કાર્યવાહી / ખેડા-આણંદમાં IT વિભાગનો સપાટો: રાજ્યની તમામ બિલ્ડર લોબીમાં ફફડાટ, ઝડપાઇ શકે મોટી કરચોરી

• આણંદમાં IT વિભાગના દરોડાનો મામલો
• વહેલી સવારથી વિભાગે કાર્યવાહી હાથ ધરી
• IT દરોડાથી બિલ્ડર લોબીમાં ફફડાટનો માહોલ 

આજે વહેલી સવારે ખેડા, નડિયાદ અને આણંદમાં આઈટી વિભાગ દ્વારા સાગમેટ દરોડા પાડતા બિલ્ડરો તેમજ જ્વેલર્સ માલિકો દોડતા થઈ જવા પામ્યા હતા. જેમાં નડિયાદમાં મસાલાનો વેપાર કરતા એશિયન ગ્રુપ પર દરોડા પાડવામાં આવ્યા હતા.

બિલ્ડર, જ્વેલર્સને ત્યાં આઈટીની કાર્યવાહીથી લોકોમાં ફફડાટ
આણંદમાં નારાયણ બિલ્ડર, ક્રિષ્ના બિલ્ડર, જે.ડી.બિલ્ડરને ત્યાં પણ આઈટી દ્વારા રેડ કરી તપાસ હાથ ધરવામાં આવી હતી. તો લાંભવેલ રોડ પરની નારાયણ નંદન સાઈટ પર પણ દરોડા પાડવામાં આવ્યા હતા. વહેલી સવારથી IT  વિભાગ દ્વારા કાર્યવાહી હાથ ધરવામાં આવતા બિલ્ડરો તેમજ જ્વેલર્સનાં માલિકોમાં ફફડાટ વ્યાપી જવા પામ્યો હતો. ઈન્કમટેક્ષ વિભાગ દ્વારા હાથ ધરવામાં આવેલ મેગા સર્ચ ઓપરેશનમાં મોટી કર ચોરી પ્રકાશમાં આવે તેવી શક્યતા છે. 

વધુ વાંચોઃ ગુજરાતમાં કોંગ્રેસ બાદ AAPને ઝટકો: 3 ફેબ્રુઆરીએ વધુ એક ધારાસભ્ય વિધિવત રીતે ભાજપમાં જોડાશે

IT વિભાગ દ્વારા કુલ 25 જગ્યાએ તપાસ હાથ ધરી
ઈન્કમટેક્ષ વિભાગ દ્વારા આણંદમાં જ્વેલર્સને ત્યાં તો નડિયાદમાં ગરમ મસાલાનાં વેપારી એશિયન ગ્રુપ પર આઈટીએ સાગમટે દરોડા પાડ્યા હતા.  ત્યારે એશિયન ગ્રુપ આણંદના નારાયણ ગ્રુપ રીયલ એસ્ટેટ સાથે સંકળાયેલું છે. બંને ગ્રુપનાં ઓફીસ, ઘર મળી કુલ 25 સ્થળો ઉપર આઈટી વિભાગ દ્વારા તપાસ હાથ ધરવામાં આવી છે.  મેગા સર્ચ ઓપરેશનમાં મોટી કરચોરી સામે આવવાની શક્યતાઓ છે.