- આજે કાદર ખાનની પહેલી પુણ્યતિથિ
- કાદર ખાને એક ઈન્ટરવ્યૂમાં અમિતાભ વિશે કહી આ વાત
- અમિતાભ સાથેના સંબંધો વિશે જણાવી આ વાત
કાદર ખાને ફિલ્મોમાં સીરિયસ એક્ટિંગ અને કોમેડી પણ કરી હતી અને તેમને હંમેશા દર્શકોનો ભરપૂર પ્રેમ મળ્યો છે. 81 વર્ષની ઉંમરે જ્યારે કાદરખાને આ દુનિયાને અલવિદા કહી દીધું ત્યારે બોલિવૂડ સહિત દેશભરમાં તેમના લાખો ચાહકોને આઘાત લાગ્યો હતો. કાદર ખાનની મૃત્યુ સાથે તેમનો એક ઇન્ટરવ્યૂ પણ ઝડપથી વાયરલ થઈ રહ્યો હતો, જેમાં તે સદીના સુપરસ્ટાર અમિતાભ બચ્ચન સાથેના તેના સંબંધો વિશે જણાવી રહ્યા હતા.
અમિતાભ બચ્ચન સાથે કેવા હતા કાદર ખાનના સંબંધો?
એક વીડિયોમાં કાદર ખાને બિગ બી સાથે જોડાયેલો એક કિસ્સો જણાવ્યો અને કહ્યું, 'આ ઘટના ત્યારની છે જ્યારે અમિતાભ બચ્ચન સાંસદ તરીકે દિલ્હી ગયા હતા અને હું ખુશ નહોતો, કારણ કે રાજકારણની દુનિયા એવી છે વ્યક્તિને બદલીને પાછો મોકલે છે. તેથી જ્યારે તે પાછો આવ્યો ત્યારે તે મારા અમિતાભ બચ્ચન નહોતા. તેના કારણે મને ઘણું જ દુઃખ થયું હતું. આ અંગે અમારા બંને વચ્ચે મતભેદ અને બોલાચાલી પણ થઈ હતી.
આ કારણથી અમિતાભને સર જી કહેવાની ના પાડી
એક ઈન્ટરવ્યૂમાં કદર ખાને એક ઘટનાનો હવાલો આપતા કહ્યું હતું કે, જ્યારે અમિતાભ ખૂબ જ સફળ થયા અને સુપરસ્ટાર બન્યા, ત્યારે લોકોએ તેમને 'સર જી' કહેવાનું શરૂ કર્યું. પરંતુ મારા માટે તે અમિત અથવા અમિતાભ હતા. કાદર ખાને કહ્યું હતું કે, 'એકવાર બિગ બીના મિત્રોના ગ્રુપમાં પાર્ટી ચાલી રહી હતી, જેમાં હું પણ સામેલ થયો હતો. ત્યારે અમિતાભ ત્યાં આવ્યા અને લોકોએ કહ્યું કે જુઓ, 'સર જી' આવી ગયા...', ત્યારે મેં કહ્યું કે તે મારા માટે તે ફક્ત અમિતાભ છે.
કાદરખાનનું કેનેડામાં અવસાન થયું હતું
તમને જણાવી દઈએ કે કાદરખાને અમિતાભ માટે 'મુકદ્દર કા સિકંદર', 'નસીબ' અને 'અગ્નિપથ' જેવી ફિલ્મો માટે ડાયલોગ્સ લખ્યા હતા અને આ ડાયલોગ્સ ખૂબ જ હિટ રહ્યા હતા. કાદર ખાનનો જન્મ 22 ઓક્ટોબર 1937માં અફગાનિસ્તાનના કાબુલમાં થયો હતો અને 31 ડિસેમ્બર 2018ના રોજ કેનેડામાં તેમણે અંતિમ શ્વાસ લીધા હતા.
