- મહાદેવ સટ્ટાબાજી એપ કેસમાં મોટા સમાચાર
- છત્તીસગઢના મુખ્યમંત્રી ભૂપેશ બઘેલ પર ગંભીર આરોપો
- આરોપીએ કહ્યું, CM અને તેમના દીકરાને મેં 500 કરોડ રૂપિયા આપ્યા
Mahadev Betting App Case : મહાદેવ સટ્ટાબાજી એપ કેસમાં મોટા સમાચાર સામે આવ્યા છે. વાત જાણે એમ છે કે, ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયે 22 ગેરકાયદેસર સટ્ટાબાજીની એપ અને વેબસાઈટને બ્લોક કરવાનો આદેશ આપ્યો છે. આ સટ્ટાબાજીના પ્લેટફોર્મમાં મહાદેવ એપ પણ સામેલ છે. મહાદેવ સટ્ટાબાજી એપ કેસમાં છત્તીસગઢના મુખ્યમંત્રી ભૂપેશ બઘેલ પર ગંભીર આરોપો લાગ્યા છે.
અગાઉ એન્ફોર્સમેન્ટ ડિરેક્ટોરેટ (ED) એ આ કેસમાં ભૂપેશ બઘેલનું નામ આપ્યું હતું. આ તરફ હવે આ કેસના મુખ્ય આરોપીએ એક વીડિયો જાહેર કર્યો છે જેમાં દાવો કરવામાં આવ્યો છે કે, તેણે છત્તીસગઢના મુખ્યમંત્રીને 508 કરોડ રૂપિયા આપ્યા હતા. દાવા મુજબ આ સોદામાં મુખ્યમંત્રીના રાજકીય સલાહકાર વિનોદ વર્મા પણ સામેલ હતા.
શું કહ્યું મુખ્ય આરોપીએ ?
અહેવાલ મુજબ મહાદેવ સટ્ટાબાજી એપ કેસના મુખ્ય આરોપીઓમાંના એક શુભમ સોનીએ એક વીડિયો જાહેર કર્યો છે. આ વીડિયોમાં આરોપીએ દાવો કર્યો છે કે, વિનોદ વર્મા તેની પાસેથી રક્ષણ માટે દર મહિને 10 લાખ રૂપિયા લેતા હતા. આરોપીએ એમ પણ કહ્યું છે કે, વિનોદ વર્માએ તેને રાયપુરમાં મુખ્યમંત્રી ભૂપેશ બઘેલ સાથે મુલાકાત કરાવી હતી. આરોપીએ વીડિયોમાં વધુમાં કહ્યું કે, જ્યારે મારી સીએમ સાહેબ (ભૂપેશ બઘેલ) સાથે મુલાકાત થઈ, ત્યારે તેમણે મને દુબઈ જઈને મારું કામ વિસ્તારવાનું કહ્યું.
સટ્ટાબાજીની એપનો માલિક છે શુભમ સોની
આરોપી શુભમ સોનીએ કહ્યું કે, તે આ સટ્ટાબાજીની એપનો માલિક છે. તેના દાવા મુજબ મુખ્યમંત્રી બઘેલને મળ્યા બાદ તેમણે અન્ય ઘણા લોકો સાથે પણ મુલાકાત કરી હતી. તે બોલ્યો કે, થોડા દિવસો સુધી બધું બરાબર ચાલ્યું પરંતુ પછી સમસ્યાઓ શરૂ થઈ. અમારા લોકો અંદર થવા લાગ્યા. હું ચિંતિત થઈ ગયો અને વર્મા જી (વિનોદ વર્મા) ને ફોન કર્યો. તેણે કહ્યું, ભિલાઈ આવો, અમે તમારી મુલાકાત ગોઠવીશું. હું ભયથી ભિલાઈ પહોંચ્યો.
508 કરોડ રૂપિયા ચૂકવવાનું કહેવામાં આવ્યું
વીડિયોમાં આરોપીએ દાવો કર્યો છે કે, તે ભિલાઈમાં તત્કાલીન પોલીસ અધિક્ષક પ્રશાંત અગ્રવાલને મળ્યો હતો. જ્યાં અગ્રવાલે ફરીથી મુખ્યમંત્રી બઘેલ સાથે વાત કરી હતી. આ પછી આરોપીને 508 કરોડ રૂપિયા ચૂકવવાનું કહેવામાં આવ્યું. આરોપીઓના જણાવ્યા મુજબ, મેં બઘેલ સાહેબ, બિટ્ટુ ભૈયા (ભુપેશ બઘેલના પુત્ર) અને તેમના લોકોને 508 કરોડ રૂપિયા આપ્યા છે. એ પછી પણ મારું કામ પૂરું થતું નથી. શુભમ સોનીએ ભારત સરકાર પાસે મદદ માંગી છે અને કહ્યું છે કે, તે ભારત આવવા માંગે છે અને સરકારને તમામ પ્રકારના પુરાવા આપવા તૈયાર છે. તેણે કીધુ, મેં તેમને પૈસા આપ્યા છે, મારી પાસે દરેક બાબતના પુરાવા છે. મારે પણ ભારત જવું છે, અહીંથી પાછા ફરવું છે. મને અહીંથી ભારત જતાં ડર લાગે છે.
મહાદેવ એપ બ્લોક કરવામાં આવશે
આ પહેલા EDએ આ કેસમાં છત્તીસગઢ સીએમ ઓફિસ સાથે જોડાયેલા અધિકારીઓના નામ લીધા હતા. જે બાદ સીએમ ભૂપેશ બઘેલનું નામ આ મામલે સીધું લેવામાં આવ્યું હતું. તપાસ એજન્સીએ દાવો કર્યો હતો કે એપના પ્રમોટર્સ તરફથી સીએમ બઘેલને નિયમિત ચૂકવણી કરવામાં આવી હતી, જેની કુલ રકમ 508 કરોડ રૂપિયા છે. આ દાવો અસીમ દાસ નામના વ્યક્તિના નિવેદનના આધારે કરવામાં આવ્યો છે, જેને ED દ્વારા પકડવામાં આવ્યો છે.
EDની કાર્યવાહી બાદ હવે IT મંત્રાલયે પણ ગેરકાયદેસર સટ્ટાબાજીની એપ સિન્ડિકેટ સામે કાર્યવાહી હાથ ધરી છે. ન્યૂઝ એજન્સીના રિપોર્ટ અનુસાર, મહાદેવ એપ સહિત 22 ગેરકાયદેસર સટ્ટાબાજીની એપ અને વેબસાઇટ્સને બ્લોક કરવાનો આદેશ આપવામાં આવ્યો છે. રિપોર્ટ અનુસાર, કેન્દ્રીય ઈલેક્ટ્રોનિક્સ અને ઈન્ફોર્મેશન ટેક્નોલોજી રાજ્ય મંત્રી રાજીવ ચંદ્રશેખરે કહ્યું છે કે EDની વિનંતી પર બ્લોકિંગ ઓર્ડર જાહેર કરવામાં આવ્યો છે, છત્તીસગઢ સરકારે આવી કોઈ વિનંતી કરી નથી. તાજેતરમાં જ છત્તીસગઢમાં એક ચૂંટણી રેલી દરમિયાન વડાપ્રધાન નરેન્દ્ર મોદીએ પણ આ મામલે ભૂપેશ બઘેલને ઘેર્યા હતા. જો કે, મુખ્યમંત્રી બઘેલે EDના આ આરોપોને નકારી કાઢ્યા છે અને ભાજપ પર ચૂંટણી જીતવા માટે એજન્સીઓની મદદ લેવાનો આરોપ લગાવ્યો છે.
