નિયમ / કોરોનાને લઇને સરકારની નવી ગાઇડલાઇન, આ લોકોએ હોસ્પિટલમાં દાખલ થવું પડશે

• હોમ આઇસોલેશન માટે સરકારે જાહેર કરી નવી ગાઇડલાઇન
• કેન્સર, HIV દર્દીઓ માટે બદલ્યા નિયમ
• હોમ આઇસોલેશનના દર્દી લક્ષણની શરૂઆતના 10 દિવસ બાદ ડિસ્ચાર્જ થઇ જશે

નવી ગાઇડલાઇન અનુસાર, સામાન્ય લક્ષણો અથવા લક્ષણો વગરના દર્દીઓ જેમને કોઈ બીજી બીમારી નથી તેઓ હોમ આઇસોલેશનમાં રહીને પોતાની સારવાર કરાવી શકે છે, પરંતુ આના માટે પહેલા ડૉક્ટરની મંજૂરી લેવી પડશે. હોમ આઇસોલેશન પૂર્ણ થયા બાદ ટેસ્ટિંગની જરૂર નહીં રહે. મોટી સંખ્યામાં વગર લક્ષણો વાળા દર્દીઓ સામે આવ્યા બાદ આ નવા આદેશ જાહેર કરવામાં આવ્યા છે.

સરકારની આ નવી ગાઇડલાઇનમાં કહેવામાં આવ્યું છે કે, જો હોમ આઇસોલેશનમાં રહેતા દર્દીને શ્વાસ લેવામાં તકલીફ થાય છે, છાતીમાં દુખાવો શરૂ થાય છે અથવા બોલવામાં તકલીફ થાય છે તો તેમને હોસ્પિટલ આવવું પડશે.  આ સિવાય 60 વર્ષથી ઉપરના દર્દીઓને હોસ્પિટલમાં જ સારવાર કરાવવી પડશે.

આ સિવાય જેમને ડાયાબિટીસ, હાઇપર ટેન્શન, કેન્સર, કિડની, ફેફસા સંબંધિત બીમારી છે તેમને પણ હોસ્પિટલમાં જ સારવાર કરાવવી પડશે. સરકારે સ્પષ્ટ કહ્યું છે કે, હોમ આઇસોલેશનમાં રહેનારા દર્દીને પરિવારના સભ્યોથી બિલકુલ અલગ રહેવું પડશે. મંત્રાલયની ગાઇડલાઇન તે તમામ રાજ્યો માટે છે જેમણે હોમ આઇસોલેશનને મંજૂરી આપી છે.