રસપ્રદ કિસ્સો / આવી સુવિધા કોમન મેનને મળે? નેતાજીને મચ્છર કરડ્યું, તાત્કાલિક રોકી દેવાઈ ટ્રેન અને ડબ્બાની કરાઇ સફાઇ

• ઉત્તર પ્રદેશમાં મચ્છર કરડવાનો એક રસપ્રદ કિસ્સો સામે આવ્યો 
• ઇટાહના સાંસદ રાજવીર સિંહને મુસાફરી દરમિયાન મચ્છર કરડ્યું
• સાંસદે ફરિયાદ નોંધાવી અને સમગ્ર વહીવટીતંત્રમાં ખળભળાટ મચી ગયો

ઉત્તર પ્રદેશમાં મચ્છર કરડવાનો એક રસપ્રદ કિસ્સો સામે આવ્યો છે. ઇટાહના સાંસદ રાજવીર સિંહ લખનૌના ચારબાગ રેલવે સ્ટેશનથી દિલ્હી જવા નીકળેલી ગોમતી એક્સપ્રેસ (12419) ટ્રેનમાં મુસાફરી કરી રહ્યા હતા. મુસાફરી દરમિયાન તેને મચ્છર કરડયું હતું અને પછી સાંસદે ફરિયાદ નોંધાવી અને સમગ્ર વહીવટીતંત્રમાં ખળભળાટ મચી ગયો. ફરિયાદ બાદ તાત્કાલિક રેલ્વે કર્મીઓ સ્થળ પર પહોંચી ગયા હતા અને ટ્રેનને રોક્યા બાદ સમગ્ર બોગીમાં સફાઈ અભિયાન હાથ ધરવામાં આવ્યું હતું. બોગીની સફાઈ પૂરી થયા બાદ જ ટ્રેનને ત્યાંથી આગળ રવાના કરવામાં આવી હતી.

સાંસદ સાથે મુસાફરી કરી રહેલા માન સિંહે ટ્વિટર પર ટ્રેનમાં મચ્છર કરડવાની ફરિયાદ કરતા લખ્યું હતું કે સાંસદ રાજવીર સિંહ ટ્રેનના પહેલા એસી કોચમાં મુસાફરી કરી રહ્યા હતા. ટ્રેનનું બાથરૂમ ગંદુ છે અને મચ્છરો કરડે છે. જેના કારણે સાંસદ માટે બેસવું પણ મુશ્કેલ બન્યું છે. આ ટ્વીટ પછી અધિકારીઓ એક્શનમાં આવી ગયા અને ટ્રેનને ઉન્નાવ ખાતે રોકી દેવામાં આવી. આ પછી આખો ડબ્બો સાફ કરવામાં આવ્યો. મચ્છરોને દૂર કરવા માટે આખી બોગીમાં છંટકાવ કરવામાં આવ્યો હતો. આ પછી ટ્રેનને ઉન્નાવ રેલવે સ્ટેશનથી દિલ્હી રવાના કરવામાં આવી હતી.

સામાન્ય માણસની સમસ્યા કે ફરિયાદ કોઈ સાંભળતું નથી

રેલવેના આ પગલાને લઈને સોશિયલ મીડિયા પર ઘણી ચર્ચા થઈ રહી છે. લોકો કહે છે કે સામાન્ય માણસ મુસાફરી દરમિયાન સતત આવી સમસ્યાઓનો સામનો કરે છે, પરંતુ તેની સુનાવણી ભાગ્યે જ થાય છે. તે ફરિયાદ કરતો રહે છે. પરંતુ જ્યારે કોઈ નેતાજીને કોઈ સમસ્યા હોય ત્યારે વહીવટીતંત્ર તરત જ એક્શનમાં આવે છે. રેલ્વેમાં મુસાફરી કરતી વખતે લોકો હંમેશા ફરિયાદ કરે છે કે તેમની ફરિયાદ સાંભળનાર કોઈ નથી. ઉનાળામાં ક્યારેક પાણીની તંગી, ક્યારેક ગંદકી તો ક્યારેક ખરાબ પંખાની ફરિયાદો આવી સમસ્યાઓથી મુસાફરો હંમેશા પરેશાન રહે છે પરંતુ ત્યારે તંત્ર કોઈ ફરિયાદ સાંભળતું નથી.