VTV વિશેષ / લોક ડાઉન સમયે શહેરના મૂંગા પશુઓના 'તારણહાર' બન્યા આ બે અમદાવાદીઓ; તેમની પ્રવૃત્તિ જાણીને કરશો સલામ

• છેલ્લા થોડા દિવસોમાં તેમણે ભાત, બિસ્કીટ, ફ્રુટ, દૂધ, ડોગ ફૂડ જેવી વસ્તુઓ ૪૦૦થી વધુ કૂતરાઓને, ૫૦ જેટલા વાંદરાઓને અને ઘણી બધી ગાયોને ખવરાવી છે
• શહેરની પોલીસ આ કામમાં તેમને ખૂબ સારો સહયોગ આપે છે 

અમદાવાદના ચિંતન અને દેવયાની કહે છે કે જયારે લોકડાઉન ની જાહેરાત થઇ ત્યારે સૌપ્રથમ તેમને એવી ચિંતા થઇ કે હવે શહેરમાં પ્રાણીઓને ખોરાકની શું વ્યવસ્થા થશે. શહેરમાં ચોક્કસ વિસ્તાર વગર આમ તેમ રખડતા કૂતરા, બિલાડી, ગાયો અને વાંદરાઓને ભોજન કોણ આપશે તે મહત્વનો સવાલ હતો. કારણ કે આ જીવો લોકોએ નાખેલી ચીજવસ્તુઓ અને રેસ્ટોરન્ટ અને સ્ટ્રીટ ફૂડની લારીઓની વધેલી ચીજવસ્તુઓ ઉપર ખાવા અને પાણી પીવા માટે નભે છે.

આ માટે બંનેએ નક્કી કર્યું કે તેઓ દરરોજ બહાર નીકળીને વધુમાં વધુ પ્રાણીઓને ખાવાપીવાનું આપશે. તેઓ કહે છે કે તેઓ કોઈ ઓર્ગેનાઈઝેશનના ભાગ નથી. તેઓ માત્ર બે માણસો છે જેમને કૂતરા ખૂબ વ્હાલા છે અને જીવ દયાને તેઓ ખૂબ મહત્વ આપે છે. આ વિચાર તેમણે તેમના મિત્રોને કહ્યો અને આ માટેનું જરૂરી ફંડ આપવા માટે સૌ કોઈ તૈયાર થઇ ગયા કે જેથી પ્રાણીઓ માટે ખાવાપીવાની ચીજવસ્તુઓ ખરીદી શકાય. 

લોકડાઉન ના બીજા દિવસથી તેમણે તેમની ગાડીમાં આ ખાવા પીવાની ચીજ વસ્તુઓ ઠાંસી દીધી અને તેમણે તેમના વિસ્તારના આશરે ૭૦ કૂતરાઓને ખાવાની ચીજવસ્તુઓ આપવાની શરૂઆત કરી. બીજા દિવસથી તેઓ શહેરના દૂરના વિસ્તારોમાં અને રહેઠાણના વિસ્તારોમાં જવા માંડ્યા અને ત્યાં રહેતા નાના ગલુડિયાઓ, ઘરડા કૂતરાઓ અને ઈજાગ્રસ્ત કૂતરાઓને ખવડાવવાનું શરુ કર્યું. છેલ્લા થોડા દિવસોમાં તેમણે ભાત, બિસ્કીટ, ફ્રુટ, દૂધ, ડોગ ફૂડ જેવી વસ્તુઓ ૪૦૦થી વધુ કૂતરાઓને, ૫૦ જેટલા વાંદરાઓને અને ઘણી બધી ગાયોને ખવરાવી છે. 

તેઓ કહે છે કે કેટલાક લોકોને આ ખૂબ સામાન્ય લાગશે પણ આ અબુધ પ્રાણીઓ જયારે ભોજન કરતા કરતા પૂંછડી પટપટાવવા માંડે છે અને પોતાનો આનંદ અને સંતોષ વ્યક્ત કરે છે ત્યારે ખૂબ સંતોષ મળે છે. પોલીસ મુદ્દે વાત કરતા તેઓ જણાવે છે કે અત્યારે સુધી પોલીસે તેમને ખૂબ સારો સહયોગ આપ્યો છે અને તેમને પ્રેરિત કરીને કહ્યું છે કે એમને ખવરાવવું ખૂબ જરૂરી છે કારણ કે આ સમયમાં તેઓને ખાવાનું આપનાર કોઈ જ નથી. થોડા દિવસ પહેલા એક વિસ્તારમાં ફરી એક વખત ખાવાનું આપવા નીકળેલા ચિંતન અને દેવયાનીને તે વિસ્તારના પોલીસ કર્મચારીએ સસ્મિત હાથ હલાવીને તેમનું અભિવાદન કર્યું હતું. તેઓ કહે છે કે આ ખૂબ ખુશીની ક્ષણ હતી. 

અમદાવાદ શહેર હંમેશા કમનસીબ લોકો અને મૂંગા જાનવરોની વ્યથા માટે દયાભાવના રાખે છે. એક જીવદયા પ્રેમી હોવાને પગલે તેમને ખુશી છે કે શહેરમાં અલગ અલગ વિસ્તારોમાં પ્રાણીઓને ખાવાપીવાની ચીજવસ્તુઓ નાખવા અંગેના વોટ્સએપ ગ્રુપ્સ ચાલે છે. 

આ એક ગૌરવની વાત છે કે જયારે માનવીએ તેના મૂંગા ચોપગા મિત્રોની મદદ કરવાની ઘડી આવી છે ત્યારે અમદાવાદ શહેર તેમાં પાછું હટ્યું નથી. 

આ બંને સમાજને ફક્ત એક જ સંદેશ આપવા માંગે છે: દયાળુ બનો; સમગ્ર વિશ્વને હાલ દયા અને કરુણાની તાતી જરૂર છે.