તંત્ર જાગો / ભરૂચ-અંકલેશ્વરને જોડતો બ્રિજ બન્યો 'સ્યુસાઇડ પોઇન્ટ': છેલ્લાં 3 વર્ષમાં 25થી 30 લોકોએ લગાવી મોતની છલાંગ, કેટલાંક બચ્યાં તો...

• નર્મદા મૈયા બ્રિજ પર પ્રોટેક્શન વોલ લગાવવા માંગ 
• બ્રિજ પર પ્રોટેક્શન માટે જાળી લગાવવા માંગ 
• વહીવટી તંત્ર ધ્યાન ન આપતા સ્થાનિકોમાં રોષ 

Narmada Maia Bridge : ભરૂચ અને અંકલેશ્વરને જોડતો નર્મદા મૈયા બ્રિજ લોકો માટે સુસાઇડ પોઇન્ટ બન્યો હોવાની સ્થિતિ બની છે. વાત જાણે એમ છે કે, આ નર્મદા મૈયા બ્રિજ પરથી છેલ્લા 20 દિવસમાં ચાર જેટલા લોકોએ પડતું મૂક્યું હોવાની ઘટના સામે આવી છે. જેમાં એક યુવતીનો સ્થાનિક માછીમારો અને સ્મશાન સંચાલક ધર્મેશ સોલંકી દ્વારા બચાવ કરવામાં આવ્યો હતો. જોકે 4 લોકો પૈકી હજુ પણ 2 લોકોના મૃતદેહ હજી સુધી મળ્યા નથી.

ભરૂચ અને અંકલેશ્વરને જોડતો નર્મદા મૈયા બ્રિજ 2021 માં લોકોની અવરજવર માટે ખુલ્લો મુકવામાં આવ્યો હતો. 2021થી લઈને 2023 સુધીમાં આ બ્રિજ ઉપરથી 25 થી 30 જેટલા લોકોએ નર્મદા નદીમાં છલાંગ લગાવીને મોતને વહાલું કર્યું હતું. જેમાં કેટલાક લોકોના જીવ ગયા હતા અને કેટલાક લોકોનો બચાવ પણ થયો હતો જ્યારે કેટલાક લોકોની હજી સુધી ડેડબોડી પણ મળી નથી. 

શું કહેવું છે સ્મશાન સંચાલકનું ? 
સ્થાનિક સ્મશાન સંચાલક ધર્મેશભાઈના જણાવ્યા મુજબ 2021થી લઈને 2023 સુધીમાં 25 થી 30 જેટલા લોકોએ નર્મદા મૈયા બ્રિજ ઉપરથી નર્મદા નદીમાં પડતું મૂક્યું હતું. જેમાં કેટલાક કિસ્સાઓ તો ધર્મેશભાઈ સોલંકી એ પોતાની નજરે જોયા હતા. જ્યારે જ્યારે આવી ઘટના બનતી હોય છે ત્યારે ધર્મેશભાઈ સોલંકી અને સ્થાનિક માછીમારો દ્વારા નર્મદા નદીમાં લોકો દ્વારા મોતની છલાંગ લગાવી હતી. સ્થાનિક અને માછીમારોની સુજના લીધે આઠથી નવ લોકોના જીવ બચાવવામાં આવ્યા હતા.

ધર્મેશ સોલંકીના જણાવ્યા અનુસાર જ્યારે જ્યારે પણ લોકો નર્મદા મૈયા બ્રિજ ઉપરથી પડતું મૂકે છે ત્યારે ખાસ કરીને પ્રેમમાં નાસી પાસ થયેલ યુવક યુવતીઓ, ઘર કંકાસને લઈને મહિલાઓ અને પુરુષો અને બેરોજગારીને લઈને યુવકો દ્વારા નર્મદા મૈયા બ્રિજ ઉપર આવીને મોતનો કૂદકો લગાવી સુસાઇડ કરતા હોય છે.

પ્રોટેક્શન નેટની માંગ પણ તંત્ર ઘોર નિંદ્રામાં 
આ ઘટનાઓ નજરે જોનાર ધર્મેશ સોલંકી દ્વારા અવારનવાર મીડિયામાં સ્થાનિક તંત્રમાં માંગ કરી હતી કે, નર્મદા મૈયા બ્રિજની બંને તરફ પ્રોટેક્શન નેટ લગાવવામાં આવે તો સુસાઇડ કરનારા લોકોના જીવ બચાવી શકાય છે અને તેઓને ફરીથી હિંમત આપીને જીવન જીવતા શીખાવી શકાય છે. પરંતુ આજ દિન સુધી ભરૂચ જિલ્લા વહીવટી તંત્ર દ્વારા બ્રિજની બંને તરફ પ્રોટેક્શન નેટ લગાવવામાં આવી નથી.