અંબાજી વિવાદ / 'સાબર ડેરીના ખાલી ડબ્બામાં અન્ય ઘી ઠાલવવાનું કાવતરું કરાયું, અમારા દ્વારા કોઇ જ ઘીનું વેચાણ નથી થયું', M.D સુભાષ પટેલનું નિવેદન

• અંબાજી મંદિરમાં પ્રસાદમાં નકલી ઘી નો મામલો
• સાબર ડેરીનાં M.D સુભાષ પટેલનું નિવેદન
• સાબર ડેરી દ્વારા કોઈ પણ પ્રકારના ઘીનું વેચાણ નથી થયું: સુભાષ પટેલ

અંબાજી મંદિરમાં પ્રસાદમાં નકલી ઘી મુદ્દે સાબર ડેરીનાં એમડી સુભાષ પટેલે નિવેદન આપ્યું છે કે, સાબર ડેરી દ્વારા કોઈ પણ પ્રકારનાં ઘી નું વેચાણ થયું નથી. તેમજ સાબર ડેરીનાં ખાલી ડબ્બામાં અન્ય ઘી ઠાલવવાનું કાવતરૂ છે. સાબર અને અમુલ ડેરીને બદનામ કરવાની કોશિષ છે. લોકોનાં સ્વાસ્થ્ય સાથે ચેડા કરનારને છોડવામાં નહી આવે તેમજ અંબાજીમાં મોહિની કેટરર્સનાં સંચાલક સામે ફરિયાદ કરી છે.  આ મામલે જરૂર જણાશે તો કોર્ટમાં જઈશું. 

શું છે સમગ્ર મામલો
દર વર્ષની જેમ આ વર્ષે પણ અંબાજી ખાતે તા. 23 થી 29 સપ્ટેમ્બર 2023 સુધી ભાદરવી પૂનમનાં મહામેળો યોજાયો હતો. ત્યારે  આ મેળામાં લાખો શ્રદ્ધાળુઓએ મા અંબાનાં દર્શન કરી મહાપ્રસાદનો લાભ લીધો હતો. ત્યારે મેળા દરમિયાન પ્રસાદની માંગને પહોંચી વળવા એજન્સી દ્વારા ઘી નો સ્ટોક કરવામાં આવ્યો હતો.  જે ઘી શંકાસ્પદ લાગતા ફ્રુડ એન્ડ ડ્રગ્સ ડિપાર્ટમેન્ટ દ્વારા ઘી નાં સેમ્પલ લઈ તપાસ અર્થે મોકલ્યા હતા. જે ઘી નાં સેમ્પલનો  રિપોર્ટ ફેલ આવતા ફ્રુડ એન્ડ ડ્રગ્સ ડિપાર્ટમેન્ટે તપાસનો ધમધમાટ શરૂ કર્યો હતો.  ઘી નાં સેમ્પલ ફેલ થતા બનાસ ડેરીમાંથી ઘી લાવીને તેનો પ્રસાદમાં ઉપયોગ થયો હતો. 

નીલકંઠ ટ્રેડર્સને સીલ મારવામાં આવ્યું
મોહિની એજન્સીએ નીલકંઠ ટ્રેડર્સમાંથી ઘી ખરીદેલું હોવાનું જાણવા મળતા કાર્યવાહીનો ધમધમાટ શરૂ થયો છે. માધુપુરા વિસ્તારમાં આવેલી નીલકંઠ ટ્રેડર્સને સીલ મારવામાં આવ્યુ છે. AMC અને ગાંધીનગરથી આવેલ ઉચ્ચ આધિકરિઓ તપાસ હાથ ધરી હતી. જે બાદ આ દુકાન સીલ કરવામાં આવી છે. જે સીલ સાથે એક ખાસ નોટિસ પણ લગાવવામાં આવી છે.  

મોહનથાળના પ્રસાદ મુદ્દે કલેકટરનું નિવેદન 
અંબાજી મંદિરનાં પ્રસાદ માટેનાં ઘી નાં સેમ્પલ ફેલ થયા બાદ મહત્વનો નિર્ણય કરવામાં આવ્યો છે.  જેમાં અંબાજી મંદિરની ટીમ દ્વારા જ મોહનથાળ બનાવવાનું કામ શરૂ કરાશે. મોહિની કેટરર્સને પ્રસાદ ઘરથી દૂર રહેવા આદેશ કરવામાં આવ્યો છે. તેમજ આ બાબતે કલેક્ટરે વધુમાં જણાવ્યું હતું કે, હાલમાં કોઈ એજન્સીના કામ સોંપાયું નથી. મેળા દરમિયાન ભક્તોને શુદ્ધ ઘી નો પારસાદ અપાયો છે. જે ઘી નાં સેમ્પલ લેવાયા હતા. તે ઘી પ્રસાદમાં વપરાયું નથી. બનાસ ડેરીનાં ઘી દ્વારા બનાવેલો પ્રસાદ ભક્તોને અપાયો હતો.