રાજ્યમાં ફરી એક વખત મોટા અકસ્માતની ઘટના સામે આવી છે. સુરતના સોનગઢના પોખરણ ગામ પાસે ટ્રિપલ અકસ્માત સર્જાયો છે. આ અકસ્માતમાં 8 લોકોના મોત નિપજ્યાં છે. જ્યારે 10થી વધુ લોકો ઇજાગ્રસ્ત થયા છે.
તાપીના સોનગઢના પોખરણ ગામ પાસે ટ્રિપલ અકસ્માત
અકસ્માતમાં 8 લોકોના મોત નિપજ્યા
નેશનલ હાઇવે પર બસ, ટ્રક અને ક્રુઝર વચ્ચે અકસ્માત
તાપી જિલ્લામાં પોખરણ નેશનલ હાઈવે પર આ ગમખ્વાર અકસ્માત સર્જાયો હતો. આ અકસ્માત ST બસ, ટ્રક અને ક્રુઝર વચ્ચે સર્જાયો છે. આ દુર્ઘટનામાં 8 લોકોના મોત નીપજ્યા છે જ્યારે 10થી વધુ ઈજાગ્રસ્ત થઈ હતી. ત્યારે આ ઇજાગ્રસ્તોને સારવાર અર્થે હોસ્પિટલ ખસેડાયા છે.
ST બસ કુસલગઢથી ઉકાઈ તરફ જઈ રહી હતી
રાજ્યમાં દરરોજ અકસ્માતની ઘટનાઓ સામે આવે છે. જેમાં કેટલાક ગંભીર અકસ્માતો હોય છે. ત્યારે સોમવારે દક્ષિણ ગુજરાતમાં મોટો અકસ્માત સર્જાયો છે. આ અકસ્માત એટલો ભયંકર હતો કે ત્રણેય વાહનોનો આગળનો ભાગ કચ્ચર ઘાણ વળી ગયો હતો. તાપી જિલ્લાના સોનગઢના પોખરણ પાસે ST બસ કુસલગઢથી ઉકાઈ તરફ જઈ રહી હતી ત્યારે અકસ્માતનો ભોગ બની હતી.
સ્થાનિકોએ ઇજાગ્રસ્તોને તાત્કાલિક હોસ્પિટલ ખસેડ્યા
ત્યારે આ અકસ્માતના પગલે મોટી સંખ્યામાં સ્થાનિકો દોડી આવ્યા હતા. વાહનમાં દબાયેલા લોકોને બહાર કાઢ્યા હતા. ઇજાગ્રસ્તોને તાત્કાલિક હોસ્પિટલ ખસેડવાની કામગીરી હાથ ધરાઇ હતી. સ્થાનિકોએ ઇમરજન્સી એમ્બ્યુલન્સ 108 મારફતે ઇજાગ્રસ્તોને તાત્કાલિક નજીકની હોસ્પિટલ ખસેડ્યા હતા.
અકસ્માત સર્જાતા ટ્રાફિક જામ થયો હતો
આ અકસ્માત સર્જાતા ટ્રાફિક જામની સ્થિતિ સર્જાઇ હતી. વ્યારા અને સોનગઢ પોલીસ ઘટના સ્થળે પહોંચી હતી. પોલીસે ટ્રાફિક હળવો પાડ્યો હતો અને સમગ્ર દુર્ઘટના અંગે તપાસ હાથ ધરી છે.