કોરોના સંકટ / ગુજરાતમાં કોરોનાના કેસ વધતા હવે 23 નવેમ્બરથી નહીં ખુલે શાળા-કોલેજો, આગામી સમયમાં નવી તારીખ જાહેર કરાશે

• આગામી 23 નવેમ્બરે નહીં ખુલે શાળા-કોલેજો
• કોરોનાની પ્રવર્તમાન પરિસ્થિતિને કારણે રાજ્ય સરકારે નિર્ણય હાલ પૂરતો મોકૂફ રાખ્યો
• ધો 9થી 12 અને કોલેજો શરૂ કરવાનો લેવાયો હતો નિર્ણય

અગાઉ સરકારે જાહેરાત કરી હતી કે 23 નવેમ્બરથી શાળા-કોલેજો ધારા-ધોરણ અને નિયમો સાથે ખોલવી. પરંતુ દિવાળી બાદ થયેલા કોરોના વિસ્ફોટ અને અન્ય રાજ્યોમાં વિદ્યાર્થીઓમાં કોરોના ફેલાવાના કેસો સામે આવતા જ માહોલ ચિંતાજનક બન્યો છે. જે વાલીઓની ચિંતાનું પણ કારણ બન્યું છે. ત્યારે હવે રાજ્ય સરકાર દ્વારા ગુજરાતમાં આગામી તારીખ 23 નવેમ્બરથી શાળા-કોલેજ શરૂ કરવાના નિર્ણયને કોરોનાની પરિસ્થિતિને કારણે હાલ પૂરતો મોકૂફ રાખવામાં આવ્યો છે. આગામી સમયમાં રાજ્ય સરકાર નવી તારીખ જાહેર કરશે.

VTV Newsના કાર્યક્રમ મહામંથનમાં કરાયેલી રજૂઆતને રાજ્ય સરકારે માન્ય રાખી છે. મહત્વનું છે કે, રાજ્યમાં કોરોનાના કેસ વધી રહ્યા છે જેને લઇને વાલીઓમાં ચિંતાનો માહોલ સર્જાયો હતો. સુરત વાલી મંડળ દ્વારા શાળા ખોલવાના સરકારના નિર્ણયનો વિરોધ કરાયો હતો. તો રાજ્યમાં અનેક જગ્યાએ વાલીઓ પોતાના સંતાનને આ પરિસ્થિતિમાં શાળાએ મોકલવા માટે તૈયાર ન હતા.

શિક્ષણમંત્રી સાથેની બેઠકમાં આ મુદ્દાઓ પર થઇ ચર્ચા

મહત્વનું છે કે, ગાંધીનગરમાં શિક્ષણમંત્રીની DEO સાથે બેઠકમાં શાળા ખોલવા સહિત શિક્ષણ લગતા વહીવટી મુદ્દાઓ, શિક્ષકોની વધ ઘટ કરવા બાબત, શિક્ષકોના બદલી કેમ્પ મુદ્દે, TPEOના પ્રમોશન મામલો, આધાર એંરોલમેન્ટ અપડેશનનો મુદ્દો અને હાઇકોર્ટમાં પડતર કેસો બાબતે ચર્ચા કરવામાં આવી હતી.