વિવાદ / નસીરુદ્દીન શાહની એક ટિપ્પણી પર લાલ પીળા થયા 'મહાભારત'ના યુધિષ્ઠિર, ભાજપ વિશે બોલ્યા કંઈક એવું કે...

બી.આર. ચોપરાની 'મહાભારત'માં યુધિષ્ઠિરની ભૂમિકા ભજવનાર જાણીતા અભિનેતા ગજેન્દ્ર ચૌહાણે અભિનેતા નસીરુદ્દીન શાહ પર આકરા પ્રહારો કર્યા છે. નસીરુદ્દીન શાહે તાજેતરમાં ભારતીય જનતા પાર્ટી (ભાજપ)ને નિશાન સાંધી તેની ટીકા કરી હતી અને તેને એક જૂઠી પાર્ટી ગણાવી હતી. આ નિવેદનના જવાબમાં, ગજેન્દ્ર ચૌહાણે હવે નસીરુદ્દીન શાહ પર તીખા અને કટાક્ષપૂર્ણ શબ્દોમાં વળતો પ્રહાર કર્યો છે.

શું બોલ્યા ગજેન્દ્ર ચૌહાણ?

સત્યજીત રે ફિલ્મ એન્ડ ટેલિવિઝન ઇન્સ્ટિટ્યૂટ (SRFTI) ખાતે ચાલી રહેલા વિદ્યાર્થીઓના વિરોધ પ્રદર્શનો અંગે નસીરુદ્દીન શાહે કરેલી ટિપ્પણીઓનો ગજેન્દ્ર ચૌહાણે વિરોધ કર્યો છે. તેમણે સૂચન કર્યું છે કે સરકાર પર પ્રહારો કરવાને બદલે, નસીરુદ્દીન શાહે કોઈ રચનાત્મક અને ઉપયોગી સલાહ આપવી જોઈએ. ગજેન્દ્ર ચૌહાણનું માનવું છે કે, આ મુદ્દાના ઉકેલ માટે વિદ્યાર્થીઓ અને કોલેજ વ્યવસ્થાપન વચ્ચે વાતચીત થવી જોઈએ, કારણ કે ઉકેલ સુધી પહોંચવાનો આ એકમાત્ર રસ્તો છે.

ગજેન્દ્ર ચૌહાણે નસીરુદ્દીન શાહ દ્વારા ભાજપને 'બ્લડી જૂઠ્ઠી પાર્ટી' કહેવા બદલ પોતાની નારાજગી વ્યક્ત કરી છે. એક સમાચાર એજન્સી સાથેની વાતચીતમાં તેમણે કહ્યું, "આ અત્યંત દુઃખદ છે; તમે એ પક્ષને 'બ્લડી જૂઠ્ઠી પાર્ટી' કહી રહ્યા છો જે છેલ્લા 12-13 વર્ષથી દેશનું શાસન સંભાળી રહ્યો છે. તમને શરમ આવવી જોઈએ. આ દેશના 140 કરોડ લોકોએ આ પક્ષને સત્તા સોંપી છે, તેમ છતાં તમે તેના પર અપમાનજનક ટિપ્પણીઓ કરી રહ્યા છો."

ગજેન્દ્ર ચૌહાણે જણાવ્યું કે, હિન્દી સિનેમામાં નસીરુદ્દીન શાહનું યોગદાન પ્રશંસનીય છે; જોકે, તેમણે સૂચન કર્યું કે રાજકીય મુદ્દાઓ પર ચર્ચા કરતી વખતે શાહે વિવિધ દ્રષ્ટિકોણનો પણ વિચાર કરવો જોઈએ અને તેના પર મનન કરવું જોઈએ. ગજેન્દ્ર ચૌહાણનો દાવો છે કે નસીરુદ્દીનની સોશિયલ મીડિયા પોસ્ટ્સ હંમેશા એકતરફી હોય છે.

ગજેન્દ્ર ચૌહાણે નસીરુદ્દીન શાહને કહ્યું, "તમે એક પ્રતિભાશાળી કલાકાર અને સારા માણસ છો. જોકે, મેં જોયું છે કે તમારા ટ્વીટ્સ અને વીડિયો સતત માત્ર એક જ પક્ષમાં હોય છે. તમે ક્યારેય સિક્કાની બંને બાજુ જોતા નથી."

SRFTI પર કહી આ વાત

SRFTI ખાતે તાજેતરમાં થયેલા વિરોધ પ્રદર્શનો અંગે વાત કરતા ગજેન્દ્ર ચૌહાણે જણાવ્યું હતું કે, જો સંસ્થામાં હડતાલ થાય, તો વહીવટીતંત્ર તેને સંભાળવા માટે સક્ષમ છે. વિદ્યાર્થીઓને વિરોધ કરવાનો અધિકાર છે, પરંતુ જ્યાં સુધી સંબંધિત પક્ષો એકસાથે બેસીને મુદ્દાઓ પર ચર્ચા ન કરે, ત્યાં સુધી કોઈ ઉકેલ આવી શકે નહીં. સરકાર વિરોધી નિવેદનો કરવાને બદલે, તમારે વિદ્યાર્થીઓને સલાહ આપવી જોઈએ. અમારા પક્ષના કાર્યકરો અને રાજકારણીઓએ આ વિજય મેળવવા માટે ખૂબ જ સખત મહેનત કરી છે અને જેઓ લોકોના ભલા માટે કંઈ જ કરી રહ્યા ન હતા, તેમને સત્તા પરથી હટાવ્યા છે. તમે એક જાણીતા કલાકાર છો. બસ, થોડા વધુ પોઝિટીવ રહેવાનો પ્રયાસ કરો.

નસીરુદ્દીન શાહએ પોતાના નિવેદનમાં શું કહ્યું હતુ?

હકીકતમાં, તાજેતરમાં જ નસીરુદ્દીન શાહે ભાજપ પર નિશાન સાધતા કહ્યું કે, બંગાળની ચૂંટણીમાં કપટ અને દાવપેચ દ્વારા જીત મેળવ્યા બાદ, ભાજપ જેને તેમણે "જૂઠ્ઠી પાર્ટી" ગણાવી, હવે એવા દરેક વ્યક્તિ પાસેથી બદલો લઈ રહ્યો છે જે તેની વિચારધારા અને નીતિઓ સાથે સહમત નથી.

આ બદલાની ભાવનાનો ભોગ બનનારા તાજેતરના લોકો 'સત્યજીત રે ફિલ્મ એન્ડ ટેલિવિઝન ઇન્સ્ટિટ્યૂટ'ના વિદ્યાર્થીઓ છે, જેઓ ભવિષ્યના ફિલ્મ નિર્માતાઓ છે. વહીવટીતંત્ર પાસેથી જવાબદારીની અપેક્ષા રાખવાને બદલે, તેમને નોટિસો આપવામાં આવી રહી છે, તેમના પર નજર રાખવામાં આવી રહી છે, તેમને ધમકાવવામાં આવી રહ્યા છે અને હવે તો તેમને તેમનાં હોસ્ટેલ ખાલી કરવાનું પણ કહેવામાં આવ્યું છે.

આ પણ વાંચોઃ અરુણાચલમાં સિયાંગ ડેમ પર ભારે બબાલ, કેન્દ્ર સરકાર RAFના 250 જવાનો રાજ્યમાં મોકલશે

ગજેન્દ્ર ચૌહાણે આ નિવેદન બદલ નસીરુદ્દીન શાહની ઝાટકણી કાઢી છે. ઉલ્લેખનીય છે કે, અગાઉ નસીરુદ્દીન શાહે 'કોકરોચ જનતા પાર્ટી' દ્વારા આયોજિત એક વિરોધ પ્રદર્શનમાં ભાગ લીધો હતો અને મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ