કડક વલણ / રાજકીય પક્ષોને કેટલું મળ્યું ચૂંટણી ફંડ? નહીં જાણી શકાય, કેન્દ્ર સરકારે સુપ્રીમમાં શું જાહેર કર્યું?

• રાજકીય પાર્ટીઓના ફંડના સોર્સને લઈને કેન્દ્રનું કડક વલણ
• લોકોને ફંડના સોર્સ જાણવાનો અધિકાર નથી
• સુપ્રીમ કોર્ટને કરી દીધી જાણ 

રાજકીય પાર્ટીઓના ફંડના સોર્સને લઈને કેન્દ્રનું કડક વલણ સામે આવ્યું છે. કેન્દ્ર સરકારે સુપ્રીમ કોર્ટને તેની જાણ કરી દીધી છે. કેન્દ્રના વકીલ એવા એટર્ની જનરલ આર.વેંકટરામનીએ સોમવારે સુપ્રીમ કોર્ટને જણાવ્યું હતું કે રાજકીય પાર્ટીઓના ફંડનો સોર્સ જાણવાનો લોકોને અધિકાર નથી. તેમણે કહ્યું કે ચૂંટણી બોન્ડ યોજના હેઠળ મળેલા ભંડોળના સ્ત્રોત વિશે જણાવવું યોગ્ય રહેશે નહીં. બંધારણની કલમ 19(1)(એ) હેઠળ લોકોને આ અંગે માહિતી મેળવવાનો અધિકાર નથી. સુપ્રિમ કોર્ટમાં દાખલ કરવામાં આવેલી પોતાની અરજીમાં વેંકટરામાણીએ કહ્યું હતું કે જ્યાં સુધી વાજબી પ્રતિબંધની સ્થિતિ ન હોય ત્યાં સુધી "કંઈપણ અને દરેક વસ્તુ" વિશે જાણવાનો અધિકાર ન હોઈ શકે. 

ચૂંટણી ફંડ આપનારની પ્રાઈવેસી જરુરી-કેન્દ્ર 
એટોર્ની જનરલે સુપ્રીમ કોર્ટને કહ્યું, "જે યોજના વિશે વાત કરવામાં આવી રહી છે તે ફાળો આપનારને પ્રાઈવેસીનો લાભ આપે છે. તે સુનિશ્ચિત કરે છે અને પ્રોત્સાહિત કરે છે કે ત્યાં જે પણ યોગદાન છે, તે કાળું નાણું નથી. તે કરની જવાબદારીઓનું પાલન સુનિશ્ચિત કરે છે. આ રીતે, તે કોઈ પણ વર્તમાન સત્તાનો સંઘર્ષ પેદા કરતું નથી. 

કઈ પાર્ટીઓને કેટલું મળ્યું ચૂંટણી ફંડ- લોકો નહીં જાણી શકે
રાજકીય પક્ષોને મળેલા ચૂંટણી ફંડ કે દાનની વિગતો લોકો સુધી પહોંચે તે કેન્દ્ર સરકાર નથી ઈચ્છતું. કેન્દ્રના આ વિચાર બાદ લોકોને ચૂંટણી ફંડનો સોર્સ ન પણ જાણવા મળી શકે. 

31 ઓક્ટોબરથી સુપ્રીમમાં સુનાવણી 
સુપ્રીમ કોર્ટની પાંચ જજોની બંધારણીય બેન્ચ પક્ષો માટે રાજકીય ભંડોળ માટે ચૂંટણી બોન્ડ યોજનાની માન્યતાને પડકારતી અરજીઓની બેચ પર 31 ઓક્ટોબરથી સુનાવણી શરૂ કરવાની છે જેમાં કોંગ્રેસ નેતા જયા ઠાકુર અને સીપીઆઈ (એમ) દ્વારા દાખલ કરવામાં આવેલી અરજીઓનો પણ સમાવેશ થાય છે. સુપ્રીમ કોર્ટે 2018 ની ચૂંટણી બોન્ડ યોજના પર વચગાળાનો સ્ટે આપવાનો ઇનકાર કર્યો હતો. વળી, આ યોજના પર પ્રતિબંધ લગાવવાની માંગ કરતી એનજીઓની અરજી પર કેન્દ્ર સરકાર અને ચૂંટણી પંચ પાસે જવાબ માંગવામાં આવ્યો હતો.