અરજી / '25 વર્ષે કમાતો નથી, અમને મારે છે', વ્યથા લઈને ગુજરાત હાઇકોર્ટ પહોંચ્યા મા-બાપ, દીકરાએ કહ્યું મારે છોકરી બનવું છે

• ગુજરાત હાઈકોર્ટમાં એક વિચિત્ર કિસ્સો આવ્યો
• દીકરાના વર્તનથી કંટાળીને માતા-પિતાએ કરી અરજી
• 'કમાવાનું કહીએ ત્યારે છોકરી જેવું કરે છે વર્તન'
• કામ ન કરવું પડે એટલે કાઢે છે વિચિત્ર બહાનાઃ માતા

ગુજરાત હાઈકોર્ટમાં એસ.ટીમાં ડ્રાઈવર તરીકેની નોકરી બાદ નિવૃત્ત થયેલા એક વૃદ્ધે દીકરા પાસે ભરણપોષણ માગવા સિનિયર સિટીજન એક્ટની જોગવાઇ હેઠળ અરજી કરી છે. અરજીમાં એવી રજૂઆત કરવામાં આવી છે કે, તેમનો એકનો એક દીકરો છે. જે 25 વર્ષનો થયો છે છતાં હજુ સુધી કમાતો નથી. તેને કમાવા માટે દબાણ કરવામાં આવે તો તે ઘર છોડીને થોડા દિવસ માટે જતો રહે છે અને મારામારી કરે છે. 

નોકરીએ જવાનું કહી તો કરે છે આવી જીદ
અરજીમાં એવું પણ જણાવવામાં આવ્યું છે કે, જ્યારે તેને નોકરી કરવાનું કહીએ ત્યારે તે છોકરીઓ જેવું વર્તન કરે છે. તેમને બીજા કોઈ સંતાન પણ નથી તેથી તેના પર આધાર છે. પિતાએ બે વખત દીકરાને સંબંધીઓને ત્યાં નોકરી અપાવી. પરંતુ તે છોકરી જેવા કપડાપહેરીને નોકરીએ જવાની જીદ કરતા તેની નોકરી છોડાવી દીધી હતી. 

હાઈકોર્ટે દીકરાને માતા-પિતાને સાચવવાની આપી સલાહ
માતા-પિતાની અરજી પર ગુજરાત હાઈકોર્ટમાં સુનાવણી યોજાઈ હતી. સુનાવણી દરમિયાન હાઈકોર્ટે દીકરાને મા-બાપને સાચવવાની સલાહ આપી હતી. આ દરમિયાન દીકરાએ એવી રજૂઆત કરી હતી કે તે જેન્ડર બદલવા માગે છે. તેને છોકરી થવું છે પણ માતા-પિતા માનતા નથી.

તેનો કોઈ બીમારી નથી મેડિકલ તપાસ પણ કરાવી છેઃ માતા 
તો હાઈકોર્ટમાં વૃદ્ધ માતાએ દલીલ કરી હતી કે, તેમનો દીકરો નોકરી કરવા નથી માગતો. તેને કામ કરવું નથી તેથી બહાના કાઢે છે. દીકરાની મેડિકલ તપાસ કરાવી છે તેને કોઈ બીમારી નથી. જેટલી વખત તેને  કોઈ જગ્યાએ કામ પર રખાવ્યો પણ એ કામ મૂકીને આવતો રહે છે.  

હાઈકોર્ટે આપ્યો આ આદેશ
હાઈકોર્ટે એવી ટકોર કરી હતી કે, તેની કોઈ સારા સાઈકોલોજિસ્ટ પાસે સારવાર કરાવો. સાથે જ હાઈકોર્ટે આવા કેસમાં માતા-પિતા અને સંતાન માટે મિડિએશન સેન્ટરનો સહારો લેવા આદેશ કર્યો છે.  આ મામલે આગામી સુનાવણી 1 મહિના બાદ થશે.