લોકસભા / ગાયને રાષ્ટ્રીય પશુ જાહેર કરાશે? સરકારે કરી દીધો ખુલાસો, વાઘ-મોરને લઈને પણ આપી માહિતી

• ગાયને જાહેર નહીં કરાય રાષ્ટ્રીય પશુ
• રાષ્ટ્રીય પશુ તરીકે વાઘની માન્યતા યથાવત
• કેન્દ્રીય મંત્રી કિશન રેડ્ડીએ સંસદને કરી જાણ 

કેન્દ્ર સરકારે સ્પષ્ટ કરી દીધું છે કે, હાલ ગાયને રાષ્ટ્રીય પશુ જાહેર કરવાનો કોઈ ઈરાદો નથી. કેન્દ્રીય સંસ્કૃતિ પ્રધાન જી કિશન રેડ્ડીએ સોમવારે સંસદમાં આ માહિતી આપી હતી. તેમણે કહ્યું કે ભારતનું રાષ્ટ્રીય પ્રાણી વાઘ છે અને સરકાર ગાયને રાષ્ટ્રીય પ્રાણી તરીકે માન્યતા આપવાનો ઇરાદો ધરાવતી નથી. રેડ્ડી ભાજપના સાંસદ ભગીરથ ચૌધરી દ્વારા ઉઠાવવામાં આવેલા પ્રશ્નોના જવાબ આપી રહ્યા હતા. ચૌધરીએ પૂછ્યું હતું કે શું સરકાર ભારતીય સંસ્કૃતિના અભિન્ન અંગ 'ગૌમાતા'ને રાષ્ટ્રીય પ્રાણી તરીકે માન્યતા આપશે?

રાષ્ટ્રીય પશુ તરીકે વાઘ, પક્ષી તરીકે મોર યથાવત 
કિશન રેડ્ડીએ જવાબ આપ્યો, "ભારત સરકારે વાઘ અને મોરને રાષ્ટ્રીય પ્રાણી અને રાષ્ટ્રીય પક્ષી તરીકે માન્યતા આપી છે. આ બંને પ્રાણીઓને વાઇલ્ડ લાઇફ (પ્રોટેક્શન) એક્ટ, 1972ની અનુસૂચિ-30માં સામેલ કરવામાં આવ્યા છે. તેમણે કહ્યું કે ભારત સરકાર એમઓઇએફ એન્ડ સીસીના સત્તાવાર રેકોર્ડમાં દખલ કરી રહી નથી. મંત્રાલયે વાઘ અને મોરને રાષ્ટ્રીય પ્રાણી અને રાષ્ટ્રીય પક્ષી તરીકે ફરીથી સૂચિત કર્યા હતા. જેને ધ્યાનમાં રાખીને હાલના કાયદામાં કોઇ ફેરફાર કરવામાં આવી રહ્યા નથી.

ગાયને રાષ્ટ્રીય પશુ જાહેર કરવાનો હતો અલ્હાબાદ-જયપુર હાઈકોર્ટનો આદેશ 
અલ્હાબાદ અને જયપુર હાઈકોર્ટે ગૌમાતાને રાષ્ટ્રીય પ્રાણી તરીકે જાહેર કરવાની પ્રક્રિયાને ઝડપી બનાવવાનો આદેશ આપ્યો છે? તેના જવાબમાં રેડ્ડીએ કહ્યું હતું કે, આ બાબતો રાજ્યના કાયદાકીય અધિકારીઓના હાથમાં છે. રાજ્યો અને કેન્દ્રશાસિત પ્રદેશોના પ્રયાસોને ધ્યાનમાં રાખીને પશુપાલન અને ડેરી વિભાગ પશુઓની સ્વદેશી જાતિઓના વિકાસ અને સંરક્ષણ માટે રાષ્ટ્રીય ગોકુલ મિશન અમલમાં મૂકી રહ્યું છે. આ મિશનનો ઉદ્દેશ દેશમાં પશુઓ સહિતની દેશી જાતિઓની સંખ્યા વધારવાનો છે. તેમજ ગાય અને તેના સંતાનો સહિતના પ્રાણીઓના રક્ષણ માટે એનિમલ વેલફેર બોર્ડ ઓફ ઇન્ડિયાની પણ સ્થાપના કરવામાં આવી છે.