આસ્થા / સપ્તાહમાં કયા દિવસે કયા દેવતાની પૂજા કરવાથી થાય છે ભાગ્યોદય? શુભફળની પ્રાપ્તિ માટે કરો આ કામ

• હિંદુ ધર્મમાં સપ્તાહ અનુસાર પૂજાનું વિશેષ મહત્ત્વ
• સપ્તાહના તમામ દિવસ અલગ અલગ દેવી દેવતાને સમર્પિત
• દિવસ અનુસાર અલગ અલગ દેવતાની કરો પૂજા

હિંદુ ધર્મમાં સપ્તાહ અનુસાર પૂજાનું વિશેષ મહત્ત્વ છે. સપ્તાહના તમામ દિવસ અલગ અલગ દેવી દેવતાને સમર્પિત છે. માનવામાં આવે છે કે, વાર અનુસાર ભગવાનની પજા કરવાથી નવગ્રહની શુભતા પ્રાપ્ત થાય છે અને શીઘ્ર ફળપ્રાપ્તિ થાય છે. કયા દિવસે કયા દેવી દેવતાની પૂજા કરવી જોઈએ, તે અંગે અહીંયા જણાવવામાં આવ્યું છે. 

સપ્તાહના અલગ અલગ દેવતા
સોમવાર- સોમવારનો દિવસ ભગવાન ભોળેનાથને સમર્પિત છે, આ દિવસે ચંદ્રમાની પૂજા કરવામાં આવે છે. કુંડળીમાં ચંદ્ર મજબૂત હોય તો પારાવિરક જીવન સુખમયી રહે છે. સોમવારે શિવલિંગ પર જળાભિષેક કરવો જોઈએ, જેથી માનસિક તણાવ દૂર થાય છે અને તમામ મનોકામના પૂર્ણ થાય છે. 

મંગળવાર- મંગળવારે હનુમાનજી અને મંગળ ગ્રહની પૂજા કરવામાં આવે છે. મંગળવારે હનુમાનજીને ચોલા અર્પણ કરવાથી અને વ્રત કરવાથી તમામ મુશ્કેલીઓ દૂર થાય છે અને દુશ્મનો સામે વિજય પ્રાપ્ત થાય છે. ઉપરાંત કુંડળીમાંથી માંગલિક દોષ દૂર થાય છે. 

બુધવાર- બુધવારે ભગવાન ગણેશ અને બુધ ગ્રહની પૂજા કરવામાં આવે છે. બુધવારે ગણપતિ બાપ્પાને દુર્વા અર્પણ કરવી જોઈએ, જેથી ભગવાન ગણેશની વિશેષ કૃપા રહે છે. બુધવારે મગની દાળનું દાન કરવાથી બુધ ગ્રહ મજબૂત થાય છે. ઉપરાંત વિદ્યા અને બુદ્ધિમાં વૃદ્ધિ થાય છે તથા શુભ કાર્યમાં કોઈ અડચણ આવતી નથી. 

ગુરુવાર- ગુરુવાર ભગવાન વિષ્ણુ અને ગુરુદેવને સમર્પિત છે. ગુરુવારે પીળી વસ્તુ (કેળા, કેસર અને ચણાની દાળ)નું દાન કરવાથી વૈવાહિક જીવન સુખમયી રહે છે. નોકરી તથા લગ્નમાં અડચણ આવી રહી છે, તો ગુરુવારે ઉપવાસ જરૂરથી કરવો જોઈએ. 

શુક્રવાર- શુક્રવારનો દિવસ લક્ષ્મી માતા અને શુક્ર દેવને સમર્પિત છે. શુક્રવારે પૂજા કરવાથી ધન-ધાન્ય અને સુખ-સુવિધામાં વૃદ્ધિ થાય છે. ઉપરાંત સુંદરતા, ઐશ્વર્ય અને કીર્તિ પ્રાપ્ત થાય છે. 

શનિવાર- શનિવાર શનિદેવને સમર્પિત છે. શનિવારે શનિદેવની પૂજા કરવાથી અને કાળા તલ તથા તેલ અર્પણ કરવાથી શનિ સાઢેસાતી અને શનિઢૈય્યા દૂર થાય છે. ઉપરાંત શનિદેવ કર્મ અનુસાર ફળ પ્રદાન કરે છે. 

રવિવાર- સૂર્યદેવતાની પૂજા માટે રવિવારને ખાસ માનવામાં આવે છે. નિયમિતરૂપે સૂર્યદેવતાને અર્ધ્ય અર્પણ કરવાથી માન-સમ્માન, સાહસ અને ઊર્જામાં વૃદ્ધિ થાય છે. તાંબાના કળશમાં જળ, ફૂલ અને અક્ષત નાખીને સૂર્યદેવતાને અર્ધ્ય અર્પણ કરવું જોઈએ.