વિવાદ / 'માફી માંગો નહીં તો ઘરમાં ઘુસીને મારીશું': કરણીસેનાએ જાવેદ અખ્તરને આપી ધમકી

ભોપાલમાં યોજાયેલ એક ઈવેન્ટમાં બોલિવૂડ ગીતકાર જાવેદ અખ્તરે બુરખા તથા ઘૂંઘટ પર પ્રતિબંધ મૂકવાને લઈ વિવાદિત નિવેદન આપ્યું હતું. આ નિવેદન બાદ કરણીસેના જાવેદ અખ્તર પર નારાજ છે. મહારાષ્ટ્ર કરણીસેનાના પ્રમુખ જીવન સિંહ સોલંકીએ વીડિયો શૅર કરીને ત્રણ દિવસની અંદર જાવેદ અખ્તરને માફી માંગવાનું ફરમાન આપ્યું છે. જો જાવેદ અખ્તર આમ નહીં કરે તો કરણીસેનાએ ઘરમાં ઘુસીને મારવાની ધમકી આપી છે.

સૂત્રોના મતે, મહારાષ્ટ્ર કરણીસેનાએ એક વીડિયો રિલીઝ કર્યો છે. જેમાં જીવન સિંહ સોલંકી કહે છે, ''પોતાની મર્યાદા સમજો. રાજસ્થાન જેવા રાજ્યની સંસ્કૃતિ પર આંગળી ઉઠાવવી જોઈએ નહીં. હું જાવેદ અખ્તરને કહેવા માંગું છું કે ત્રણ દિવસની અંદર આ નિવેદન બદલ માફી માંગે નહીં તો કરણીસેનાનો વિરોધ સહન કરવા તૈયાર રહે. આ પ્રકારના લોકોને કેવી રીતે જવાબ આપવા, તે કરણીસેના સારી રીતે જાણે છે. '

સંજય લીલા ભણશાલીને યાદ કરતાં જીવન સિંહે કહ્યું, ''ભણશાલી સાહેબને પૂછી લેજો કે કરણીસેના કેવી રીતે જવાબ આપે છે. જો રાજસ્થાનની સંસ્કૃતિ પર કોઈએ આંગળી ઉઠાવી તો તેની આંખો બહાર કાઢી લેવાની હિંમત કરણીસેના પાસે છે. આ વાત યાદ રાખવી કે અમે જીભ ખેંચી લઈશું, ત્રણ દિવસનો સમય આપ્યો છે. માફી ના માંગી તો ઘરમાં ઘુસીને મારીશું.''

જાવેદ અખ્તરનું નિવેદન
ઈવેન્ટ દરમિયાન જાવેદ અખ્તરે શ્રીલંકામાં આતંકી હુમલા બાદ બુરખા પર બૅન મૂકવામાં આવ્યો તે અંગે વાત કરી હતી. જાવેદે આ અંગે એમ કહ્યું હતું કે શ્રીલંકામાં બુરખા પર પ્રતિબંધ મૂકવામાં નથી આવ્યો પરંતુ ચહેરા ઢાંકવા પર બૅન છે. જો ભારતમાં બુરખા પર પ્રતિબંધ મૂકવામાં આવે તો કેન્દ્ર સરકાર રાજસ્થાનમાં મતદાન પહેલાં ઘૂંઘટ પર પ્રતિબંધ મૂકે. તેમને આનંદ થશે કે ઘૂંઘટ તથા બુરખો બંને જ નહીં હોય.