સેક્યુલરિઝમ / માયાવતી મામલે 24 કલાક સેક્યુલર ઝંડો લઇને ફરતી જમાત કેમ ચૂપ: મોદી

 

અન્ય એક ઇન્ટરવ્યૂમાં તેમણે જણાવ્યું કે આ જમાતનું સેક્યુલરિઝમ સિલેક્ટિવ છે. કેરળમાં જાણીતા એક્ટર સુરેશ ગોપી અમારા ઉમેદવાર છે. તેમણે સબરીમાલા પર કંઇ કહ્યું તો તેમની ટીકા કરવા આ જમાત ભેગી થઇ ગઇ. જ્યારે માયાવતીના મામલે તમામે મોઢા પર તાળાં મારી દીધાં છે. જમ્મુ-કાશ્મીરની કલમ-૩૭૦ અને ૩પ-એ અંગે તેમણે જણાવ્યું કે આ કલમ હટાવવી ભાજપના એજન્ડામાં છે. તેને દૂર કરવાનાં બંધારણમાં સૂચવાયેલા અનેક રસ્તા છે.

જે લોકો કહે છે કે પાંચ વર્ષમાં અમે રામમંદિર કેમ ન બનાવ્યું અને કલમ-૩૭૦ કેમ દૂર ન કરી? તેમણે તેનાં ટેકનિકલ કારણો જાણવાં અને સમજવાં જોઇએ. ૭પ વર્ષથી વધુ વયના લોકોને ટિકિટ નહીં આપવા અંગે મોદીએ જણાવ્યું કે જ્યારે નાનાજી દેશમુખ જનસંઘમાં સક્રિય હતા ત્યારે ૬૦ વર્ષ સુધી સક્રિય રાજનીતિમાં રહેવાની ઉંમર નક્કી કરાઇ હતી. ખુદ નાનાજી દેશમુખે ૬૦મા વર્ષે રાજનીતિ છોડી દીધી હતી. અત્યારે સ્થિતિ બદલાઇ છે. તેથી રાજનીતિમાં સક્રિય રહેવાની ઉંમર ૭પ વર્ષ કરવાનો પાર્ટીનો વિચાર બન્યો છે. તેનો અમલ નેતાઓ અને કાર્યકરો કરી રહ્યા છે.

 

ગુજરાતનાં તત્કાલીન મુખ્યપ્રધાન આનંદીબહેન પટેલે ૭પ વર્ષ થતાં પદ છોડી દીધું હતું. કલરાજ મિશ્રા, બી.સી.ખંડુરી, શાંતાકુમાર જેવા નેતાઓએ તેનું અનુસરણ કર્યું છે, જોકે તેનો અર્થ એવો નથી કે તેમનું યોગદાન ઓછું થઇ જાય છે. પાર્ટીમાં હવે તેઓ એવા સ્થાને છે કે તેમને કોઇ પદની જરૂર નથી, જેમ કે અટલબિહારી વાજપેયી. તેમની પાસે પણ છેલ્લે કોઇ પદ ન હતું, છતાં તેઓ અમારા સર્વેસર્વા હતાં. રાષ્ટ્રવાદ અંગે મોદીએ કહ્યું કે તેને ઘણા લોકો માત્ર પાકિસ્તાન સાથે જોડીને જુએ છે. આ મોટી ભ્રમણા છે. જ્યારે હું ભારત માતા કી જય બોલું તો તે રાષ્ટ્રવાદ છે પણ હું ગરીબ દેશવાસીઓ માટે ઘર બનાવું, ખેડૂતોના હિતની યોજના બનાવું તે પણ રાષ્ટ્રવાદ જ છે. આયુષ્માન યોજના પણ મારા અને ભાજપ માટે રાષ્ટ્રવાદ જ છે.