પ્રધાનમંત્રી નરેન્દ્ર મોદી ગુજરાતના એક દિવસના પ્રવાસે આવ્યા છે. પીએમ મોદીએ સુરતમાં એક જનસભાને સંબોધિત કરી હતી. જ્યાં તેમણે દાવો કર્યો હતો કે કેટલાંક વર્ષોમાં સુરત ભારતનું સૌથી વધુ ઝડપથી વિકાસ કરનારું શહેર બની જશે. પોતાના ભાષણ દરમ્યાન કંઈક એવું બન્યું કે જેનાથી સૌ કોઈ પરેશાન થઈ ગયું. પીએમ મોદી જ્યારે સ્પીચ આપી રહ્યાં હતાં ત્યારે એ જ વખતે એક કેમેરામેન બેહોશ થઈને પડી ગયો હતો. પીએમ મોદીએ સ્પીચ રોકી દીધી અને અધિકારીઓને જલ્દીથી ઍમ્બ્યુલન્સ બોલાવવા માટે કહ્યું હતું. થોડાં જ સમયમાં 108 ઍમ્બ્યુલન્સ આવી ગઈ હતી. ત્યાર બાદ તેને હોસ્પિટલ લઈ જવામાં આવ્યો હતો.
જો કે એવું પણ કહેવામાં આવી રહ્યું છે કે આ ઘટના દરમ્યાન જ્યાં કેમેરામેન બેહોશ થયો હતો ત્યાંથી ઍમ્બ્યુલન્સ જે ગેટ પર આવી હતી તેના વચ્ચેનું અંતર લગભગ 1 કિમી હતું. સુરક્ષાકર્મીઓએ સુરક્ષાને ધ્યાનમાં રાખીને ઍમ્બ્યુલન્સ અંદર આવવા દીધી ન હતી.
કોંગ્રેસ પર કર્યા હતા પ્રહાર
ઉલ્લેખનીય છે કે પ્રધાનમંત્રી નરેન્દ્ર મોદીએ લોકોને સંબોધતા કહ્યું હતું કે બહુમતની સરકાર હિંમત સાથે કઠોર નિર્ણય લેવા માટે સક્ષમ છે. મોદીએ દેશની જનતાને ઇશારામાં સમજાવી દીધું છે કે આવનાર લોકસભા ચૂંટણીમાં લોકો બહુમતની સરકાર બનાવે. આ માટે લોકો તેમની પાર્ટીને મત આપે. મોદીએ મંચ પરથી એક એક મતોનો શું મૂલ્ય હોઈ શકે છે અને બહુમતીની સરકાર કેટલી મહત્વપૂર્ણ હોય છે તે સમજાવવાનો પ્રયાસ કર્યો હતો.
સુરત એરપોર્ટ પર નવા ટર્મિનલનાં ખાતમુહૂર્ત માટે આવેલા વડાપ્રધાન નરેન્દ્ર મોદીએ લોકસભા ચૂંટણીનાં યુદ્ધ માટે જાણે તૈયાર હોય એવું લાગી રહ્યું હતું. વડાપ્રધાન મોદીએ નામ લીધા વિના કોંગ્રેસ અને મહાગઠબંધન ઉપર નિશાન સાધ્યું હતું. કોંગ્રેસની કાર્યપ્રણાલી પર પ્રશ્ન ઉઠાવતા કહ્યું હતું કે જેટલું હું કામ કરૂં છું તેટલું કામ તેઓને કરવું હોત તો 25 વર્ષ લાગી ગયાં હોત. અમારામાં દમ છે કે ગરીબ અને મધ્યમ વર્ગનાં લોકોની ચિંતા કરીએ છીએ. અત્યાર સુધી ગમે તેટલી સરકારો આવી પરંતુ તેઓએ ગરીબોની ચિંતા કરી નથી. વડાપ્રધાને તેમની સરકારમાં થયેલ સાડા ચાર વર્ષમાં થયેલ કામોનો હિસાબ આપીને માધ્યમ વર્ગ માટે થયેલ કામો ગણાવ્યાં હતાં.
