Lok Sabha Election 2024 / 450નો સિલેન્ડર, MSPની ગેરંટી, અગ્નિવીર યોજના બંધ કરવાનો વાયદો..., જાણો કેવું હશે કોંગ્રેસનું મેનિફેસ્ટો

લોકસભા ચૂંટણીનું કાઉન્ટડાઉન શરૂ થઈ ગયું છે અને તારીખો પણ જલ્દી જ જાહેર કરવામાં આવશે. એવામાં હવે કોંગ્રેસ લોકસભા ચૂંટણીને લઈને પોતાનું ઘોષણાપત્ર જાહેર કરવા જઈ રહી છે. સોમવારે સાંજે યોજાયેલી બેઠક બાદ કોંગ્રેસ પાર્ટીએ સ્પષ્ટ કર્યું છે કે પાર્ટીનો મેનિફેસ્ટો ટૂંક સમયમાં જાહેર કરવામાં આવશે. હાલમાં ઉમેદવારોના નામને લઈને પાર્ટીની અંદર મંથન ચાલી રહ્યું છે અને ટૂંક સમયમાં કોંગ્રેસ લોકસભા ચૂંટણી માટે પોતાના ઉમેદવારોને મેદાનમાં ઉતારી શકે છે. 

એ વાત તો જાણીતી જ છેકે અત્યારે દરેક રાજકીય પક્ષોએ પણ ચૂંટણી મેદાનમાં ઝંપલાવ્યું છે અને ઉમેદવારનું નામ ફાઇનલ કરવાની સાથે રણનીતિ ઘડવા માટે પણ વિચાર-મંથન ચાલી રહ્યું છે. એવામાં હવે દરેક પાર્ટીનું મેનિફેસ્ટો સૌથી મહત્વપૂર્ણ છે. દરમિયાન કોંગ્રેસની મેનિફેસ્ટો કમિટીની છેલ્લી બેઠક સોમવારે સાંજે મળી હતી. કોંગ્રેસના સૂત્રોના જણાવ્યા અનુસાર કોંગ્રેસ મેનિફેસ્ટો યુવાનો, મહિલાઓ, ખેડૂતો, પછાત લોકો અને ગરીબો પર ફોકસ કરી શકે છે.  

માનવામાં આવે છે કે પાર્ટી મેનિફેસ્ટોમાં અગ્નિવીર યોજના બંધ કરવા જેવા મુદ્દાઓ પણ સામેલ કરી શકે છે. મીડિયા રિપોર્ટ્સ અનુસાર, કોંગ્રેસ AI દ્વારા મોટા પાયે પ્રચાર કરવાની તૈયારી કરી રહી છે. સાથે જ એવી શક્યતા છે કે કોંગ્રેસ પી. ચિદમ્બરમની આગેવાની હેઠળની સમિતિ દ્વારા મંગળવારે એટલે કે આજે મેનિફેસ્ટો જાહેર કરી શકે છે. 

મેનિફેસ્ટોમાં મોટી સંખ્યામાં નોકરીઓ આપવાનું વચન આપવાની સાથે અગ્નવીર યોજના બંધ કરવાનું અને જૂની ભરતી યોજનાને ફરીથી શરૂ કરવાનું વચન પણ સામેલ થઈ શકે છે. કોંગ્રેસ પેપર લીકને રોકવા માટે કડક સજાની વાત કરી શકે છે. આ સાથે જ મહિલાઓના સશક્તિકરણ પર પણ બહાર આપી શકે છે. આ માટે તેઓ સીધા મહિલાઓના ખાતામાં વધુ પૈસા નાખવાનું વચન આપી શકે છે. 

ઉપરાંત 450 રૂપિયામાં ગેસ સિલિન્ડર આપવાનું અને બસની મુસાફરીમાં ડિસ્કાઉન્ટ આપવાનું વચન પણ આપી શકે છે. ખેડૂતોની સીધી લોન માફીને બદલે MSPની ગેરંટીનું વચન અને ખેડૂતોના સાધનો પરથી GST દૂર કરવા અથવા ઘટાડવાનું વચન આપી શકે છે. સાથે જ મોંઘવારીમાંથી મુક્તિ મેળવવા પેટ્રોલ અને ડીઝલના ભાવ ઘટાડવાની વાત પણ મેનિફેસ્ટોમાં કહી શકે છે. 

વધુ વાંચો: જેપી નડ્ડાનું રાજ્યસભામાંથી રાજીનામું, ગુજરાતમાંથી યથાવત, લોકસભા ચૂંટણી પહેલા મોટું પગલું

એ વાત જાણીતી જ છે કે 2014 અને 2019માં કોંગ્રેસનું પ્રદર્શન બહુ સારું નહોતું તેથી આ વખતે પાર્ટી મેનિફેસ્ટો દ્વારા લોકોને પાર્ટીનું વિઝન જણાવવા માંગે છે. હાલમાં કોંગ્રેસે ઉમેદવારોના નામ પણ જાહેર કર્યા નથી. જ્યારે ભાજપે 195 ઉમેદવારો મેદાનમાં ઉતાર્યા છે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો