સાવચેતી / ઉકાઈ ડેમ ભયજનક સપાટીએ, કડાણાના 14 ગેટ તો સરદાર સરોવર ડેમના 23 ગેટ ખોલાયા, જાણો ગુજરાતના ડેમની સ્થિતિ

• ગુજરાતમાં ભાદરવો ભરપૂર, નદી નાળા ગાડાતૂર 
• સરદાર સરોવર ડેમના 23 દરવાજા ખોલયા
• દાંતીવાડા ડેમના 4 દરવાજા ખોલાયા

ગુજરાતમાં ભાદરવો ભરપૂર વરસી રહ્યો છે. દેશમાં પણ મધ્યપ્રદેશ સહિતના રાજ્યમાં ભારે વરસાદ ખાબક્યો છે, જેના કારણે સરદાર સરોવર ડેમમાં 20 લાખ ક્યૂસેક પાણી છોડવામાં આવ્યું છે. પાણીની આવક વધતા ડેમના 23 ગેટ ખોલયા છે, જેને લઈ નર્મદા નદીમાં 19 લાખ ક્યુસેક પાણી છોડવામાં આવતા નર્મદા નદી ગાંડીતૂર બની છે. પાણીનો પ્રવાહ એટલો છે કે, હાઈવે પણ બંધ કરવાની નોબત આવી છે. બીજી તરફ તિલકવાડા, નાંદોદ, રાજપીપળા તેમજ ભરૂચમાંથી લોકોનું સ્થળાંતર કરવાની ફરજ પડી પડી છે. જ્યારે તાપી નદી પરના ઉકાઈ ડેમની જળસપાટીમાં પણ વધારો થયો છે, તો  દાંતીવાડા ડેમના 4 દરવાજા ખોલાયા છે. સુરત જિલ્લાની તાપી નદી પરના ઉકાઈ ડેમની જળસપાટીમાં સતત વધારો થઈ રહ્યો છે.

નર્મદા ડેમના 23 દરવાજા ખોલાયા
નર્મદા નદીમાં 19 લાખ ક્યુસેક પાણી છોડવામાં આવતા નર્મદા નદી ગાંડીતૂર બની છે. નાંદોદ, તિલકવાડા અને ગરુડેશ્વર તાલુકાના નીચાણવાળા ગામોના 800 લોકોને સુરક્ષિતસ્થળે ખસેડાયા છે. SOUની બસો આખી રાત દોડી બોરિયા સ્કૂલમાં લોકોનું  સ્થળાંતર કરાયું છે. નર્મદા જિલ્લાના નર્મદા નદી પાસે આવેલા 10થી વધુ ગામોના લોકોને સુરક્ષિત જગ્યાએ ખસેડાયા છે. વડોદરા ભરૂચ અને નર્મદાનાં કાંઠાના ગામોને ભારે અસરથી અનેક ગામો સંપર્ક વિહોણા બન્યા છે. 

ઉકાઈ ડેમની જળસપાટીમાં સતત વધારો
તાપી નદી પરના ઉકાઈ ડેમની જળસપાટીમાં સતત વધારો નોંધાયો છે. ભારે વરસાદને લઈ ઉકાઈ ડેમની જળસપાટી 342.40 ફૂટ નોંધાઈ છે જ્યારે ભયજનક સપાટી 345 ફૂટ  છે. ડેમમાં પાણીની આવકને લઈ 15 દરવાજા ખોલાયા છે. વરસાદને લઈ 4 લાખ 93 હજાર ક્યૂસેક પાણીની આવક નોંધાઈ છે. પાણીની આવક સામે ઉકાઈ ડેમમાંથી 2 લાખ 88 હજાર 548 ક્યૂસેક પાણીની જાવક છે.

દાંતીવાડા ડેમના 4 દરવાજા ખોલાયા
બનાસકાંઠા જિલ્લામાં અને દક્ષિણ રાજસ્થાનમાં સારા વરસાદને લીધે બનાસકાઠાં જિલ્લામાં આવેલ દાંતીવાડા બંધમાં સારા પ્રમાણમાં પાણીની આવક થતાં દાંતીવાડા ડેમના 4 દરવાજા ખોલીને ડેમમાંથી 10,659 ક્યુસેક પાણી છોડવામાં આવ્યું છે. હજુ પણ વધુ પાણી છોડવામાં આવવાની સંભાવના છે. નદીના વહેણ વિસ્તાર અને નીચાણવાળા વિસ્તારના ગામલોકોને ખાસ કાળજી લેવા વહીવટી તંત્ર સૂચનો આપ્યા છે.