નેશનલ / વિમાનમાં સીટ બદલતાં મોતે બદલ્યો રસ્તો, ક્રેશ થયેલી આ ફ્લાઈટમાં કોકપિટ બહાર 'કોક' બચ્યું

Aurangabad-Mumbai Airlines : 12 જૂનનો એ કારમો દિવસ કે જ્યારે અમદાવાદમાં પ્લેન ક્રેશમાં 265 લોકોના કરૂણ મોત થયા છે. ગુરુવારે અમદાવાદમાં એર ઇન્ડિયાના વિમાન દુર્ઘટનાએ સમગ્ર દેશને હચમચાવી નાખ્યો છે. આ દુ:ખદ અકસ્માત મહારાષ્ટ્રના પરભણીના રહેવાસી અને ભૂતપૂર્વ મેયર વસંત ચવ્હાણ માટે એક જૂનો ઘા ફરી ખોલવા જેવો હતો. ભૂતપૂર્વ મેયર વસંત ચવ્હાણને 32 વર્ષ પહેલા થયેલા ભયાનક વિમાન દુર્ઘટનાની યાદ આવી ગઈ જ્યારે 26 એપ્રિલ 1993ના રોજ ઔરંગાબાદ-મુંબઈ ઇન્ડિયન એરલાઇન્સની ફ્લાઇટ ટેકઓફ થયા પછી તરત જ ક્રેશ થઈ ગઈ હતી. આ અકસ્માતમાં 112 લોકોમાંથી 55 લોકોએ જીવ ગુમાવ્યા હતા.

વસંત ચવ્હાણે જણાવી કહાની

વસંત ચવ્હાણ તે સમયે વિમાનમાં હતા અને તેમની બેઠકની સ્થિતિએ તેમનો જીવ બચાવ્યો હતો. તેમણે કહ્યું કે, અકસ્માત સમયે તેઓ કોકપીટ પાસે બેઠા હતા જ્યારે વિમાનના પાછળના ભાગમાં જ્યાં ઇંધણ ટાંકી હતી આગ લાગી ગઈ. ચવ્હાણે એક ચેનલને જણાવ્યું હતું કે, જો અમે પાછળની સીટ પર હોત તો કદાચ આપણે બચી ન શક્યા હોત. અકસ્માતની ભયાનકતાને યાદ કરતાં તેમણે કહ્યું કે, ટેકઓફ દરમિયાન વિમાનનો લેન્ડિંગ ગિયર રનવેની બાજુમાં એક ટ્રક સાથે અથડાયો હતો અને પછી હાઇ ટેન્શન વાયર સાથે અથડાયા બાદ વિમાન ત્રણ ભાગમાં તૂટી ગયું હતું.

કોકપીટ પાસે બેસવાનો નિર્ણય જીવનરક્ષક સાબિત થયો

ચવ્હાણે કહ્યું કે, તેઓ કોંગ્રેસના નેતા રામપ્રસાદ બોર્ડીકર સાથે મુંબઈમાં એક કાર્યક્રમમાં જઈ રહ્યા હતા. તેમને ખાતરી નહોતી કે તેમને ટિકિટ મળશે કે નહીં પરંતુ પરભણીના એક પરિવારે તેમની ટિકિટ રદ કરી જેના કારણે તેમને મુસાફરી કરવાની તક મળી. તેમણે કહ્યું, અમે પાછળની સીટ લેવાને બદલે કોકપીટ પાસે બેસવાનું નક્કી કર્યું અને આ નિર્ણય અમારા માટે જીવનરક્ષક સાબિત થયો.

આ પણ વાંચો : ક્રેશ થયેલા એર ઇન્ડિયાના વિમાનનું બ્લેક બોક્સ તો મળી ગયું, જાણો હવે આગળની પ્રોસેસ શું હશે?

અમદાવાદ વિમાન દુર્ઘટનાએ માત્ર દેશને દુઃખી જ નથી કર્યો પરંતુ અગાઉ આવા ભયાનક અનુભવોનો સામનો કરનારા લોકોની લાગણીઓને પણ હચમચાવી દીધી છે. ચવ્હાણે કહ્યું કે, આજે પણ જ્યારે તેઓ વિમાન દુર્ઘટનાના સમાચાર સાંભળે છે ત્યારે તેમના શ્વાસ અટકી જાય છે અને 1993 ની દુર્ઘટના તેમના મનમાં તાજી થઈ જાય છે. તેમનો અનુભવ એ વાતનું ઉદાહરણ છે કે ક્યાં બેસવું જેવા કેટલાક નિર્ણયો વ્યક્તિનું ભાગ્ય કેવી રીતે બદલી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ