- સ્કીલ ડેવલપમેન્ટ માટે સરકાર દ્વારા મહત્વનો નિર્ણય
- અમદાવાદ, વડોદરા, રાજકોટ, સુરત અને દાહોદ ખાતે પાંચ આઈટીઆઈ બનશે
- શ્રમ અને રોજગાર મંત્રી બળવંતસિંહ રાજપૂતની જાહેરાત
આજે સરકારની કેબિનેટ બેઠક યોજાઈ હતી. જેમાં વાવાઝોડાથી થયેલ નુકસાની મામલે સહાય ઉપરાંત બહુચરાજી મંદિરના નવનિર્માણ સહિત અનેક નિર્ણયો લેવામાં આવ્યા છે. જેના ભાગરૂપે સ્કિલ ડેવલોપમેન્ટ માટે સરકાર દ્વારા મોટો નિર્ણય લેવામાં આવ્યો છે અને હવે સરકારની જાહેરાત મુજબ અમદાવાદ, વડોદરા રાજકોટ સહિત પાંચ સ્થળોએ મેગા આઈટીઆઈનું નિર્માણ કરવામાં આવશે તેવું જણાવ્યું છે.
મંત્રી બળવંતસિંહ રાજપૂતે જણાવ્યું હતું કે...
આ મામલે આજે ગાંધીનગર ખાતે શ્રમ અને રોજગાર મંત્રી બળવંતસિંહ રાજપૂતે જણાવ્યું હતું. કે રાજ્યના કૌશલ્યવાન યુવાનોને રોજગારીની વધુને વધુ તકો ઉપલબ્ધ થાય તેવા હેતુથી અનેકવિધ રોજગાર લક્ષી આયામો શરૂ કર્યા છે, જેને વધુ પ્રાધાન્ય આપવાની નેમ સાથે સ્કીલ ડેવલોપમેન્ટ આધારે અમદાવાદની કુબેરનગર સહિત વડોદરા, રાજકોટ, સુરત અને દાહોદ ખાતે એમ ઝોન મુજબ પાંચ મેગા આઈટીઆઈ નિર્માણ કરવાનો રાજ્ય સરકાર દ્વારા નિર્ણય કરવામાં આવ્યો છે.
ઘર આંગણે જ અભ્યાસની સગવડતા
રોજગાર મંત્રી બળવંતસિંહ રાજપૂતે વધુમાં કહ્યું હતું કે ગુજરાત ઔદ્યોગિક ક્ષેત્રે દેશનું અગ્રેસર રાજ્ય છે. ત્યારે ગુજરાતના ઉદ્યોગ ગૃહોની જરૂરિયાત અને તેમની માંગને ધ્યાને રાખીને રાજ્યની આઈટીઆઈમાં યુવાઓને સમયની માંગ મુજબ કૌશલ્ય વર્ધન તેમજ પ્રશિક્ષિત કરાશે જેથી રાજ્યના યુવાનોને વિવિધ ઉદ્યોગ એકમોમાં વધુને વધુ રોજગારીની તકો ઉપલબ્ધ થશે. સરકારના આ નિર્ણયને લઈને કૌશલ્યવાન યુવાનોને ઘર આંગણે જ અભ્યાસની સગવડતા પૂરી પાડવામાં આવશે.
