયુષ પોઇન્ટ પાસેનો આ વીડિયો છે. લોકો દરવાજા પર લટકીને મુસાફરી કરી રહ્યા છે. બસ નંબર 105 અને 305માં લોકો લટકીને મુસાફરી કરતા જોવા મળ્યા. ત્યારે અહીં સવાલ એ થાય કે જો સિટી બસમાં કોઇ દુર્ઘટના થઇ તો જવાબદાર કોણ ? વારંવાર સિટી બસમાં આ પ્રકારે મુસાફરી થતી હોવાના વીડિયો સામે આવે છે પરંતુ પ્રશાસન દ્વારા કોઇ કાર્યવાહી કરવામાં આવતી નથી.

મુંબઇ લોકલ ટ્રેન કરતા પણ બદ્દત્તર સ્થિતિ 

આ દ્રશ્યોમાં જોઇ શકાય છે કે એક બે નહીં પરંતુ પાંચથી પણ વધારે લોકો બસની બહાર જ લટકી રહ્યા છે. કોઇ દરવાજા પાસે તો કોઇ બારી પકડીને. મુંબઇની લોકલ ટ્રેનમાં કચોકચ ભીડ હોય તેવા દ્રશ્યો જોવા મળે છે પંરતુ આ સુરતના આ દ્રશ્યો તો મુંબઇની લોકલ ટ્રેન કરતા પણ ખરાબ કહી શકાય. જો ક્યાંક ડ્રાઇવરે અચાનક બ્રેક મારી કે પછી બાજુમાંથી કોઇ મોટુ વાહન પસાર થયુ તો સ્થિતિ કેવી થાય તેની કલ્પના કરવી મુશ્કેલ બને છે. ત્યારે નાગરિકોને પણ એજ વિનંતી છે કે આ પ્રકારે જીવના જોખમે મુસાફરી ન કરે. એક બસ ન મળી તો બીજી આવશે પરંતુ જિંદગી અમૂલ્ય છે.