ગુજ'રાજ' 2022 / મેહોણામાં કોઈ ગાડી રોકે અને મારુ નામ આપો તો સેલ્યુટ મારીને...: શંકર ચૌધરીનું સ્ફોટક નિવેદન, કાર્યકરો ખુશ

• શંકર ચૌધરીનો વધુ એક વીડિયો સામે આવ્યો
• 'શંકરભાઇને ત્યાંથી આવું છું તેમ કહેશો તો પોલીસવાળા સેલ્યુટ મારી જવા દેશે'

ગુજરાત વિધાનસભાની ચુંટણીને લઇને બનાસકાંઠાની થરાદ બેઠક વધુ એક વખત ચર્ચામાં આવી છે.  આ બેઠક પર બનાસડેરીના ચેરમેન શંકર ચૌધરી ભાજપની ટિકિટે ચુંટણી લડી રહ્યા છે. જે  શંકર ચૌધરીનો આજે સભા દરમિયાનનો એક વિડીયો સામે આવ્યો છે. જેમાં શંકર ચૌધરી વિવાદિત નિવેદન આપતા નજરે પડે છે. જેને લઇને જિલ્લાનું રાજકારણ ગરમાયું છે.

શું બોલ્યા શંકર ચૌધરી ? 
જાહેર સભાને સંબોધતા શંકર ચૌધરીએ કહ્યું હતું કે સાવ નમાલો માણસ નથી. ભાઈબંધી રાખવા જેવો માણસ છું. ભાઈબંધી રાખશો તો અડધી રાતનો હોંકારો થઇશ તેવી પણ ખાતરી આપી હતી. વધુમાં તેમણે કહ્યું કે તમે મહેસાણા કે ક્યાંય પણ જાશો તમારી ગાડી કોઇ પોલીસવાળાઑ રોકે એને પૂછે કે ક્યાંથી આવો તમે થરાદ શંકરભાઇને ત્યાંથી આવું છું. તેમ કહેશો એટલે તે સેલ્યુટ મારીને જવા દેશે. તેવું ગૌરવ મારે તમામ નાગરિકોને અપાવવું છે અને ખાલી મારો ફોટો સ્ટેટસમાં હોય તો પણ કોઈ પોલીસવાળા તમને રોકશે નહી.વાવમાં હું નથી તો પણ નામથી કામ થઇ જાય છે. તેમ હું ના હોય તો પણ કામ થઇ જવા જોઇએ.

મહત્વનું છે કે તાજેતરમાં જ શંકર ચૌધરીએ જાહેરસભામાં જણાવ્યું હતું કે મારા કાર્યકર્તાઓને કોઇ રંજાડશે તો એ મારી સાથે દુશ્મનાવટ કરી છે એવું માનજો. તેવો વીડિયો વાયરલ થયો હતો. નોંધનીય છે કે 22 નવેમ્બરના રોજ થરાદમાં જાહેરસભામાં ગૃહમંત્રી અમિત શાહએ શંકર ચૌધરીને લઈને મોટો સંકેત આપ્યો હતો. જેમાં તેમણે કહ્યું હતું કે  શંકર ચૌધરીને તમે ધારાસભ્ય બનાવો,અમે તેમને મોટું સ્થાન આપીશું. આમ સરકારમાં શંકર ચૌધરીને મોટું સ્થાન આપવા અંગે અમીત શાહે નિવેદન આપ્યું હતું.