નિવેદન / ધીરેન્દ્ર શાસ્ત્રીએ વડોદરામાં લગ્નને લઈને કર્યું મોટું એલાન, કહ્યું હું કોઈ સાધુ કે ફકીર નથી...

• વડોદરામાં ધીરેન્દ્ર શાસ્ત્રીનો દિવ્ય દરબાર
• હું જરુર લગ્ન કરીશ, તમે શુટ તૈયાર રાખજોઃ બાબા
• હું કોઈ સાધુ કે ફકીર નથીઃ ધીરેન્દ્ર શાસ્ત્રી

સુરત, અમદાવાદ, રાજકોટ બાદ ધીરેન્દ્ર શાસ્ત્રીના બે દિવસીય દિવ્ય દરબારનું વડોદરા ખાતે આયોજન કરવામાં આવ્યું છે. દિવ્ય દરબારના પહેલા દિવસે શહેરના નવલખી મેદાનમાં મોટી સંખ્યામાં શ્રદ્ધાળુઓ ઉમટી પડ્યા હતા. બાગેશ્વર ધામના ધીરેન્દ્ર શાસ્ત્રીએ જીપમાં બેસીને લોકોનું અભિવાદન ઝીલ્યું હતું. તેઓ જીપમાં બેસીને નવલખી મેદાન ખાતે પહોંચ્યા હતા. 

લગ્નને લઈને આપ્યું મોટું નિવેદન
આ દરમિયાન ધીરેન્દ્ર શાસ્ત્રીએ ઓડિશામાં થયેલા ટ્રેન અકસ્માતને લઈને દુઃખ વ્યક્ત કર્યું હતું. જે બાદ તેઓએ મીડિયા સાથેની વાતચીત દરમિયાન લગ્ન કરવાને લઈને મોટું નિવેદન આપ્યું હતું. તેમણે જણાવ્યું હતું કે, 'હું જરૂર લગ્ન કરીશ,  હું કોઈ સાધુ કે ફકીર નથી.'

હું માત્ર હનુમાનજીનો ભક્ત છું: ધીરેન્દ્ર શાસ્ત્રી
જ્યારે પત્રકારે ધીરેન્દ્ર શાસ્ત્રીને લગ્નને લઈને સવાલ પૂછ્યો ત્યારે તેમણે જણાવ્યું હતું કે,  'આ તો તમે બધાએ ઘણો જૂનો સવાલ પૂછી લીધો. લગ્ન ઘણા જલ્દી થશે અને તમે બધા તમારા શૂટ તૈયાર રાખજો. હું કોઈ મહાપુરુષ કે કોઈ ફકીર નથી. હું ફક્ત તમારી જેમ સામાન્ય માણસ જ છું, હું માત્ર હનુમાનજીનો ભક્ત છું.'

'માતા-પિતાના ભાવને હું ડગવા નહીં દઉં'
ધીરેન્દ્ર શાસ્ત્રીએ વધુમાં કહ્યું હતું કે, 'મારા ગુરુ અને માતાની આજ્ઞા છે લગ્ન કરવાની, માતા-પિતાએ કહ્યું છે કે તમારે લગ્ન કરવાના છે. જે પાપ લાગે એને હું ભોગવી લઈશ, પરંતુ માતા-પિતાના એ ભાવને હું ડગવા નહીં દઉં. તેમની આજ્ઞા હું જરૂર માનીશ.'  

હિપ્નોટાઈઝને લઈને આપ્યું નિવેદન
હિપ્નોટાઈઝને લઈને ધીરેન્દ્ર શાસ્ત્રીએ જણાવ્યું હતું કે, આ સસ્તી લોકપ્રિયતા મેળવવાના ઉપાય હોય છે, જેથી કરીને આમના નામ તમારા સુધી પહોંચી જાય. જો હું એવું કરતો હોત તો અત્યાર સુધીમાં કરોડો-અરોબો રૂપિયા ભેગા કરી લેત. શું તમે થઈ ગયા હિપ્નોટાઈઝ? આ બધી સસ્તી લોકપ્રિયતા મેળવવાના  ઉપાય છે.