દેશ / અમુક સૂટ સિવડાવીને બેઠા હતા કે મંત્રી બનીશું પણ...: હસતાં હસતાં ભાજપની જ સરકાર વિશે આ શું બોલ્યા નીતિન ગડકરી?

• નીતિન ગડકરીએ પોતાની જ સરકારનો બનાવ્યો મજાક
• શિંદે સરકારમાં મંત્રી બનવા ઈચ્છુક મંત્રીઓ પર કટાક્ષ
• હસતાં હસતાં કહ્યું કે સૂટબૂટ પહેરેલા રહી ગયાં..

કેન્દ્રીય મંત્રી નીતિન ગડકરીને ભારતનાં હાઈવેમેન તરીકે તો લોકો ઓળખે જ છે પરંતુ તે પોતાના બેધડક-નિડર નિવેદનો માટે પણ લોકપ્રિયતા ધરાવે છે. હાલમાં નાગપુરમાં તેમણે મહારાષ્ટ્રની પોલિટિક્સ પર રોમાંચક નિવેદન આપ્યું જે સાંભળીને લોકો ખળખળાટ હસવા માંડ્યા.

'લોકો દુ:ખનાં મહાસાગરમાં ડુબેલા છે'
ગડકરીએ મરાઠીમાં કહ્યું કે આપણાં દેશનાં લોકો દુ:ખનાં મહાસાગરમાં ડુબેલા છે. ધારાસભ્ય ન બનવાને લીધે નગરસેવક દુ:ખી છે, મંત્રી ન બનવાને લીધે ધારાસભ્ય દુ:ખી છે, સારો ડિપાર્ટમેન્ટ ન મળવાને લીધે મંત્રી દુ:ખી છે. જે મળ્યું તેમા સંતોષ માની લેવું જોઈએ. મંત્રી બનવાનાં ઈચ્છુક હવે ચૂકી ગયેલી તકથી દુ:ખી છે.  

'સૂટબૂટ પહેરેલા રહી ગયાં'
તેમણે એ નેતાઓ પર કટાક્ષ કર્યો કે જેઓ મહારાષ્ટ્ર શિંદે સરકારમાં મંત્રી બનવા ઈચ્છુક છે. તેમણે કહ્યું કે, 'તમામ ઈચ્છુક પહેલા સૂટબૂટ બનાવીને તૈયાર હતાં. પોતાનો નંબર લાગે તેની રાહ જોઈ રહ્યાં હતાં. હવે તે સૂટ એવોને એવો જ રહી ગયો છે. તેમની સમસ્યા છે કે સૂટનું શું કરવું જોઈએ. તેમણે મજાકમાં કહ્યું કે સૂટબૂટ પહેરેલા રહી ગયાં અને બીજા આવીને મંત્રી બની ગયાં.'

'મંત્રીમંડળમાં સંખ્યાસીમા નક્કી હોય છે'
ગડકરીએ કહ્યું કે 'મંત્રીમંડળમાં મંત્રીઓની સંખ્યાસીમા નક્કી હોય છે. તેનાથી વધારે મંત્રી બનાવી જ ન શકાય. તેથી જેમની ઈચ્છાઓ પૂરી નથી થતી તે અસંતુષ્ટ રહે છે. તેમણે કહ્યું કે કોઈ હોલમાં ક્ષમતાથી વધુ લોકો તો આવી શકે છે પરંતુ મંત્રીમંડળમાં આવું નથી થતું.'