દુર્ઘટના / વલસાડ નજીક વંદે ભારત ટ્રેનને ફરી નડ્યો અકસ્માત, બળદ અડફેટે ચડયો, ટ્રેન 20 મિનિટ સુધી રોકવી પડી

• વંદે ભારત ટ્રેનને વધુ એક વખત અકસ્માત નડ્યો
• વલસાડ નજીક બળદ આડે ઉતરતા ટ્રેનનો અકસ્માત
• બળદનું મોતઝ સદનસીબે ટ્રેનના એન્જિન કે કોચને  નુકસાન ન થયું

પાટનગર ગાંધીનગરથી મુંબઈ સુધી દોડતી વંદે ભારત ટ્રેનને વધુ એક વખત અકસ્માત નડ્યો છે. વલસાડ નજીક બળદ આડે ઉતરતા ટ્રેનને અકસ્માત નડ્યો હતો. જેમાં બળદનું મોત થયું છે. જોકે સદનસીબે ટ્રેનના એન્જિન કે કોચને કોઈ નુકસાન થવા પામ્યું નથી. પરંતુ આ દુર્ઘટનાને પગલે ટ્રેનને 20 મિનિટ રોકાવી દેવાની નોબત આવી હતી. ત્યારબાદ બળદને ટ્રેક પરથી હટાવી ટ્રેન આગળ જવા દેવામાં આવી હતી. મહત્વનું છે કે અત્યાર સુધીમાં વલસાડ જિલ્લામાં જ ટ્રેનને ચાર અકસ્માત થયા હોવાનું સામે આવ્યું છે.

બળદ 40 મીટર સુધી ઢસડાયો

વંદે ભારત એક્સપ્રેસ ટ્રેન તેના નિર્ધારીત સમય મુજબ ગાંધીનગરથી મુંબઈ જઈ રહી હતી. આ દરમિયાન વલસાડ રેલવે સ્ટેશનથી દૂર આવેલા લોકોસેડ નજીક ટ્રેક પર એકાએક બળદ આવી ગયો હતો. જેના પરિણામે ટ્રેન બળદ સાથે અથડાઈ હતી અને બળદ 40 મીટર સુધી ઢસડાયો હતો. બાદમાં મહામહેનતે ટ્રેન રોકી લેવામાં સફળતા મળી હતી.

સપ્ટેમ્બર 2022 માં શરૂ કરાઈ છે વંદે ભારત ટ્રેન
આ અકસ્માતની જાણ થતાની સાથે જ વલસાડ રેલવેના કર્મચારીઓ અને આરપીએફનો સ્ટાફ ઘટનાસ્થળે દોડી ગયો હતો. જ્યાં કોચ નીચે ફસાયેલા બળદને બહાર કાઢ્યો હતો. જોકે આ દરમિયાન ગંભીર ઇજાને પગલે બળદનું મોત નિપજયુ હોવાનું સામે આવ્યું હતું. બાદમાં 20 મિનિટ રોકાયા પછી ટ્રેન રવાના કરવામાં આવી હતી. વેસ્ટર્ન રેલવે વિભાગના પી.આર.ઓ પ્રદીપ શર્માએ આ ઘટનાની પુષ્ટિ કરી અને ટ્રેનમાં કોઈ નુકસાન ન થયું હોવાનું જાહેર કર્યું હતું. મહત્વનું છે કે સપ્ટેમ્બર 2022 માં શરૂ કરાયેલ વંદે ભારત ટ્રેનને અનેક વખત અકસ્માત નડી ચુક્યો છે. જેમાં ભેંસ આડી ઉતરવા ઉપરાંત અનેક વખત પશુને લઈને ટ્રેન અકસ્માતગ્રસ્ત બની છે.