છેતરપિંડી / સુરતમાં ભાજપના ધારાસભ્યને બદનામ કરવા ભેસ્તાનના હાર્દિક પટેલે કર્યું આ મોટું કૌભાંડ

• ધારાસભ્યના નામે કરોડો રૂપિયાનું કરાયું ઉઘરાણું
• ભેસ્તાનના હાર્દિક પટેલ નામના યુવક નું પરાક્રમ
• ઓલપાડના ધારાસભ્ય છે મુકેશ પટેલ
• આશરે 10 કરોડથી વધુ રૂપિયા ઉઘરાવ્યા હોવાની વાત

સુરત જિલ્લાના ઓલપાડ અને ચોર્યાસી તાલુકામાં ઝીંગા તળાવનો મસમોટો વેપલો ચાલી રહ્યો છે. અહીં કાયદેસર અને ગેરકાયદેસર એમ બંને પ્રકારના તળાવો આવેલા છે. ઝીંગા તળાવની ખેતીમાં લાખો-કરોડો રૂપિયા એક જ પાકમાં મેળવી શકાય એમ હોવાથી ઝીંગા ફાર્મરો દેવું કરીને પણ આ ધંધામાં ઝંપલાવતા આવ્યા છે. જોકે, ઓલપાડમાં ઝીંગા તળાવની મંજૂરીની આડમાં મસમોટુ કૌભાંડ આચરવામાં આવ્યું હોવાનું સામે આવ્યું છે. ઝીંગા તળાવની મંજૂરી આપવાના બહાને લોકો પાસેથી કરોડો રૂપિયા ઉઘરાવી ચિટિંગ કરાયું છે. ઝીંગા ફાર્મર સંદીપ પટેલની ફરિયાદ બાદ સમગ્ર મામલો બહાર આવ્યો છે.

માત્ર મોર કે તેના ગામના જ નહીં પરંતુ ઓલપાડ અને ચોર્યાસી તાલુકામાં અસંખ્ય લોકો આરોપી હાર્દિકની વાતમાં આવીને ભોગ બન્યા હોવાનું બહાર આવ્યું છે. બે-પાંચ લાખ નહીં પરંતુ આશરે 10થી 12 કરોડ જેટલી માતબર રકમનું ઉઘરાણું કરાયું હોવાનું ખુદ ધારાસભ્ય મુકેશ પટેલનું કહેવું છે. એટલું જ નહીં પરંતુ આ પ્રકરણ જ્યારે બહાર આવ્યું ત્યારે ધારાસભ્ય મુકેશ પટેલ પણ ચોંકી ઉઠ્યા હતા. કારસ્તાન કરનાર હાર્દીક પટેલ ભાજપનો જ કાર્યકર હોવાનું પણ સામે આવ્યું છે.

ફરિયાદી સંદીપ જેવા અનેક યુવાનો હાર્દિકનો ભોગ બન્યા છે. સમગ્ર મામલે હાલ તો ઓલપાડ પોલીસે છેતરપિંડીનો ગુનો નોંધી ભેસ્તાન વિસ્તારમાં રહેતો હાર્દિક પટેલને જેલ હવાલે કરી વધુ તપાસ હાથ ધરી છે.